ᐃᒻᒥᒥᒃ ᐱᓕᕆᓗᓂ ᒪᕿᑎᓐᓂᖅ ᐃᒪᐃᓕᐅᕐᓂᐅᕗᖅ ᐃᒻᒥᒥᒃ ᐊᒃᑐᑲᑕᒡᓗᓂ ᐊᒃᓴᓕᑲᑕᒡᓗᓂᓘᓐᓃᑦ ᑎᒥᐅᑉ ᐃᒃᐱᖕᓂᐊᔾᔪᑎᖏᓐᓂᒃ ᑎᒃᓴᓕᕐᓇᖅᑐᓂᒃ. ᖃᐅᔨᔾᔪᑎᒋᔪᓐᓇᕋᑦᑎᒍᑦ ᖃᓄᐃᓕᐅᕐᓗᓂ ᐊᓕᐊᓇᐃᒋᔭᖃᕐᒪᖔᑦᑕ ᓄᓕᐊᕐᓂᒃᑯᑦ.

 ᐃᓚᖏᓐᓄᑦ ᓄᑲᑉᐱᐊᕐᔪᐊᓄᑦ ᓂᕕᐊᖅᓵᕐᔪᐊᓄᓪᓗ, ᓯᕗᓪᓕᖅᐹᒥᒃ ᑎᒃᓴᑲᑕᒃᐸᓪᓕᐊᓕᕌᖓᑕ ᖃᐅᔨᔾᔪᑎᒋᔪᓐᓇᖃᑦᑕᖅᑕᖏᑦ ᐃᒻᒥᓂᒃ ᐱᓕᕆᓪᓗᑎᑦ ᒪᕿᔪᓐᓇᕐᓂᕐᒥᒃ. ᖃᐅᔨᓴᕈᑕᐅᖃᑦᑕᖅᓯᒪᔪᑦ ᑐᓴᕐᓇᖅᐳᑦ ᐅᑭᐅᖃᓕᕌᖓᑕ 18-ᓂᒃ ᐊᑕᖏᑦᑎᐊᐸᓗᒃᖢᑎᑦ ᓄᑲᑉᐱᐊᕐᔪᐊᑦ ᐊᒻᒪᓗ ᐊᕝᕙᖓᑕ ᐅᖓᑖᓃᑦᑐᑦ ᓂᕕᐊᖅᓵᕐᔪᐊᑦ ᐃᒻᒥᓂᒃ ᐱᓕᕆᓪᓗᑎᒃ ᒪᕿᖃᑦᑕᖅᓯᒪᕗᑦ. ᐊᒥᓱᒻᒪᕇᑦ ᒪᒃᑯᒃᑐᑦ ᖃᐅᔨᖃᑦᑕᖅᓯᒪᕗᑦ ᐃᒻᒥᓂᒃ ᐱᓕᕆᓪᓗᑎᒃ ᒪᕿᔪᓐᓇᕐᓂᕐᒥᒃ, ᐊᓯᖏᑦᑕᐅᖅ ᖃᐅᔨᕙᒃᑭᓪᓗᑎᑦ ᐱᖃᓐᓇᕆᔭᒥᓂᒃ ᐅᖃᒪᔭᖃᑎᖃᓕᕌᖓᑕ. ᐃᓄᓕᒫᕌᓗᐃᑦ ᐱᐅᒃᓴᖅᑐᐃᓐᓇᐅᙱᓚᑦ ᐃᒻᒥᒥᒃ ᐱᓕᕆᓗᓂ ᒪᕿᖃᑦᑕᕐᓂᐅᑉ ᒥᒃᓵᓄᑦ ᓱᓕ ᒫᓐᓇᒧᑦ ᑎᑭᐅᑎᓪᓗᑎᑦ ᐃᓱᒪᒋᔭᐅᖃᑦᑕᖅᐳᖅ "ᐱᐅᙱᑦᑐᓕᓂᐅᓂᖓᓂᒃ" ᐃᓚᖏᑦᑎᒍᑦ ᐅᒃᐱᕐᓂᕆᔭᐅᔪᖅᑎᒍᑦ ᐊᒻᒪ ᐃᓚᖏᓐᓄᑦ ᐊᖓᔪᖅᑳᕆᔭᐅᔪᓄᑦ. ᑭᓯᐊᓂ, ᐃᒻᒥᓂᒃ ᐱᓕᕆᓗᓂ ᒪᕿᖃᑦᑕᕋᓗᐊᕐᓗᓂ ᖃᓄᐃᙱᒻᒥᔪᖅ ᐃᓱᒪᖅᓲᑎᒋᒐᑦᑎᒍᑦ ᐃᒃᐱᒋᔭᕗᑦ.
 
