ᐋᒃᑳᖅᓯᓂᖅ

ᐊᔭᐅᖅᑕᐅᓗᐊᕐᓂᐊᓗᒃ ᐊᒃᓱᕈᕐᓇᕐᔪᐊᓲᖑᖕᒪᑦ, ᐱᓗᐊᙳᐊᖅᑐᒥᒃ ᓄᓕᐊᕐᓂᐅᑉ ᒥᓵᓅᖓᑐᐊᕌᖓᑦ.

ᐃᓚᖏᑦ ᒪᒃᑯᒃᑐᑦ ᓄᓕᐅᓂᒍᒪᓕᖅᐸᒃᐳᑦ ᓲᖃᐃᒻᒪ ᐱᖃᓐᓇᕆᔭᖏᑕ ᐱᐅᔪᐊᓘᓂᕋᖅᐸᖕᒪᒍ. ᐃᓚᖏᑦᑕᐅᖅ ᐊᔭᐅᖅᑕᐅᓗᐊᕆᓲᖑᒋᓪᓗᑎᑦ ᐱᖃᑎᒋᔭᒥᓄᑦ ᐊᓂᓯᒪᓚᐅᑲᑐᐃᓐᓇᖅᑎᓪᓗᒋᑦ. ᓱᓕᑦᑕᐅᖅ ᐊᓯᖏᑦ ᐊᔪᕐᓇᙱᓈᖅᓯᓂᖅᓴᐅᓲᖑᕗᑦ ᑯᔭᒃᑕᐅᑐᐃᓐᓇᒥᐊᕐᓗᑎᑦ ᑐᓴᖅᑎᑦᑎᓇᓲᔭᕈᓐᓃᕐᓗᑎᑦ ᖃᓄᐃᒻᒪᑦ ᑯᔭᒃᑕᐅᔪᒪᙱᒻᒪᖔᑕ. ᐃᓚᖏᑦ ᒪᒃᑯᒃᑐᑦ ᓇᒡᓕᒌᖃᑦᑕᐅᑎᑦᑎᐊᓗᐊᓕᕐᓂᑯᒧᑦ ᐅᒃᐱᕆᔭᖃᖅᐸᓵᓕᖅᐸᒃᖢᑎᑦ ᑯᔭᒃᐸᒡᓗᓂ ᑭᓯᐊᓂ ᓇᒡᓕᒃᑎᒌᑦᑎᐊᕈᓐᓇᕋᓱᒋᓐᓈᓕᖅᖢᑎᑦ.

ᐅᑯᐊ ᐃᓱᒪᒋᔭᒃᓴᐅᔪᓐᓇᖅᑐᑦ ᐊᔭᐅᖅᑕᐅᓗᐊᕌᓗᓚᐅᙱᓐᓂᕐᓂᒃ ᐃᓱᒪᓕᐅᖅᑕᐅᓗᑎᑦ:
 
ᑭᒃᑯᓕᒫᑦᑎᐊᑦ ᓇᓕᒧᒋᔭᑎᑦ ᓄᓕᐅᓂᒃᑐᐃᓐᓈᓘᙱᑦᑐᑦ. ᐃᒃᐱᒋᔭᖃᕋᓗᐊᕌᖓᕕᓪᓘᓐᓃᑦ ᑭᒃᑯᓕᒫᑦᑎᐊᑦ "ᑕᐃᒪᐃᓕᐅᖅᑎᐅᓂᖏᓐᓂᒃ," ᐱᒻᒪᕆᐅᕗᖅ ᐅᔾᔨᕈᓱᒋᐊᒃᓴᖅ ᑕᒪᓐᓇ ᓱᓕᙱᓐᓂᖓᓂ. ᐃᓄᐃᑦ ᐅᖃᐅᓯᖃᕋᔪᖕᒪᑕ ᓄᓕᐊᕐᓂᐅᑉ ᒥᓵᓄᑦ ᓲᕐᓗ ᐃᓕᖅᑯᓯᐅᓪᓗᓂ, ᑭᓯᐊᓂᓕ ᑕᒪᓐᓇ ᑐᑭᖃᙱᒻᒪᑦ ᓄᓕᐊᖅᑎᐅᖃᑎᒌᓪᓚᑦᑖᕐᒪᖔᑕ.

