Search
ᐊᕐᓇᐅᑉ ᑎᒥᖓ
ᓇᔾᔨᐅᑎᖏᑦ ᐊᕐᓇᐅᑉ ᑎᒥᖓᓂ ᐊᓕᐊᓇᐃᒍᓐᓇᖅᐳᖅ ᐃᑉᐱᓐᓂᐊᓂᒃᑯᑦ, ᑯᔭᒍᓐᓇᖅᑐᑎᒃ, ᖁᓄᒍᓐᓇᖅᑐᑎᒃ, ᐊᒻᒪᓗ ᓇᔾᔨᓕᕈᓐᓇᖅᑐᑎᒃ ᐃᕐᓂᒍᓐᓇᖅᑐᑎᓪᓗ. ᑭᓇᑐᐃᓐᓇᖅ ᐊᕐᓇᖅ ᐊᐅᓈᕆᐅᖅᓯᒪᔪᖅ ᓇᔾᔨᓕᕈᓐᓇᖅᐳᖅ ᖃᐸ ᒪᓐᓂᖏᓐᓅᖅᐸᑦ.
ᐃᓗᓕᓕᒫᐸᓗᖏᑦ ᐊᑯᓛᖓᓂ ᐊᕐᓇᐅᑉ ᑎᒥᖓᓂ ᐃᓚᓕᐅᑎᕗᖅ ᓇᔾᔨᐅᑎᖏᓐᓄᑦ. ᓇᔾᔨᔪᓐᓇᐅᑦ ᑕᒪᒃᑮᖅᐳᖅ ᓯᓚᑖᓂ ᐊᒻᒪᓗ ᐃᓗᐊᓂ ᑎᒥᖓᑕ. ᐊᑐᓂᑦ ᐃᓗᓕᖏᑦ ᐊᑎᖃᐅᖅᐳᑦ ᐋᓐᓂᐊᕕᒻᒥᑦ ᐊᑐᖅᑕᐅᓲᓂᒃ ᐊᒻᒪᓗ ᐊᓯᖏᓐᓂᑦ ᐊᑎᖃᖅᑎᑕᐅᓲᖏᓐᓇᐅᓪᓗᑎᒃ.
ᐃᕕᐊᖐᒃ
ᐃᕕᐊᖐᒃ ᓇᔾᔨᒍᑎᖏᓐᓃᖏᒃᑲᓗᐊᕐᒪᑎᒃ ᐃᓚᐅᖃᑕᐅᒋᕗᑦ ᓇᔾᔨᒍᓐᓇᐅᑎᖏᓐᓂᑦ ᐃᒻᒧᖃᖅᑎᑦᑎᒍᓐᓇᕐᒪᑎᒃ ᕿᑐᕐᖓᖅᑖᖅᑎᓪᓗᒍ. ᐊᕐᓇᐅᑉ ᐃᕕᐊᖏᖏᒃ ᐃᑉᐱᓐᓂᐊᓴᕋᐃᑉᐴᒃ ᐊᒻᒪᓗ ᐊᑦᑐᖅᑕᐅᓪᓗᑎᒃ ᐊᓕᐊᓇᐃᒍᓐᓇᖅᐴᒃ ᑎᒥᒧᑦ. ᐃᓅᓱᑦᑐᕈᖅᐸᓪᓕᐊᑎᓪᓗᒍ ᐊᕐᓇᐃᑦ ᐃᕕᐊᖏᖏᑦ ᐋᓐᓂᐊᒃᑲᔪᑉᐳᑦ ᐱᕈᖅᐸᓪᓕᐊᒻᒪᑎᒃ ᐊᒻᒪᓗ ᐊᖏᓪᓕᕙᓪᓕᐊᒻᒪᑎᒃ.
