ᐃᓕᖕᓂᒃ ᐃᒃᐱᒋᔭᖃᑦᑎᐊᕈᒪᓂᐊᕈᕕᑦ ᑎᒦᑦ ᐅᐱᒋᑦᑎᐊᕆᐊᖃᖅᐸᐃᑦ ᐃᒪᓐᓇ ᑐᑭᖃᖅᖢᓂ ᑎᒦᑦ ᐊᐅᓚᓂᕆᕙᒃᑕᖓ ᖃᐅᔨᒪᑦᑎᐊᕐᓗᒍ ᐊᒻᒪ ᑎᒦᑦ ᑲᒪᒋᑦᑎᐊᕐᓗᒍ ᐱᕋᖓᙱᓪᓗᑎᑦ ᐃᓅᓯᖃᑦᑎᐊᕈᓐᓇᖁᓪᓗᑎᑦ. ᒪᑯᓂᖓ ᑐᑭᓯᓇᑦᑎᐊᖅᑐᓂᒃ ᐋᖅᑭᒃᓱᐃᔪᓐᓇᕐᓂᖅ ᓄᓕᐊᕐᓂᐅᑉ ᒥᒃᓵᓄᑦ, ᑭᓯᐊᓂᑦᑕᐅᖅ ᓂᕈᐊᕆᔭᖃᕈᓐᓇᑦᑎᐊᕐᒥᓗᓂ ᑎᒥᒃᑯᑦ, ᐃᓱᒪᒃᑯᑦ, ᐃᒃᐱᒋᔭᒃᑯᑦ ᐅᒃᐱᕐᓂᒃᑯᓪᓗ.

ᕿᑐᕐᙱᐅᕈᓐᓇᖅᓯᑎᓪᓗᒋᑦ, ᑎᒦᑦ ᐊᓯᔾᔨᖅᐸᓪᓕᐊᓕᖅᑎᓪᓗᒍ ᓄᑕᕋᐅᓚᐅᕐᓗᑎᑦ ᒪᒃᑯᒃᓯᕙᓪᓕᐊᓕᖅᑎᓪᓗᑎᑦ, ᑎᒦᑦ ᐱᐅᒌᓐᓇᕋᓱᒡᓗᒍ ᐊᔪᕐᓇᖃᑦᑕᑐᐃᓐᓇᕆᐊᖃᖅᐳᖅ. ᑎᒦᑦ ᖃᓄᐃᓕᕙᓪᓕᐊᓂᖓᓂ ᐃᓕᓐᓂᐊᖅᐸᓪᓕᐊᓂᖅ - ᐊᒻᒪ ᑭᒃᑯᑐᐃᓐᓇᐃᑦ ᑎᒥᖏᑦ ᐊᔾᔨᒌᙱᓐᓂᖏᓐᓂᒃ ᖃᐅᔨᒪᓗᓂ - ᐃᑲᔪᕐᓂᖃᕈᓐᓇᖅᐳᖅ. ᕿᑐᕐᙱᐅᕈᓐᓇᖅᓯᔭᕌᖓᑕ ᐃᓱᒪᒃᑯᑦ ᑎᒥᒃᑯᓪᓗ ᐊᓯᔾᔨᖅᓯᒪᓕᖃᑦᑕᕐᓂᖏᓐᓄᑦ, ᐊᔾᔨᒌᙱᑦᑐᓂᒃ ᐃᒃᐱᒋᔭᖃᖃᑦᑕᓕᕈᓐᓇᖅᑐᑎᑦ ᐊᑕᐅᑦᑎᒃᑯᑦ ᐱᒻᒪᕆᐅᖅᑰᔨᓕᕈᓐᓇᖅᐳᑎᑦ, ᓇᓗᓕᐅᒪᓕᕐᓗᑎᑦ, ᐃᓱᒫᓗᓕᕐᓗᑎᑦ ᐱᔪᒃᓯᓕᕐᓗᑎᑦ ᐊᒻᒪ ᖁᕕᐊᓱᓚᐅᕐᓗᑎᑦ ᓄᒫᓱᓕᕐᒥᓗᑎᑦ ᓂᙵᒡᓗᑎᓪᓘᓐᓃᑦ.