Hollywood-ᒥ ᐊᑕᖐᓪᓗᑎᑦ ᐅᓂᒃᑲᐅᓯᖃᖅᓯᒪᙱᒻᒪᑕ. ᓄᓕᐊᖅᐸᒃᑐᐃᓐᓈᓘᒐᑦᑕ ᐃᓕᖅᑯᓯᖃᖃᑎᒌᙱᖦᖤᕋᓗᐊᕌᖓᑦᑕ. ᑕᑯᓲᕆᔭᕗᑦ ᑕᓚᕖᓴᒃᑯᑦ, ᑕᕐᕆᔭᐅᑎᑎᒍᑦ, ᐃᓛᓐᓂᒃᑯᓪᓗ ᑏᕖᒃᑯᑦ ᒪᓂᓴᐅᑎᖏᑦᑎᒍᑦ ᐅᖃᓕᒫᒐᖅᑎᒍᓪᓗ. ᑕᒪᓐᓇ ᑕᕝᕙ ᐃᓚᒋᕙᐅᒃ ᐱᔾᔪᑎᑦᑕ ᖃᓄᐃᒻᒪ ᐊᓕᐊᓇᐃᒋᔭᖃᕐᒪᖔᑦᑕ ᑕᒪᒃᑯᓂᖓ ᐊᒃᓱᒻᒪᕆᐊᓗᒃ. ᐳᐃᒍᖅᑕᐃᓕᑐᐃᓐᓇᕐᓗᓯ: ᑕᕐᕆᔭᐅᑎᓃᑦᑐᑦ, ᑕᓚᕖᓴᓃᑦᑐᑦ, ᑕᓚᕖᓴᑎᒍᓪᓗ ᒪᓂᓴᐅᑎᓃᑐᑦ ᐱᙳᐊᖅᑎᑐᐃᓐᓇᐅᓲᖑᖕᒪᑕ. ᖁᐱᕐᕆᓲᖑᙱᑦᑐᑦ ᐅᕝᕙᓘᓐᓃᑦ ᐸᕐᓇᒃᓯᒪᓗᑎᑦ ᓯᖓᐃᓕᓲᖑᙱᑦᑐᑦ. ᐃᕝᕕᓪᓕ ᑭᓯᒥ ᑕᐃᒪᐃᑦᑐᓐᓇᖅᐳᑎᑦ.

ᖃᐅᔨᒪᓂᖅ ᖃᓄᖅ ᐃᓕᖕᓂᒃ ᑲᒪᑦᑎᐊᕈᓐᓇᕐᒪᖔᖅᐱᑦ ᐱᕐᔪᐊᖑᓂᖅᐹᖑᕗᖅ ᐊᔭᐅᖅᑕᐅᓚᐅᙱᕐᓂᕐᓂᒃ ᑲᒪᔪᓐᓇᕐᓂᕐᒥᒃ. ᖃᓄᐃᙱᑦᑎᐊᕐᒪᑦ ᒪᒃᑯᖕᓂᐊᓐᓄᓯ ᖁᕕᐊᒋᔭᒃᑯᑦ ᐊᑐᕋᓗᐊᕈᔅᓯᐅᒃ ᐊᒻᒪᓗ ᖃᓄᓗᒃᑖᑦᑎᐊᖅ ᖁᕕᐊᒋᔭᐅᓲᑦ ᐊᑐᖅᑕᐅᖃᑦᑕᖅᑎᓪᓗᒋᑦ. ᖃᓄᐃᙱᑦᑎᐊᖅᑐᖅ ᐃᓕᖕᓂᒃ ᐃᒃᐱᒋᓗᑎᑦ ᐅᖃᕈᓐᓇᖅᐸᓵᕐᓗᑎᓪᓘᓐᓃᑦ ᐃᒪᓐᓇ, "ᐋᒃᑲ, ᓄᓕᐊᖅᑎᐅᔪᒪᓕᙱᓐᓇᒪ ᓱᓕ." ᐅᑯᐊ ᑕᕝᕙ ᐱᓕᕆᐊᕆᔪᓐᓇᖅᑕᓯ ᐊᔭᐅᖅᑕᐅᓂᐅᕙᒃᑐᑦ ᐊᓂᓯᒪᖃᑎᖃᓚᐅᑲᑐᐃᓐᓇᕐᓗᓯᓘᓐᓃᑦ ᐊᔭᐅᖅᑕᐅᓗᐊᓕᕐᓂᕈᔅᓯ:

• ᐱᖃᓐᓇᕆᔭᑎᑦ ᐅᒃᐱᕆᔭᓖᑦ ᓄᓕᐅᓂᙱᒃᑲᓗᐊᖅᐸᑕ ᖃᓄᐃᒃᓴᙱᑦᑐᑦ ᒫᓐᓇ ᖃᓄᐃᙱᑦᑎᐊᕐᒪᑦ.
• ᐊᓃᖃᑎᖃᖅᐸᒡᓗᑎᑦ ᐃᓄᒋᐊᕌᕐᔪᒃᑐᓂᒃ ᐃᓄᑑᖃᑎᒋᙱᓪᓗᒍ ᐊᓂᖃᑎᒋᓚᐅᑲᒃᓯᒪᔭᑐᐊᑦ.
• ᐱᖃᓐᓇᕆᔭᑎᑦ ᑕᑯᔭᐅᑎᑉᐸᒡᓗᒋᑦ ᐊᖓᔪᖅᑳᕐᓄᑦ.
• ᐱᖃᓐᓇᕆᔭᑎᑦ ᖃᐃᖁᕙᒡᓗᓯᐅᒃ ᐃᓕᔅᓯᓐᓄᑦ.
• ᐱᖃᓐᓇᕆᔭᓯ ᐊᔭᐅᖅᑕᐅᓗᐊᖃᑦᑕᖅᑐᑦ ᓄᓕᐊᖅᑕᐅᔪᒪᓗᑎᑦ ᑕᑉᐱᖅᓱᖅᐸᒡᓗᒋᑦ.
• ᐃᓱᒪᕙᒡᓗᓯ ᖃᓄᖅ ᐅᖃᕋᔭᕐᒪᖔᔅᓯ ᑭᓇᒧᒃᑭᐊᖅ ᑎᓕᐅᖅᑕᐅᓗᐊᕌᓗᓚᐅᙱᓐᓂᔅᓯᓐᓂᒃ.
• ᑮᓇᐅᔭᓕᔭᐃᓐᓇᐅᔭᕐᓗᓯ ᐃᖢᕐᕆᔪᓐᓃᑐᐊᕌᖓᔅᓯ ᐅᖃᓗᒍᓐᓇᑎᒃᓴᔅᓯᓐᓂᒃ ᑖᒃᓯᕈᓐᓇᐅᑎᒃᓴᔅᓯᓐᓂᒡᓘᓐᓃᑦ.
• ᐅᐸᓗᖓᐃᖅᓯᒪᐃᓐᓇᐅᔭᕐᓗᓯ ᐊᓈᓇᔅᓯᓐᓄᑦ, ᐊᑖᑕᔅᓯᓐᓄᑦ ᐱᖃᓐᓇᕆᔭᔅᓯᓐᓄᓪᓘᓐᓃᑦ ᐅᖃᓗᒋᐊᖃᕐᒪᖔᑦ ᐊᐃᔭᐅᔪᒪᓗᓯ ᐊᓂᖃᑎᒋᓚᐅᑲᒃᓯᒪᔭᔅᓯᓐᓂ ᕿᒪᕉᑎᔭᕆᐊᖃᖅᑰᔨᓕᕌᖓᔅᓯ.
• ᐃᒃᐱᒋᔭᖃᖅᐸᖕᓂᐊᙱᓚᓯ "ᐊᑭᓖᔭᕆᐊᖃᕐᒪᖔᑦ" ᓄᓕᐊᕐᓂᖅᑎᒍᑦ ᐊᑭᓕᐅᑎᒋᓗᒍ ᐊᓂᖃᑎᒋᔭᐅᓚᐅᑲᒃᓯᒪᓂᔅᓯᓐᓄᑦ ᑐᓐᓂᖅᑯᓯᐊᒧᓪᓘᓐᓃᑦ.
• "ᐋᒃᑳᖅᐸᒡᓗᓯ" ᑐᑭᓯᓇᖅᓯᑎᑦᑎᐊᕐᓗᒍᓗ "ᐋᒃᑳᓪᓚᑦᑖᕐᓂᔅᓯᓐᓂᒃ" ᑕᐃᒪᓐᓇ ᐃᒃᐱᒋᔭᖃᑐᐊᕌᖓᔅᓯ.

ᓱᐴᖅᑐᒐᖅᓯᒪᓪᓗᓂ ᐃᒥᐊᓗᒃᓯᒪᓪᓗᓂᓘᓐᓃᑦ ᐃᓱᒪᑦᑎᐊᕐᓇᙱᒻᒪᑦ, ᐱᓗᐊᙳᐊᖅᑐᒥᒃ ᓄᓕᐊᕐᓂᐅᑉ ᒥᒃᓵᓄᑦ ᑐᕌᖓᓂᐊᑐᐊᖅᐸᑦ. ᓱᐴᖅᑐᒐᕐᓄᑦ ᐃᒥᐊᓗᖕᓄᓪᓗ ᐊᖓᔮᖅᖢᓂ ᐊᔪᕐᓇᙱᓐᓂᖅᓴᐅᓲᖑᖕᒪᑦ ᐃᓱᒪᓕᐅᕆᔭᕆᐊᒃᓴᖅ ᑭᖑᓂᐊᒍᑦ ᐊᐃᑦᑖᕆᓕᕈᓐᓇᖅᑕᕐᓂᒃ. ᐊᐃᑦᑖᖑᓗᐊᙳᐊᓲᖑᕗᖅ, ᐃᓚᖏᑦ ᐃᓄᐃᑦ ᐃᒥᐊᓗᒃᓯᒪᓪᓗᑎᑦ ᓱᐴᖅᑐᒐᖅᓯᒪᓪᓗᑎᓪᓘᓐᓃᑦ ᑎᓕᐅᕆᓕᕌᖓᑕ ᓄᓕᐊᖃᑎᖃᕈᒪᓪᓗᑎᑦ ᐃᓕᔅᓯᓐᓂᒃ.

 
ᐱᐅᓯᐅᔪᓐᓇᖅᑐᑦ ᐋᒃᑳᕈᓯᕐᒧᑦ

ᐊᔪᕈᓐᓃᖅᓴᖃᑦᑕᕐᓂᖅ ᖃᓄᖅ ᐅᖃᕈᒪᓇᔭᕆᐊᒃᓴᖅ ᒫᓐᓇ ᐊᔪᕐᓇᙱᓐᓈᖅᓯᓐᓇᕐᓂᖅᓴᐅᓐᓇᖅᐳᖅ ᖃᓄᖅ ᐅᖃᕆᐊᖃᕐᒪᖔᖅᐱᑦ ᓄᓕᐅᓂᓗᐊᓕᓚᐅᙱᓐᓂᔅᓯᓐᓂᒃ. ᐱᖃᑏᑦ ᐊᐱᕆᒃᐸᑦ ᖃᓄᐃᓕᐅᖁᓗᓂᑎᑦ ᐱᑐᐃᓐᓇᕆᐊᖃᓕᖅᓯᒪᙱᓪᓗᑎᓪᓗ, ᖃᐅᔨᒪᓇᔭᖅᐳᑎᑦ ᖃᓄᖅ ᐅᖃᕐᓂᐊᕐᒪᖔᖅᐱᑦ ᖃᓄᕐᓗ ᐅᖃᕐᓂᐊᕐᒪᖔᕐᓂ. ᐃᑲᔫᑕᐅᔪᓐᓇᕋᔭᕐᒥᔪᖅ ᐱᖃᑏᑦ ᑐᓴᐅᒪᔭᕐᓂᒃ ᓱᓕᙱᓐᓂᕋᐃᓇᓱᒃᑎᓪᓗᒍ. ᐱᒻᒪᕆᐅᖕᒪᑦ ᐱᖃᑏᑦ ᐃᒃᐱᒍᓱᑦᑎᐊᕆᐊᖃᕐᓂᖓᓂᒃ ᐋᒃᑳᓚᑎᓪᓗᑎᑦ. ᐱᖃᑏᑦ ᓄᖅᑲᙱᑐᐊᖅᐸᑦ, ᐱᕋᔭᖕᓂᐅᓇᔭᕐᒪᑦ.

ᐅᑯᐊ ᑕᕝᕙ ᐅᖃᖅᑕᐅᖃᑦᑕᖅᓯᒪᔪᑦ ᒪᒃᑯᒃᑐᓂᒃ ᑐᓴᖅᑕᐅᒐᔪᒃᑐᑦ. ᐃᓚᖏᑦ ᑐᕌᖓᑎᑕᐅᕙᒃᐳᑦ ᓴᒡᓗᕿᑦᑎᓂᕐᒧᑦ ᐊᐃᑉᐸᖓᓄᑦ ᐱᑐᐃᓐᓇᕆᐊᖃᙱᑎᓪᓗᒋᑦ ᐱᓕᖅᑎᑦᑎᓂᕐᒧᑦ. ᐱᖃᑏᑦ ᐊᑖᓂ ᑎᑎᕋᖅᓯᒪᔪᑦ ᒥᒃᓯᖏᓐᓂᒃ ᐅᖃᐅᓯᖃᑐᐊᖅᐸᑕ, ᐊᐱᕆᕙᒡᓗᓯᐅᒃ ᐃᒃᐱᒍᓱᑦᑎᐊᖁᓗᒋᑦ ᐃᓕᖕᓂᒃ ᑭᐅᔾᔪᑎᒋᕙᒡᓗᒋᑦ ᐃᒪᓐᓇ ᐅᖃᕈᒪᒐᓗᐊᕐᓗᑎᑦ "ᒫᓐᓇᐅᙱᑦᑐᖅ":

• "ᓇᒡᓕᒋᓚᐅᕈᕕᖓ ᑕᐃᒪᐃᓐᓇᔭᓚᐅᖅᐳᑎᑦ."
  ᑭᐅᔾᔪᑎ: "ᓇᒡᓕᒃᑎᒌᖕᓂᑦᑎᓐᓂᒃ ᖃᐅᔨᖃᑦᑕᐅᑎᔪᓐᓇᖅᑐᒍᒃ ᐊᓯᖏᓐᓂᒃ ᐱᓕᕆᖔᕐᓗᓄᒃ. ᐱᑐᐃᓐᓇᕆᐊᖃᓕᙱᓐᓇᒪ ᓱᓕ."

• "ᐃᓛᒃ, ᓇᒡᓕᒋᒐᒃᑭᑦ. ᓇᒡᓕᒋᔭᖃᕌᖓᕕᑦ, ᑕᕝᕙᒻᒪᕆᒡᓕ ᐱᔭᒃᓴᑐᐊᖅ."
  ᑭᐅᔾᔪᑎ: "ᓇᒡᓕᒋᓪᓚᑦᑖᕈᕕᖓ ᐃᒃᐱᒋᔭᒃᑲ ᐃᒃᐱᒋᖃᑕᐅᓂᐊᕐᒥᔭᑎᑦ ᐱᔪᓐᓇᕐᓂᕋᓗ ᐋᒃᑳᓚᑎᓪᓗᖓ."

• "ᑭᒃᑯᓕᒫᑦᑎᐊᓂᒃ ᐊᑐᖅᑕᐅᖕᒪᑦ. ᖃᓄᐃᒻᒪᓪᓕ ᐱᒻᒪᕆᐅᓱᕆᕕᑦ?"
  ᑭᐅᔾᔪᑎ: "ᑭᒃᑯᓕᒫᑦᑎᐊᖑᙱᑦᑐᖅ. ᐅᕙᖓᐅᙱᑦᑐᖅ. ᐱᒻᒪᕆᐅᒋᒐᒃᑯ ᐅᑕᖅᑭᓂᖅ ᑭᓯᐊᓂ ᖃᐅᔨᒪᑦᑎᐊᓕᕈᒪ ᐱᑐᐃᓐᓇᕆᐊᖃᓕᖅᑐᖓ ᑕᕝᕙᒻᒪᕆᐅᓇᔭᖅᐳᖅ."

• "ᐱᔭᕆᐊᖃᕋᒃᑭᑦ, ᒫᓐᓇ ᒫᓐᓇ ᐱᔭᕆᐊᖃᕋᒃᑭᑦ."
  ᑭᐅᔾᔪᑎ: "ᐅᑕᖅᑭᔪᓐᓇᕈᒪ, ᐅᑕᖅᑭᔪᓐᓇᕆᕗᑎᑦᑕᐅᖅ."

• "ᐱᖃᑎᒋᓚᐅᖅᓯᒪᔭᓪᓖᓐᓇ (ᑭᐊᑭᐊᖅ ᐊᑎᖓ ᑕᐃᓗᒍ). ᖃᓄᐃᓗᐊᕋᒪᓕ? ᐱᐅᓂᖅᓴᐅᓇᓱᒋᕕᑦ ᐅᕙᓐᓂᒃ?"
  ᑭᐅᔾᔪᑎ: "ᐅᖃᐅᓯᖃᖅᐸᙱᓐᓇᒪ ᐱᖃᑎᒋᕙᒃᑕᕐᒪ ᐊᓯᖏᓐᓂᒃ ᐃᓱᒪᓕᐅᕆᔪᓐᓇᖅᖢᖓᓗ ᖃᖓᒃᑰᕈᓐᓇᕐᒪᖔᑦ ᓄᓕᐊᕈᒪᒍᒪᓘᓐᓃᑦ. ᐱᔾᔪᑕᐅᙱᑦᑎᐊᖅᑐᑎᑦ."

• "ᐱᔪᒪᙱᒃᑯᕕᑦ, ᐊᓯᖕᓂᒃ ᕿᓂᕈᓐᓇᖅᑐᖓ ᐱᔪᓐᓇᖅᑐᒥᒃ."
  ᑭᐅᔾᔪᑎ: "ᑕᐃᒪᓐᓇ ᑕᐅᑐᖕᓂᐊᕈᕕᖓ, ᐃᓱᒪᖅᓱᖅᑐᑎᑦ ᐊᓯᖕᓂ ᕿᓂᕈᓐᓇᖅᑐᑎᑦ. ᐱᑐᐃᓐᓇᕆᐊᖃᓕᙱᑲᓚᐅᕋᒪᓕ."

 
ᐅᑯᐊᑦᑕᐅᖅ ᐊᓯᖏᑦ ᐅᖃᖅᑕᐅᖃᑦᑕᖅᓯᒪᔪᑦ ᑎᓕᐅᕆᔾᔪᑕᐅᓇᓱᒃᐸᒃᖢᑎᑦ ᐱᖃᑎᒥᓂᒃ ᐊᑦᑕᕐᓇᖅᑐᒦᓐᓇᖅᑐᑦ, ᓴᐳᑎᓯᒪᙱᓪᓗᑎᑦ ᓄᓕᐊᕐᓂᐅᔪᑦ. ᐱᖃᑏᑦ ᐃᓕᖕᓂᒃ ᐃᒃᐱᒍᓱᑦᑎᐊᕆᐊᖃᕐᒪᑦ ᖃᓄᖅ ᐃᒃᐱᒋᔭᖃᕐᒪᖔᖅᐱᑦ, ᐱᓗᐊᙳᐊᖅᑐᒥᒃ ᐃᓕᔅᓯᓐᓂᒃ ᓴᐳᑎᓯᒪᙱᓪᓗᓯ ᓄᓕᐊᕐᓂᐊᑐᕈᔅᓯᒃ.

• "ᐃᓱᒫᓗᙱᓪᓗᑎᑦ. ᑕᐃᒪᐃᑦᑐᓐᓃᓛᕐᒥᔪᖓ." ᑕᐃᒪᓐᓇ ᐅᖃᖅᑐᖃᖅᑎᓪᓗᒍ ᐅᒃᐱᕆᑦᑕᐃᓕᑦᑎᐊᖅᓯᐅᒃ. ᖁᐱᕐᕆᔪᓐᓇᖅᐳᑎᑦ ᓯᖓᐃᓕᕈᓐᓇᖅᐳᑎᓪᓘᓐᓃᑦ ᐊᖑᑎᒋᔭᐃᑦ ᒪᕿᓚᐅᙱᑎᓪᓗᒍ. ᓯᖓᐃᓕᕈᓐᓇᖅᐳᑎᓪᓘᓐᓃᑦ ᒪᕿ ᐅᑦᑑᑉ ᖃᓂᒋᔮᓃᑐᐃᓐᓇᕐᓗᓂ ᐃᓗᐊᓃᙱᒃᑲᓗᐊᕐᓗᓂ.
  ᑭᐅᔾᔪᑎ: "ᐅᕙᓐᓄᓪᓕ ᐊᑑᑎᖃᙱᑦᑐᖅ. ᐅᓲᑉ ᐴᖓᓂᒃ ᐊᑐᔾᔮᙱᒃᑯᕕᑦ ᐊᑦᑕᕐᓇᖅᑐᒦᖏᓐᓇᔭᒃᑲᒪ. ᐃᒪᓐᓇ ᑭᓯᐊᓂ ᐅᓲᑉ ᐴᖓᓂᒃ ᐊᑐᕐᓗᑎᑦ ᐊᑐᔾᔮᙱᑐᐊᕈᕕᑦ ᑯᔭᔾᔮᙱᑦᑐᒍᒃ."