ᐃᕕᐊᖐᒃᑭᒃ ᐱᕈᖅᐸᓪᓕᐊᑎᓪᓗᒋᒃ ᐃᓅᓯᓕᒫᕐᓂᑦ ᐱᒻᒪᕆᐅᕗᖅ ᓇᒻᒥᓂᖅ ᖃᐅᔨᓴᖃᑦᑕᕈᕕᒋᒃ ᐃᕕᐊᖐᒃᑭᒃ ᓇᒻᒥᓂᖅ ᖃᐅᔨᓴᖃᑦᑕᕈᓐᓇᖅᐳᑎᑦ ᐃᕕᐊᖐᒃᑭᒃ ᖃᓄᐃᓐᖏᒃᑲᓗᐊᕐᒪᖔᑎᒃ. ᐊᑖᓂ ᖃᕋᓴᐅᔭᒃᑯᑦ ᖃᐅᔨᒋᐊᕐᕕᔅᓴᐃᑦ ᒥᔅᓵᓄᑦ ᓇᒻᒥᓂᖅ ᐃᕕᐊᖏᓐᓂᒃ ᖃᐅᔨᓴᖃᑦᑕᕐᓂᖅ:
ᐅᑦᑑᒃ
ᐅᑦᑑᓐᓂᒃ ᐊᑎᖃᖅᐳᒃ ᓯᓚᑖᓃᑦᑐᖅ ᐊᕐᓇᐅᑉ ᓇᔾᔨᔾᔪᑎᖏᑦ. ᐅᑦᑑᒃ ᐃᓚᖃᖅᐴᒃ ᐅᑦᑑᑉ ᓯᓚᑎᖏᒃ, ᐅᕕᐅᖅ ᐊᒻᒪᓗ ᐹᖓ ᖁᐃᕕᒃ (ᐃᑎᕉᑉ ᐊᓂᕕᖓ) ᐅᑦᑑᒃ. ᑖᓐᓇ ᐊᕐᓇᓄᑦ ᐊᓕᐊᓇᐃᒋᔭᐅᓂᖅᐹᖑᕗᖅ ᐃᑉᐱᓐᓂᐊᓂᖓᓄᑦ.
Labia
ᐊᕐᓇᓕᒫᑦ ᒪᕐᕉᓐᓂᒃ ᐃᔾᔪᓂᖅᓵᓐᓂᒃ ᐅᕕᓂᖃᖅᐳᑦ ᓯᓚᑖᒍᑦ ᐅᑦᑐᖓᑕ. ᓯᓚᑖᓃᑦᑑᒃ ᐃᔾᔪᓂᖅᓵᒃ ᐅᕕᓃᒃ ᑲᑎᑦᑑᒃ ᑕᕐᕆᔾᔪᑕᐅᓪᓗᑎᒃ ᐅᑦᑑᓐᓄᒃ. ᐱᑕᖃᒃᑲᔪᑉᐳᑦ ᑎᖏᓂᒃ ᑕᑭᔫᒍᓐᓇᖅᑐᑎᒃ ᓇᐃᓪᓗᑎᓪᓘᓐᓃᑦ, ᐊᖏᔪᑦ ᒥᑭᔪᓪᓘᓐᓃᑦ. ᐊᔾᔨᒌᑕᖃᕐᓇᓂ. ᐊᕐᓇᖅ ᓯᔅᓴᓕᕋᐃᑉᐸᑦ (ᐊᓕᐊᓇᐃᒍᓱᓕᖅᑐᓂ) ᐳᓪᓕᓲᖑᕗᑦ ᐊᓯᔾᔨᕈᓐᓇᖅᑐᓂᓗ ᐊᒥᐊᖓ.
ᐃᓗᐊᓂ ᓯᓚᑎᖓᑕ ᐅᕕᓃᒃ ᐱᑕᖃᒃᑲᓐᓂᕆᕗᖅ ᐃᑉᐱᓐᓂᖅᓴᕋᐃᑦᑐᒻᒪᕇᓐᓂᒃ ᐅᕕᓂᒃᑲᓐᓃᓐᓂᒃ. ᐃᓚᖏᑦ ᐊᕐᓇᐃᑦ ᐅᕕᓂᒃᑲᓐᓂᖏᑦ ᓴᖅᑭᔮᖅᐳᑦ ᓯᓚᑖᓐᓂᑦ, ᑕᒪᓐᓇᓗ ᐅᔾᔨᐅᓐᖏᑦᑑᓐᖏᓚᖅ. ᐊᐅᐸᕈᔪᒃᑲᔪᑉᐳᑦ ᐊᒥᐊᖓ ᑭᓯᐊᓂ ᑲᔫᒍᓐᓇᕆᓪᓗᓂ ᕿᕐᓂᖅᑕᐅᓗᓂᓘᓐᓃᑦ. ᐃᓗᐊ ᐃᒧᓗᕿᐅᔪᓐᓇᖅᑐᓂ ᐅᕝᕙᓘᓐᓃᑦ ᐃᕆᐸᒍᓐᓇᖅᑐᓂ.
