ᓇᓕᐊᖕᓂᒃ ᐱᖃᑎᖃᕈᒪᕙᖕᓂᖅ

ᓄᓕᐊᕐᓂᖅ ᖃᓄᕈᓘᔮᓗᒃ ᐱᓕᕆᐊᖑᔪᓐᓇᕐᒪᑦ. ᖃᐅᔨᑐᐃᓐᓇᕆᐊᖃᖅᐳᑎᑦ ᐱᐅᒃᓴᕐᓂᕐᓂᒃ ᐃᓄᖕᓂᒃ ᑭᓲᓂᕕᑦ ᐊᓯᖔᖏᓐᓂᒃ ᑕᐃᒪᐃᑦᑑᒍᕕᑦ, ᐃᓄᖕᓂᒃ ᑕᐃᔭᐅᓲᖑᕗᖅ ᑭᓲᓂᖏᒃ ᐊᔾᔨᒌᙱᓪᓗᑎᒃ ᓄᓕᐊᖅᑏᒃ ᐅᕝᕙᓘᓐᓃᑦ ᖃᓄᐃᙱᑦᑐᑦ. ᖃᐅᔨᑐᐃᓐᓇᕆᐊᖃᕆᕗᑎᑦ ᐱᐅᒃᓴᕐᓂᕐᓂᒃ ᐃᓄᖕᓄᑦ ᑭᓲᓂᕕᑦ ᐊᔾᔨᒋᔭᖏᓐᓂᒃ. ᑕᐃᒪᑦᑑᒍᕕᑦ, ᐃᒪᐃᑦᑑᓂᕋᖅᑕᐅᔪᓐᓇᖅᐳᑎᑦ ᐊᖑᑎᐅᖃᑎᑐᖅᑎ ᐅᕝᕙᓘᓐᓃᑦ ᐊᕐᓇᐅᖃᑎᑐᖅᑎ. ᖃᐅᔨᑐᐃᓐᓇᕆᐊᖃᕆᕗᑎᑦ ᐱᐅᒃᓴᕐᓂᕐᓂᒃ ᑕᒪᐃᓐᓂᒃ ᑭᓲᓂᖏᑦ ᒪᓕᒡᓗᒋᑦ. ᑕᐃᒪᐃᑦᑑᒍᕕᑦ ᐃᒪᐃᑦᑑᓂᕋᖅᑕᐅᓇᔭᖅᐳᑎᑦ ᑕᒪᐃᓐᓂᒃ ᓄᓕᐊᖅᑎ.
 
ᐃᒪᓐᓇᖔᕐᓘᓐᓃᑦ ᐃᒃᐱᒍᓱᑐᐃᓐᓇᕆᐊᖃᖅᐳᑎᑦ ᑎᒥᒋᓪᓗᐊᖏᑕᕐᓂᒃ ᑎᒥᖃᕋᓱᒋᓗᑎᑦ. ᐊᕐᓇᐅᒍᕕᑦ, ᐃᓱᒪᑐᐃᓐᓇᕆᐊᖃᖅᐳᑎᑦ ᐃᓅᓚᐅᖅᓯᒪᓇᓱᒋᓗᑎᑦ ᐊᖑᑕᐅᓗᑎᑦ ᐅᕝᕙᓘᓐᓃᑦ ᐊᖑᑕᐅᒍᕕᑦ ᐃᓱᒪᑐᐃᓐᓇᕆᐊᖃᖅᐳᑎᑦ ᐊᕐᓇᐅᓚᐅᖅᓯᒪᓇᓱᒋᓗᑎᑦ. ᑕᐃᒪᓐᓇ ᐃᓱᒪᖃᑦᑕᕈᕕᑦ ᓯᐱᓂᑰᑐᐃᓐᓇᕆᐊᖃᖅᐳᑎᑦ.
 