• "ᐅᓲᑉ ᐴᖏᓐᓂᒃ ᑎᒥᒐ ᐱᐅᒃᓴᙱᒻᒪᑦ."

ᑭᐅᔾᔪᑎ: "ᒪᕐᕈᐃᓕᖅᑲᖓᔪᓂᒃ ᐅᓲᑉ ᐴᖏᓐᓂᒃ ᐱᑕᖃᕐᒪᑦ ᐃᓚᖏᑦ ᓴᕋᓕᖅᓯᒪᕙᒌᖅᑐᑦ ᐃᔾᔪᓂᖅᓴᐃᑦ ᐅᓲᑉ ᐴᖏᑦ ᐃᓚᖏᓪᓗ ᑕᐃᒪᐃᑦᑑᙱᖦᖢᑎᑦ. ᑭᒃᑯᓕᒫᑦᑎᐊᑦ ᑕᒪᐃᓐᓄ ᑖᒃᑯᓄᖓ ᑎᒥᖏᑦᑎᒍᑦ ᐱᐅᒃᓴᙱᑦᑐᖅᑕᖃᙱᑦᑐᖅ. ᐱᔭᕆᐊᖃᕐᓂᐊᖅᑐᑎᓪᓕ ᑎᒥᕕᑦ ᐱᐅᒋᔭᖓᓂᒃ. ᐅᑕᖅᑭᔪᓐᓇᖅᑐᖓ."

• "ᐱᖃᑎᒌᑦ ᐊᓯᓐᓂᐊᖅᑎᐅᙱᑦᑐᑦ ᐅᓲᑉ ᐴᖏᓐᓂᒃ ᐊᑐᓲᖑᙱᒻᒪᑕ."
  ᑭᐅᔾᔪᑎ: "ᐊᑦᑕᕐᓇᕐᓂᕐᓗᓂ ᐊᑐᕈᒪᙱᑕᕋ. ᑕᒪᓐᓄᒃ ᖃᐅᔨᓴᖅᑕᐅᖅᑳᕆᐊᖃᕋᓐᓄᒃ ᖁᐱᕐᕆᓯᒪᙱᒃᑲᓗᐊᕐᒪᖔᑦᑎᓐᓄ ᐊᒻᒪᓗ ᐊᓯᓐᓂᒃ ᓄᓕᐊᖅᑳᓚᐅᙱᑐᐊᕈᕕᑦ ᑭᓯᐊᓂ."

• "ᑎᒃᓴᓕᖅᑎᕕᒡᔪᐊᓵᕋᕕᖓ ᐃᒡᔫᒃᑲᒃ ᐋᓐᓂᐊᖅᐸᓵᓕᕐᒪᑎᒃ. ᑯᔭᙱᑐᐊᕈᕕᖓ ᒫᓐᓇ, ᑎᒥᒐ ᐃᓕᙵᓂᐊᓕᖅᑐᖅ. "
  ᑭᐅᔾᔪᑎ: "ᐊᒃᓱᒻᒪᕆᐊᓗᒃ ᓱᓕᙱᑦᑐᖅ. ᐃᓗᐊᖅᓴᐃᔨᒥᒃ ᐅᖃᓪᓚᖃᑎᖃᖅᑲᐅᔪᖓ."

• "ᖁᐱᕐᕆᓯᒪᙱᓐᓇᒪ ᓯᖓᐃᓕᕐᓇᙱᑦᑐᓂᒡᓗ ᐄᔭᒐᖅᖢᑎᑦ. ᑕᐃᒪᐃᓐᓂᖓᓄᑦ ᐅᓲᑉ ᐴᖏᓐᓂᒃ ᐊᑐᕆᐊᖃᙱᑦᑐᒍᒃ"
  ᑭᐅᔾᔪᑎ: "ᖁᐱᕐᕆᓯᒪᙱᒻᒪᖔᖅᐱᑦ ᖃᐅᔨᔪᓐᓇᖅᑕᑐᐊᕗᑦ ᖃᐅᔨᓴᖅᑕᐅᓗᓄ ᑭᓯᐊᓂ. ᑕᑯᑐᐃᓐᓇᕐᓗᑎᑦ ᖃᐅᔨᔪᓐᓇᙱᓐᓇᕕᑦ. ᓇᓚᐅᑦᑖᑐᐃᓐᓇᕐᓗᓂ ᐱᓕᕆᔪᒪᙱᑦᑐᖓ ᑕᐃᒪᐃᖃᑕᐅᓪᓗᐊᕐᒥᔪᑎᑦ."