ᐃᖐᖓ
ᐅᕕᐅᖅ ᖁᓛᓃᑉᐳᖅ ᐅᑦᑑᒃ ᓯᓚᑎᖏᓐᓂᑦ ᐅᕕᓃᒃ ᑲᑎᕝᕕᖓ ᐴᓐᖑᐊᖑᓪᓗᓂ ᑕᕐᕆᕝᕕᖓ ᐅᕕᐅᑉ. ᑕᐃᒫᑦᑕᐅᖅ ᐅᕕᐅᑦ ᐊᖏᓂᖏᑦ ᐊᔾᔨᒌᓐᖏᑑᑎᐅᔪᓐᓇᖅᐳᑦ. ᒥᑭᔫᒍᓐᓇᖅᑐᓂ ᑭᒍᑕᐅᔭᖅᑎᑐᑦ ᐅᕝᕙᓘᓐᓃᑦ ᐊᖏᔫᒍᓐᓇᖅᑐᓂ ᑎᑭᖅᑎᑐᑦ. ᐅᕕᐅᖅ ᐊᓕᐊᓇᐃᓐᓂᖅᐹᖑᕗᖅ ᐊᑦᑐᐊᒋᐊᖓ ᐅᑦᑑᓐᓂᒃ. ᐊᕐᓇᖅ ᓯᔅᓴᑉᐸᑦ ᐅᕕᐅᖅ ᐊᖏᓪᓕᒍᓐᓇᖅᐳᖅ ᑎᓯᑦᑎᕐᓗᓂᓗ. ᐊᔅᓱᐊᓗᒃ ᐃᑉᐱᓂᖅᓴᕋᐃᑉᐳᖅ ᐊᑑᑎᖃᕐᓂᖓ ᐊᓕᐊᓇᐃᒍᓲᑎᑐᐃᓐᓇᐅᕗᖅ ᐊᕐᓇᖅ ᓯᔅᓴᑎᓪᓗᒍ. ᐃᓚᖏᓐᓄᑦ ᐊᑦᑐᖅᑐᒍ ᐋᓐᓂᓇᖅᐳᖅ.
ᖁᐃᕕᒃ
ᖁᐃᕕᖓ ᐊᒻᒪᔪᕋᓛᖑᕗᖅ ᑎᒥᒥᑦ. ᐊᑖᓂᑦᑎᐊᖅᑐᓂ ᐃᖐᖓ. ᑖᓐᓇ ᐃᓚᓕᐅᑎᓐᖏᓚᖅ ᓇᔾᔨᔾᔪᑎᓄᑦ.
ᐅᑦᑑᑉ ᐹᖓ
ᐅᑦᑑᑉ ᐹᖓ ᓯᓚᑎᖃᖅᐳᖅ ᒪᕐᕉᓐᓂᒃ ᐅᕕᓃᓐᓂᒃ ᐃᓗᓕᒋᓪᓗᓂᒋᒃ ᐅᑦᑑᒃ ᐊᑖᓂᑦ ᑲᑎᑦᑑᓐᓄᒃ ᐅᑦᑑᑉ. ᐅᑦᑑᒃ ᐊᑦᑐᐊᕘᒃ ᓯᓚᑖᓐᓃᓐᖔᖅᑐᑎᒃ ᐊᑯᓛᖓᑕ ᐃᓗᐊᓄᑦ ᓇᔾᔨᔾᔪᑏᑦ.
ᐅᑦᑑᒃ
ᐅᑦᑑᒃ ᐊᐅᓈᕐᕕᒋᓲᕗᑦ ᐊᒻᒪᓗ ᖃᐅᓯᕐᕕᒋᓲᕗᑦ ᐊᕐᓇᖅ ᑕᖅᑭᑕᒫᑦ ᐊᐅᓈᖅᑎᓪᓗᒍ ᑎᒥᒦᓐᖔᖅᑐᓂ ᐊᒻᒪᓗ ᐅᓲᑉ ᐴᕐᕕᒋᓲᖓ ᑯᔭᑦᑎᓪᓗᒋᒃ. ᐅᑦᑑᒃ ᑕᓯᓲᒻᒪᕆᐅᕘᒃ ᐃᕐᓂᑎᓪᓗᒍ ᐊᓂᕕᐅᓪᓗᓂ ᑎᒥᒦᓐᖔᖅᑐᓂ ᓄᑕᕋᖅ.