ᑖᒃᑯᓂᖓ ᑕᐃᒎᓯᕐᓂᒃ ᑕᐃᔭᐅᖃᑦᑕᕈᒪᔪᒃᓴᐅᙱᓚᑎᑦ ᒫᓐᓇ, ᖃᓄᐃᙱᑦᑎᐊᕆᓪᓗᓂ. ᐅᑯᐊ ᑕᕝᕙ ᑕᐃᒎᓯᖅᑕᐅᔪᓐᓇᖅᑐᑦ ᐅᖃᐅᓯᐅᖃᑦᑕᖅᓯᒪᔪᑦ ᓄᓕᐊᕐᓂᕐᒥᒃ ᐊᔪᕆᖅᓱᖅᑕᐅᓂᕐᒥᒃ ᐊᒻᒪ ᑭᓲᖕᒪᖔᖅᐱᑦ- ᓇᕿᑦᑎᖃᑦᑕᕐᓂᐊᖅᐳᑎᑦ ᓇᓕᐊᖕᓂᑐᐃᓐᓇᖅ ᐅᖃᐅᓯᖅᑕᓂᒃ ᐃᓕᑦᑎᒃᑲᓐᓂᕈᒪᑐᐊᕈᕕᑦ:

ᑕᒪᐃᓐᓂᒃ ᓄᓕᐊᖅᑎ
ᐊᕐᓇᐅᖃᑎᒌᒃᑐᖅᑏᒃ
ᐊᖑᑕᐅᖃᑎᒥᓂᒃ ᐱᐅᒃᓴᖅᑐᑦ
ᐊᕐᓇᐅᖃᑎᒥᓂᒃ ᐱᐅᒃᓴᖅᑐᑦ
ᑭᓲᓂᕐᒧᑦ ᖃᓄᐃᓕᖓᔾᔪᓰᑦ
ᑭᓲᖕᒪᖔᑕ ᐃᒃᐱᒋᔭᓖᑦ ᐃᓅᑎᓪᓗᒋᓪᓘᓐᓃᑦ ᓯᐱᓚᐅᖅᓯᒪᓐᓂᖅᐸᑕ
ᑭᓲᓂᖏᑕ ᐊᔾᔨᒋᙱᑕᖏᓐᓂᒃ ᓄᓕᐊᖅᑎᑦ
ᑭᓲᓂᖏᑦᑕ ᐊᔾᔨᖏᓐᓂᒃ ᓄᓕᐊᖅᑎᑦ
ᐊᕐᓇᐅᖃᑎᑐᖅᑎ
ᖁᐃᓕᖅᑕᓇᖅᑐᖅ
ᖃᓄᐃᙱᑦᑐᖅ
ᑭᓲᓂᕐᒥᓂᒃ ᐱᐅᒃᓴᙱᑦᑐᑦ
ᑭᓲᓪᓗᑎᑦ ᐃᓅᓂᑯᑦ ᑕᐃᒪᐃᑦᑑᓇᓱᒋᙱᑦᑐᑦ ᐃᓚᖏᑦ ᐱᓚᒃᑕᐅᓪᓗᑎᑦ ᑭᓲᒋᐊᖃᕋᓱᒋᔭᒥᓄᑦ ᐊᓯᔾᔨᖅᑕᐅᓲᑦ
 
ᑕᐃᒪᓐᓇ ᐃᒃᐱᒍᓱᒃᑐᑦ ᑲᑉᐱᐊᓇᖅᑐᖅᓯᐅᓲᖑᕗᑦ ᓇᓗᓇᖅᑐᖅᓯᐅᖅᐸᒃᖢᑎᓪᓗ ᓲᖃᐃᒻᒪ ᐃᓚᖏᑦ ᐃᓄᐃᑦ ᑲᑉᐱᐊᒋᔭᖃᕐᒪᑕ ᐊᖑᑕᐅᖃᑎᑐᖅᑎᐅᔭᕆᐊᒃᓴᖅ, ᐊᕐᓇᐅᖃᑎᑐᖅᑎᐅᔭᕆᐊᒃᓴᖅ, ᑕᒪᐃᓐᓂᒃ ᐱᐅᒃᓴᕆᐊᒃᓴᖅ ᐅᕝᕙᓘᓐᓃᑦ ᑭᓲᓂᕐᒥᖕᓂᒃ ᐱᐅᒃᓴᙱᑦᑕᕆᐊᒃᓴᖅ, ᐊᒻᒪ/ᐅᕝᕙᓘᓐᓃᑦ ᐱᑦᑎᐊᖅᑕᐅᙱᑦᑐᓐᓇᕐᒪᑕ. ᐃᒃᐱᒋᔭᕐᓄᑦ ᐊᒃᓱᕈᕐᓇᖅᑐᖅᓯᐅᕈᑎᒋᓕᕈᓐᓇᕋᖕᓂ ᐊᒻᒪ ᐊᓯᖕᓄᑦ ᐅᖃᐅᓯᕆᔭᕆᐊᒃᓴᖅ ᐊᐃᓐᓈᕆᓕᕈᓐᓇᖅᖢᒍ.
 
ᑭᓯᐊᓂ, ᑭᒃᑯᓕᒫᑦᑎᐊᓂᒃ ᐃᒃᐱᒋᔭᐅᑦᑎᐊᕆᐊᖃᖅᐳᑎᑦ ᑭᓇᐅᓃᑦ ᐱᓪᓗᒍ - ᐱᓗᐊᙳᐊᖅᑐᒥᒃ ᓇᒡᓕᒃᑎᒋᔭᑎᑦ. ᖃᓄᐃᙱᑦᑎᐊᕐᒪᑦ ᐃᕝᕕᐅᒐᓗᐊᕈᕕᑦ - ᐃᓚᒋᖕᒪᒍ ᐃᓕᖕᓂᒃ ᐃᒃᐱᒋᑦᑎᐊᕐᓂᕐᒥᒃ ᓂᕈᐊᕆᐊᒃᓴᖅ. ᐃᓕᖕᓂᒃ ᖃᐅᔨᒪᑦᑎᐊᕐᓗᑎᑦ ᐱᒻᒪᕆᐅᖕᒪᑦ ᐃᓅᓯᕐᓄᑦ. ᐊᒥᓱᓂᒃ ᒪᒃᑯᒃᑐᖅᑕᖃᕐᒪᑦ ᐃᓐᓇᖅᑕᖃᖅᖢᓂᓗ ᐊᖑᑕᐅᖃᑎᒥᓂᒃ ᐱᖃᑎᓕᖕᓂᒃ, ᐊᕐᓇᐅᖃᑎᒥᓂᒃ ᐱᖃᑎᓕᖕᓂᒃ, ᑕᒪᐃᓐᓂᒃ ᐊᕐᓇᐅᒐᓗᐊᖅᐸᑕ ᐊᖑᑕᐅᒐᓗᐊᖅᐸᑕ ᐱᖃᑎᖃᕈᓐᓇᖅᑐᓂᒃ ᐅᕝᕙᓘᓐᓃᑦ ᐃᖕᒥᖕᓂᒃ ᐃᖢᕆᙱᑐᖃᐅᖅᖢᓂ ᑭᓲᓂᕐᒥᖕᓂᒃ. ᐅᕝᕙᑦᑕᐅᖅ ᐅᑯᐊ ᑕᑯᔪᒥᓇᑦᑎᐊᖅᑐᑦ ᐃᑭᐊᖅᑭᕕᒃᑎᒍᑦ ᑐᑭᓯᒋᐊᒐᒃᓴᖃᐅᑦᑎᐊᖅᖢᑎᑦ ᓄᓕᐊᕐᓂᕐᒧᑦ ᐊᔪᕆᖅᓲᔾᔨᔾᔪᑎᒃᓴᑦ.