• "ᐊᐃᑦᑖ, ᐅᓲᑉ ᐴᖓᓂᒃ ᓇᒃᓴᕐᓂᐊᖅᖢᖓ ᐳᐃᒍᕐᓂᖅᐳᖓ."
  ᑭᐅᔾᔪᑎ: "ᐅᓲᑉ ᐴᖓᓂᒃ ᐊᑐᖅᑐᖃᙱᑎᓪᓗᒍ ᓄᓕᐊᖅᑕᐅᓲᖑᙱᑦᑐᖓ. ᑕᐃᒪᐃᒻᒪᑦ, ᐅᓐᓅᔪᖅ ᑯᔭᔾᔮᙱᑦᑐᒍᒃ. ᑭᓯᐊᓂᑦᑕᐅᖅ ᐊᓯᖏᑦᑎᒍᑦ ᐱᓕᕆᔾᔪᓯᖅᑎᒍᑦ ᐊᓕᐊᓇᐃᒍᓱᖃᑦᑕᐅᑎᔪᓐᓇᖅᑐᒍᒃ."

• "ᓄᓕᐊᕈᒪᔪᓐᓃᑦᑎᐊᕐᓇᕆᔭᕋ."
  ᐅᖃᖅᐸᒡᓗᓂ ᓴᐳᔾᔨᔾᔪᑎᓂᒃ ᐊᑐᙱᖦᖢᓂ ᓄᓕᐊᕐᓂᖅ ᓄᓕᐊᕈᒪᔪᓐᓃᑦᑎᐊᕐᓇᕐᓂᕋᕐᓗᒍ. ᑕᐅᕗᖓᓕᒫᖅ.

• "ᐃᖢᕐᕆᙱᔾᔪᑎᖃᖅᖢᑎᑦ ᑭᓱᑖᕐᓂᐊᕋᓱᒋᒐᕕᑦ?"
  ᐃᓛᓐᓂᒃᑯᑦ ᐃᓄᐃᑦ ᖃᐅᔨᒪᙱᑦᑎᐊᓲᖑᖕᒪᑕ ᓱᕈᕈᔾᔨᓯᒪᒐᓗᐊᕐᒪᖔᑕ, ᑕᐃᒪᐃᓐᓂᖓᓄᑦ ᐅᔾᔨᖅᓱᖅᑎᐊᕆᐊᖃᕐᓇᖅᑐᖅ.

• "ᐅᓲᑉ ᐴᖓᓂᒃ ᐊᑐᕋᓱᒃᑲᓗᐊᕈᓐᓄᒃ ᖁᕕᐊᒋᔾᔮᙱᑕᕋ."
  ᐅᖃᑐᐃᓐᓇᖅᐸᒡᓗᑎᑦ ᖁᕕᐊᒋᔭᖃᙱᓐᓂᕐᓂᒃ ᓄᓕᐊᕐᓂᕐᒥᒃ ᑭᓯᐊᓂ ᐊᑦᑕᕐᓇᙱᑐᐊᕌᖓᑦ.

 
ᐳᐃᒍᖅᑕᐃᓕᒋᔅᓯ ᐋᒃᑲ ᑐᑭᖃᕐᓂᖓᓂᒃ ᐋᒃᑳᕐᓂᕐᒥᒃ. ᐃᓕᔅᓯᓐᓂᒃ ᐃᒃᐱᒋᑦᑎᐊᖅᐸᒡᓗᓯ ᓈᓚᖃᑦᑕᐅᑎᕙᒡᓗᓯᒃ ᐅᔾᔨᖅᓱᑦᑎᐊᖅᐸᒡᓗᓯᓗ ᐃᖢᕐᕆᔪᐃᓐᓇᐅᒐᓗᐊᕐᒪᖔᔅᓯᒃ ᐱᕙᓪᓕᐊᔭᔅᓯᓐᓂᒃ.