ᐃᓪᓕᐊ ᓱᓪᓗᖓ
ᐃᓪᓕᐊᑉ ᓱᓪᓗᖓ ᓱᓪᓗᑯᑖᖑᕗᖅ ᑲᑎᓐᖓᔪᖅ ᐅᑦᑑᓐᓄᒃ ᐊᕐᓇᐅᑉ ᑎᒥᖓᑕ ᐃᓗᐊᓂ.
ᐃᓪᓕᐊᖅ
ᐃᓪᓕᐊᖅ ᐅᖃᐅᓯᑐᖃᐅᕗᖅ ᖃᓪᓗᓈᑎᑐᑦ ᑐᑭᖃᖅᑐᓂ ᓇᔾᔨᐊᖃᕐᕕᒃ. ᑕᖅᑭᑕᒫᑦ ᐊᕐᓇᖅ ᐊᐅᓈᕆᐅᖅᓯᒪᓂᕐᓂᖓᓂᑦ ᑭᓯᐊᓂ ᓄᖅᑲᕐᓗᓂ ᐊᐅᓈᕈᓐᓇᐃᓕᑉᐸᑦ, ᑎᒥ ᐅᐸᓗᖓᐃᔭᓲᖑᕗᖅ ᐃᓪᓕᐊᖓ ᐱᕈᕐᕕᐅᓂᐊᕐᒪᑦ ᓄᑕᕋᕐᒧᑦ. ᐊᕐᓇᖅ ᓇᔾᔨᓕᖅᐸᑦ ᒪᓐᓂᒃ ᐱᕈᓕᖅᑐᖅ ᐃᓂᑖᓲᖑᕗᖅ ᐃᓪᓕᐊᕐᒧᑦ ᐊᑦᑐᐊᓪᓗᓂ, ᓄᑕᕋᔅᓴᕈᖅᑐᓂ ᐊᒻᒪᓗ ᐱᕈᖅᑐᓂ ᓄᑕᕋᕈᖅᑐᓂ.
ᒪᓐᓂᒃᑯᕖᒃ
ᒪᕐᕉᕘᒃ ᒪᓐᓂᖃᕐᕖᒃ ᑕᖅᑭᑕᒫᒃ ᒪᓐᓂᒃᑯᕖᒃ ᓴᖅᑮᕙᑉᐴᒃ ᒪᓐᓂᒻᒥᒃ, ᑎᓱᐃᓐᓇᐸᓗᑦᑐᓂ ᓱᓪᓗᑯᑖᖏᓐᓄᑦ ᐱᕈᖅᑎᑕᐅᔪᓐᓇᖅᑐᓂ ᖃᐸᒧᑦ ᐊᖑᑎᐅᑉ ᐅᓱᖓᓂᑦ. ᒪᓐᓂᒃ ᐱᕈᓕᖅᐸᑦ ᑎᓱᓲᖑᕗᖅ ᓱᓪᓗᑯᑖᖓᒍᑦ ᐅᓂᑦᑐᓂᓗ ᐃᓪᓕᐊᕐᒧᑦ. ᑕᐃᒪᐃᑦᑎᓪᓗᒍ ᐊᕐᓇᖅ ᓇᔾᔨᓕᓲᖑᕗᖅ.
ᒪᓐᓂᖃᕐᕖᒃ
ᒪᓐᓂᖃᕐᕖᒃ ᐃᓗᐊᓂᐊᓘᖅᐴᒃ ᐊᕐᓇᐅᑉ ᑎᒥᖓᓂ. ᒥᑭᔫᓪᓗᑎᒃ ᐊᑦᑐᐊᓪᓗᑎᒃ ᓱᓪᓗᑯᑖᖏᑦ. ᒪᓐᓂᓕᒫᑦ ᐊᕐᓇᐅᑉ ᐃᓗᐊᓃᑦᑐᑦ ᒪᓐᓂᖃᕐᕕᒻᒦᓲᖑᕗᑦ.
ᐅᖃᓕᒫᒃᑲᓐᓂᕈᒪᒍᕕᑦ ᐊᕐᓇᐅᑉ ᑎᒥᖓᑕ ᒥᔅᓵᓄᑦ ᐅᑯᐊ ᖃᐅᔨᒋᐊᕐᕕᒋᔪᓐᓇᖅᐸᑎᑦ ᖃᕋᓴᐅᔭᒃᑯᑦ: