ᓄᓕᐊᕈᒪᙱᑎᓪᓗᑎᑦ ᐊᑲᐅᙱᓪᓕᐅᕈᑕᐅᖏᓐᓇᐅᔭᖅᐳᖅ. ᓄᓕᐊᖅᑕᐅᔪᒪᑎᓪᓗᑎᑦ ᐋᒃᑳᕋᓗᐊᕈᕕᑦ ᐱᖃᑎᖕᓄᑦ (ᐱᖃᓐᓇᕆᒐᓗᐊᕈᕕᐅᒃ, ᐅᐃᒋᒐᓗᐊᕈᕕᐅᒃ/ᓄᓕᐊᕆᒐᓗᐊᕈᕕᐅᒃ, ᐊᓂᖃᑎᒋᑦᑕᓚᐅᑲᑐᐃᓐᓇᕋᓗᐊᕈᕕᐅᒃ, ᐃᓚᒋᒐᓗᐊᕈᕕᐅᒃ, ᖃᐅᔨᒪᔨᕐᔪᐊᒻᒪᕆᐊᓘᒐᓗᐊᖅᐸᑦ ᐅᕝᕙᓘᓐᓃᑦ ᑕᑯᓕᓵᑦᑎᐊᕋᓗᐊᕈᕕᐅᒃ) ᑕᐃᒪᐃᓕᐅᖏᓐᓇᕋᓱᒃᐸᑦ, ᒪᓕᒐᕐᒥᒃ ᓱᕋᐃᓪᓚᕆᒃᑐᑦ. ᖁᓄᔪᕐᓂᐊᕐᓂᐅᖕᒪᑦ ᑲᓴᓗᓗᒃᑕᐅᓕᕐᓂᕈᕕᑦ ᓄᓕᐊᖅᑕᐅᔪᒪᓗᑎᑦ ᐊᖏᓚᐅᙱᒃᑲᓗᐊᖅᑎᓪᓗᑎᑦ. ᑎᓕᐅᖅᑕᐅᓗᑎᑦ ᑯᔭᖁᔭᐅᒍᕕᑦ, ᖁᓄᔪᕐᓂᐊᕐᓂᐅᖕᒪᑦ. ᐋᒃᑲ ᑐᑭᖃᕐᒪᑦ ᐋᒃᑳᕐᓂᕐᒥᒃ. ᓈᒻᒪᙱᓪᓚᕆᓲᖑᖕᒪᑦ ᐃᓄᖕᒥᒃ ᖃᓄᑐᐃᓐᓇᑦᑎᐊᖅ ᓄᓕᐊᖅᑕᐅᓇᓱᖕᓂᖅ ᐊᖏᖅᓯᒪᙱᑎᓪᓗᑎᑦ ᐅᕝᕙᓘᓐᓃᑦ ᐊᖏᕈᓐᓇᙱᑎᓪᓗᑎᑦ.

ᖁᓄᔪᕐᓂᐊᕐᓂᖅ ᖁᓄᔪᕐᓂᐊᖅᑕᐅᒍᕕᓪᓘᓐᓃᑦ ᐱᒃᑲᖅᑎᑕᐅᔭᕆᐊᖃᙱᑦᑎᐊᖅᐳᑎᑦ. ᖁᓄᔪᕐᓂᐊᖅᑕᐅᓐᓂᕈᕕᑦ, ᐱᕋᔭᖕᓂᕐᒧᑦ ᓵᑕᐅᕗᑎᑦ. ᐅᖃᐅᔾᔨᔭᕆᐊᖃᖅᐳᑎᑦ ᐅᒃᐱᕆᒋᔭᕐᓂᒃ ᐋᓐᓂᐊᕕᖕᒧᓪᓗ ᖃᐅᔨᓴᖅᑕᐅᑲᐅᑎᒋᓗᑎᑦ ᕿᓚᒻᒥᐅᓂᖅᐹᒃᑯᑦ. ᐃᑲᔪᖅᑕᐅᔪᒪᔪᑦ ᐃᓅᓯᓕᕆᔭᐅᔪᒪᔪᓪᓘᓐᓃᑦ, ᓄᑕᖅᑲᓄᑦ ᐃᑲᔪᖅᑕᐅᕕᖕᒧᑦ ᐅᖄᓚᔪᓐᓇᖅᐳᑦ ᐅᕗᖓ ᓈᓴᐅᑎᒧᑦ 1-800-668-6868 ᐅᕝᕙᓘᓐᓃᑦ ᐊᖓᔪᖅᑳᕐᓄᑦ ᐅᖃᐅᓯᕆᓗᒍ, ᐱᖃᓐᓇᕆᔭᕐᓄᑦ, ᐃᓕᓴᐃᔨᖕᓄᑦ, ᐃᓗᐊᖅᓴᐃᔨᒧᑦ ᐅᕝᕙᓘᓐᓃᑦ ᐊᖓᔪᒋᔭᕐᓄᑦ ᐃᓐᓇᐅᓂᖅᓴᐅᔪᒧᑦ ᐅᒃᐱᕆᑐᐊᕈᖕᓂ.
 
ᐋᓐᐊᓂᕕᖕᒥ ᖃᐅᔨᓴᖅᑕᐅᓵᓕᓪᓗᓂ ᕿᓚᒻᒥᐅᓂᖅᐹᒃᑯᑦ ᐃᑲᔫᑕᐅᔪᓐᓇᖅᐳᖅ ᓯᖓᐃᓕᖅᑎᑕᐅᑦᑕᐃᓕᒪᓂᕐᒧᑦ ᐊᒻᒪ ᐊᓴᐱᑖᖅᑕᐃᓕᒪᓂᕐᒧᑦ. ᐊᒻᒪᑦᑕᐅᖅ, ᖃᐅᔨᓴᖅᑕᐅᔪᓐᓇᕆᕗᑎᑦ ᖃᖓᒃᑯᑦ ᖁᓄᔪᕐᓂᐊᖅᑕᐅᓚᐅᕐᒪᖔᖅᐱᑦ ᐄᔭᒐᖅᑎᑕᐅᓗᑎᑦ ᐃᖅᑲᖅᑐᒐᒃᓴᙳᖅᑎᑦᑎᔪᒪᑐᐊᕈᕕᑦ. ᐃᑲᔪᖅᑕᐅᔪᓐᓇᖅᐳᑎᑦ ᐋᓐᓂᐊᕕᔅᓯᓐᓂ, ᐸᓖᓯᒃᑯᓐᓂᑦ ᐊᒻᒪᓗ ᐃᖃᓗᖕᓂᐅᒃᐸᑦ, ᐋᓐᓂᐊᕐᕕᖕᒧᑦ.

ᖁᓄᔪᕐᓂᐊᖅᑕᐅᓐᓂᕈᕕᑦ ᐅᕝᕙᓘᓐᓃᑦ ᐱᕋᔭᒃᑕᐅᓐᓂᕈᕕᑦ ᖁᓄᔪᕐᓂᐊᕐᓂᒃᑯᑦ, ᐱᒃᑲᖅᑎᑕᐅᔭᕆᐊᖃᙱᓚᑎᑦ. ᐃᑲᔪᖅᑕᐅᔭᕆᐊᖃᕐᓂᐊᖅᐳᑎᑦ ᕿᓄᐃᓵᕐᓗᑎᓪᓗ. ᐊᑯᓂᐊᓘᔪᓐᓇᕐᒪᑦ ᑎᒥᒃᑯᑦ ᐋᖅᑭᑦᑎᐊᕆᐊᒃᓴᖅ ᐊᑯᓂᐅᓂᖅᓵᓗᒡᓗ ᐃᒃᐱᒋᔭᒃᑯᑦ ᒪᒥᑦᑐᓐᓇᐃᓪᓕᓇᔭᖅᐳᑎᑦ.

 
ᖁᓄᔪᕐᓂᐊᕐᓂᖅ ᒪᒃᑯᒃᑐᓪᓗ
85ᐳᓴᖓᓂᒃ ᒪᒃᑯᒃᑐᒻᒪᕆᑯᓗᖕᒥᒃ ᖁᓄᔪᕐᓂᐊᖅᑕᐅᔪᖃᕌᖓᑦ, ᖃᐅᔨᒪᔨᒥᓄᑦ ᑕᐃᒪᐃᓕᐅᖅᑕᐅᓲᖑᕗᑦ. ᐅᑯᐊᖑᔪᓐᓇᕐᒪᑕ ᐊᓂᖃᑎᒋᓚᐅᑲᒃᓯᒪᑐᐃᓐᓇᖅᑕᖏᑦ, ᐱᖃᓐᓇᕆᔭᖏᑦ, ᖃᑕᙳᑎᖏᑦ ᐅᕝᕙᓘᓐᓃᑦ ᐃᓚᓪᓚᑦᑖᑯᓗᖏᓐᓂᒃ. ᑕᐃᒪᐃᓕᐅᖅᑐᖃᕈᓐᓇᖅᐳᖅ ᓄᓇᓯᐅᑎᐅᑉ ᐃᓗᐊᓂ, ᑲᑎᙵᕈᓘᔭᕐᕕᐅᔪᒥᒃ ᖁᕕᐊᓱᒃᑎᑦᑎᔪᓂᒃ, ᑭᒃᑯᒃᑭᐊᖅ ᐃᒡᓗᐊᓂ ᐃᓕᔅᓯᓐᓂᓪᓘᓐᓃᑦ. ᖁᓄᔪᕐᓂᐊᕐᓂᖅ ᐊᑲᐅᙱᓪᓕᐅᕈᑕᐅᖏᓐᓇᐅᔭᖅᐳᖅ ᐃᓚᒋᔭᐅᓪᓗᑎᑦ ᖃᓄᑐᐃᓐᓇᑦᑎᐊᖅ ᓄᓕᐊᕈᒪᙱᑎᓪᓗᑎᑦ ᑲᓴᓗᒃᑕᐅᓂᕐᒥᒃ-ᑎᓕᐅᕐᓂᑐᐃᓐᓇᐅᙱᒃᑲᓗᐊᖅᐸᑦ ᑯᔭᒃᑕᐅᓂᕐᒥᒃ.

ᐱᖓᓱᐃᓕᖅᑲᖓᔪᓂᒃ ᐱᓕᕆᔪᓐᓇᖅᐳᑎᑦ ᒥᒃᖠᒋᐊᕈᑕᐅᔪᓐᓇᖅᑐᓂᒃ ᖁᓄᔪᕐᓂᐊᖅᑕᐅᑦᑕᐃᓕᒪᓂᕐᒧᑦ ᐊᒻᒪ ᖁᓄᔪᕐᓂᐊᖅᑕᐅᓂᕐᒥᒃ ᖃᐅᔨᓴᖅᑕᐅᓂᕐᒧᑦ:

1. ᑐᑭᓯᓇᑦᑎᐊᕆᐊᖅᐸᒡᓗᑎᑦ ᖃᓄᐃᓕᐅᕈᒪᖕᒪᖔᖅᐱᑦ ᖃᓄᐃᓕᐅᕈᒪᙱᒻᒪᖔᖅᐱᓪᓘᓐᓃᑦ. ᐃᓱᒪᑐᐃᓐᓇᕈᕕᑦ ᐃᑲᔫᑕᐅᓇᔭᙱᒻᒪᑦ. "ᐋᒃᑳᖅᐸᒡᓗᑎᑦ" ᐊᖏᕈᒪᙱᑦᑎᐊᕌᖓᕕᑦ. ᐱᖃᑏᑦ ᐅᖃᐅᑎᕙᒡᓗᒍ "ᐋᒃᑳᓚᔭᕌᖓᒪ ᐅᖃᕕᖃᑦᑕᖅᑐᖓ. ᓄᖅᑲᖃᑦᑕᓚᐅᕆᑦ ᓄᖅᑲᖁᒑᖓᒃᑭ." ᓂᓪᓕᙱᒃᑯᕕᑦ ᐱᖃᑏᑦ ᐃᓱᒪᑐᐃᓐᓇᕆᐊᖃᕐᒪᑦ ᖃᓄᓗᒃᑖᖅ ᖃᓄᐃᑦᑑᓇᓱᒋᓐᓈᙱᓪᓗᓂ ᑕᐅᕗᖓᓕᒫᕐᓗ ᐱᓕᕇᓐᓇᖃᑕᐅᒐᓗᐊᕈᕕᑦ ᖃᓄᐃᒃᓴᙱᓐᓇᓱᒋᔭᐅᔪᓐᓇᖅᐳᑎᑦ. ᑭᓇᑐᐃᓐᓇᖅ ᐋᒃᑳᕋᓗᐊᖅᐸᑦ ᓄᖅᑲᙱᒃᑯᕕᓪᓗ - ᐱᕋᔭᒐᔭᖅᐳᑎᑦ.
2. ᐅᔾᔨᖅᓱᑦᑎᐊᖅᐸᒡᓗᓯ ᐋᖓᔮᖅᐸᙱᓪᓗᓯᓗ - ᐃᒥᐊᓗᖕᒥᒃ ᐃᒥᖅᓯᒪᓗᐊᖅᖢᓂ ᑐᕌᖓᔭᓐᓂᖓᓄᑦ ᖁᓄᔪᕐᓂᐊᕐᑕᐅᓂᕐᒧᑦ ᐅᐱᓐᓇᕋᓂ ᑭᓇᑐᐃᓐᓇᑦᑎᐊᒧᑦ ᐃᓱᒪᖅᓲᑕᐅᓕᕈᓐᓇᕋᕕᑦ ᐋᖓᔮᓗᐊᖅᑎᓪᓗᑎ. ᑲᑎᙵᕈᓘᔭᖅᑐᓄᑦ ᐅᐸᒍᑎᔭᕌᖓᕕᑦ ᐅᐸᒃᑕᑎᓪᓗ ᐃᒥᕐᓂᐊᖅᑎᓪᓗᒋᑦ ᐅᕝᕙᓘᓐᓃᑦ ᓱᐴᖅᑐᒐᑲᑕᖕᓂᐊᖅᑎᓪᓗᒋᑦ, ᖃᐅᔨᒪᒋᐊᖃᑦᑕᕐᓂᐊᖅᐳᑎᑦ ᑕᑎᒋᔪᓐᓇᕐᓂᐊᖅᑕᕐᓂᒃ ᑕᐃᑲᓃᖃᑕᐅᔪᖃᕋᓗᐊᕐᒪᖔᑦ "ᐃᑲᔪᕈᓐᓇᕋᔭᖅᑐᒥᒃ" - ᑕᐃᓐᓇ ᑕᑎᒋᓕᒑᔭᑦ ᐃᓕᖕᓂᒃ ᑲᒪᓂᐊᕐᓗᓂ ᐃᑲᔪᕐᓂᐊᕐᓗᓂᓗ ᑭᖑᒻᒧᑦ ᐅᒡᒍᐊᕈᑎᒋᓕᕋᔭᖅᑕᕐᓂᒃ ᐱᓕᕆᐊᖑᓕᓚᐅᙱᓐᓂᕐᓂᒃ. ᐳᐃᒍᖅᑕᐃᓕᓗᑎᓪᓗ, ᐃᕝᕕᑦ ᐊᐱᕆᔨᐅᒍᕕᑦ 'ᖃᓄᐃᙱᒃᑲᓗᐊᕐᒪᖔᑦ', ᑭᓇᑐᐃᓐᓇᑦᑎᐊᖅ ᐊᖏᕈᓐᓇᙱᒻᒪᑦ ᓄᓕᐊᕐᓂᕐᒧᑦ ᓯᓂᒃᑳᖓᑕ ᖃᐅᔨᒪᔪᓐᓃᖅᓯᒪᔭᕌᖓᑕᓘᓐᓃᑦ ᐅᕝᕙᓘᓐᓃᑦ ᐃᒥᐊᓗᒃᓯᒪᔭᕌᖓᑕ ᐅᔭᕋᒃᓯᒪᔭᕌᖓᑕᓘᓐᓃᑦ. ᐃᓅᖃᑎᒋᔭᑦ ᐃᒥᐊᓗᒃᓯᒪᒃᐸᑦ ᐅᔭᕋᒃᓯᒪᒃᐸᓪᓘᓐᓃᑦ, ᖃᐅᔨᒪᙱᑐᐃᓐᓇᕆᐊᖃᕐᒪᑦ ᖃᓄᐃᓕᐅᕋᓗᐊᕐᒪᖔᑦ ᐱᔪᓐᓇᕐᓂᖃᖅᐸᙱᖦᖢᑎᓪᓗ ᐃᓱᒪᓕᐅᕆᐊᒃᓴᖅ ᐱᓕᕆᔭᓂ ᖃᓄᐃᙱᒃᑲᓗᐊᕐᒪᖔᑦ. ᑭᓇᑐᐃᓐᓇᑦᑎᐊᒥᒃ ᓄᓕᐊᕈᕕᑦ ᐊᖏᖅᓯᒪᙱᑦᑐᒥᒃ, ᐊᖏᕆᐊᒃᓴᖅ ᐊᔪᖅᑐᒥᒃ, ᑕᐃᒪᓕ ᐱᕋᔭᒐᔭᖅᐳᑎᑦ.
3. ᐃᒃᐱᒋᔭᑎᒃ ᐅᒃᐱᕆᑦᑎᐊᕐᓗᒋᑦ. ᑲᑎᙵᕈᓘᔭᖅᑐᓂᒃ ᐃᖢᕆᙱᒃᑳᖓᕕᑦᓇᓂᑐᐃᓐᓇᑦᑎᐊᕐᓘᓐᓃᑦ, ᐃᒃᐱᒋᔭᐃᑦ ᐱᓪᓗᒍ ᐊᓂᖃᑦᑕᕆᑦ. ᐱᖃᓐᓇᕆᔭᕐᓂᒃ ᐊᓂᖃᑎᖃᕈᒪᖃᑦᑕᕆᑦ ᐅᕝᕙᓘᓐᓃᑦ ᑭᓇᒧᒃᑭᐊᖅ ᐅᖄᓚᕙᒡᓗᑎᑦ ᐊᐃᔭᐅᔪᒪᓗᑎᑦ.