ᐃᓛᓐᓂᒃᑯᑦ ᐊᓯᑦᑕ ᑎᒥᖏᓐᓂᒃ ᐊᔾᔨᒋᔭᐅᙱᓐᓂᑦᑎᓐᓂ ᐅᔾᔨᕈᓱᖃᑦᑕᕐᓂᐊᕋᓗᐊᖅᑎᓪᓗᑕ, ᐅᒃᐱᕈᓱᓕᕆᐊᖃᙱᑦᑐᒍᑦ ᐊᑕᐅᓯᑐᐊᕐᒥᒃ ᑎᒥᒥᒃ ᐱᐅᔪᖃᕈᓐᓇᕐᓂᖓᓂ. ᐃᓄᖕᓂᒃ ᐅᓄᖅᑐᓂᒃ ᑏᕖᒃᑯᑦ ᑕᕐᕆᔮᒃᓴᒃᑯᓪᓗ ‘ᓄᔭᑦᑎᐊᕆᒃᑐᓂᒃ’, ‘ᐅᕕᓂᑦᑎᐊᕆᒃᑐᓂᒃ’ ᐊᒻᒪ ‘ᑎᒥᖏᑦ ᐋᖅᑭᑦᑎᐊᖅᓯᒪᔪᓂᒃ ᑕᑯᕙᒃᑲᓗᐊᖅᑎᓪᓗᑕ. ᐃᓅᓯᓪᓚᑦᑖᑦᑎᓐᓂᓕ, ᐱᐅᓚᑦᑖᖅᑐᑦ ᐊᔾᔨᒌᙱᑉᐳᑦ ᐋᖅᑭᒃᓯᒪᓂᖏᑦ, ᐊᖏᓂᖏᑦ ᐊᕐᕌᒍᖏᓪᓗ.

ᑖᓐᓇ ᑐᑭᓯᒋᐊᕐᕕᒃ ᑎᒥᑦᑕ ᓄᓕᐊᕐᓂᕆᕙᒃᑕᖏᓐᓄᑦ ᑐᕌᖓᔪᓂᒃ ᑐᑭᓯᒋᐊᕈᑎᒃᓴᖃᖅᐳᖅ, ᑭᓯᐊᓂ ᐊᓯᕈᓘᔭᖏᓐᓂᒃ ᑐᑭᓯᒋᐊᕈᑎᒃᓴᖃᒃᑲᓐᓂᖅᐳᖅ ᐃᑭᐊᖅᑭᕕᒃᑯᑦ ᑎᒥᑦᑕ ᐊᐅᓚᓂᕆᕙᒃᑕᖏᓐᓂᒃ ᐱᔾᔪᑎᓕᖕᓂᒃ, ᖃᓄᖅ ᑎᒥᑦᑎᓐᓂ ᑲᒪᑦᑎᐊᕈᓐᓇᕐᒪᖔᑦᑕ ᐊᒻᒪ ᖃᓄᖅ ᑕᐅᑦᑐᑦᑎᓐᓂ ᖁᕕᐊᒋᔭᖃᕈᓐᓇᕐᒪᖔᑦᑕ. ᐅᑯᐊ ᑕᕝᕙ ᐃᑭᐊᖅᑭᕕᒃᑯᑦ ᑕᑯᒋᐊᖅᑕᐅᔪᓐᓇᖅᑐᑦ ᐱᒋᐊᕈᑎᒃᓴᑦᑎᐊᕙᑦ:

ᖃᓄᖅ ᑎᒥᕗᑦ ᐊᐅᓚᓂᖃᖅᐸᒃᐸ
ᖃᓄᖅ ᑎᒥᕗᑦ ᐊᐅᓚᓂᖃᖅᐸᒃᐸ
ᓄᓕᐊᕐᓂᖅ ᐊᓯᖏᓪᓗ ᑎᒥᐅᑉ ᑕᐅᑦᑐᖏᑦ
ᒪᒃᑯᒃᑐᑦ ᐅᖃᐅᓯᖃᖅᑐᑦ ᑎᒥᐅᑉ ᐃᓱᒪᐅᓪᓗ ᒥᒃᓵᓄᑦ