ᓄᑲᑉᐱᐊᕐᔪᐊᓄᑦ, ᐃᒻᒥᓂᒃ ᐱᓕᕆᓂᖅ ᒪᕿᕙᒡᓗᓂ ᓇᖕᒥᓂᖅ ᐅᓱᓂ ᐊᒡᒐᒥᓄᑦ ᐅᑎᖅᑕᕋᐅᔭᖅᑎᐅᔭᓕᖅᐸᒍ ᑭᓯᐊᓂ ᑎᒃᓴᓕᖅᐸᑦ ᐊᒻᒪ ᑭᖑᓂᐊᒍᑦ ᐅᓱᓂ ᐱᓕᕆᐊᕇᓐᓇᓕᕐᓗᓂᐅᒃ ᐃᒃᐱᒋᔭᓂ ᐊᓕᐊᓇᐃᒋᐅᔭᓕᕐᓗᓂᐅᒃ ᐅᕝᕙᓘᓐᓃᑦ ᒪᕿᒃᐸᑦ (ᑕᐃᔭᐅᕙᒃᑭᓪᓗᓂ ᐃᒪᓐᓇ "cumming") ᐃᑉᐱᒋᔭᓂ ᖁᕕᐊᒋᓕᕐᓗᓂᐅᒃ ᐊᓂᒍᖅᐸᒃᖢᓂᓗ ᑭᓯᐊᓂ ᒪᕿᓂᒃᑯᑦ ᐅᓱᐊᓂ ᐊᓂᐊᔪᖃᖅᖢᓂ.

ᓂᕕᐊᖅᓵᕐᔪᐊᑦ ᐃᒃᐱᖕᓂᐊᔾᔪᑎᖏᑦ ᐅᓄᕐᓂᖅᓴᐅᓂᖏᓐᓄᑦ ᐃᒻᒥᓂᒃ ᐱᓕᕆᓪᓗᑎᒃ ᑎᒃᓴᓕᕈᓐᓇᖅᐳᑦ ᐃᒪᐃᓕᐅᕐᓗᑎᑦ ᐊᒃᑐᕐᓗᒍᓘᓐᓃᑦ ᐊᒃᓴᓕᒡᓗᒍᓘᓐᓃᑦ ᐅᕕᐅᖓ, ᐃᕕᐊᖏᖏᒃ ᓇᐅᒃᑯᑐᐃᓐᓇᕐᓗ ᑎᒥᐊᒍᑦ ᑎᒃᓴᓕᕐᓇᖅᑐᒃᑯᑦ. ᐃᒻᒥᓂᒃ ᐱᓕᕆᓂᖅ ᒪᕿᓇᓱᐃᓐᓈᓗᖕᓇᙱᒻᒪᑦ. ᐊᓕᐊᓇᐃᒋᔭᒥᒃ ᐃᒃᐱᒍᓱᑐᐃᓐᓇᕐᓗᓂ ᐱᓕᕆᓐᓇᕐᒪᑦ.
 
ᐊᒥᓱᓂᒃ ᐅᖃᐅᐅᓯᖅᑕᖃᕐᒪᑦ ᓇᖕᒥᓂᖅ ᐱᓕᕆᖃᑦᑕᕐᓂᖅ ᖃᓄᐃᓕᖓᓕᕈᑕᐅᔪᓐᓇᕐᓂᖏᓪᓗ. ᐃᓚᖓᑦ ᐃᒪᐃᑦᑑᓪᓗᓂ ᑕᐅᑐᒍᓐᓃᕐᓇᕐᓂᖓ ᐅᕝᕙᓘᓐᓃᑦ ᐊᒡᒐᖕᒥᒃᑎᒍᑦ ᒥᖅᑯᖅᑖᕐᓇᕐᓂᖓᓂᒃ. ᑖᒃᑯᐊᒃ ᑕᒪᕐᒥᒃ ᓱᓕᙱᑦᑎᐊᖅᑑᒃ.

ᐃᓄᑑᓗᑎᑦ ᐃᓕᖕᓂᒃ ᐱᓕᕆᒍᕕᑦ, ᖁᐱᕐᕆᔪᓐᓇᙱᓚᑎᑦ. ᑭᓯᐊᓂ, ᖁᐱᕐᕆᑐᐃᓐᓇᕆᐊᖃᖅᐳᑎᑦ ᐱᖃᑎᖃᕐᓗᑎᑦ ᐃᓕᔅᓯᓐᓂᒃ ᐱᓕᕆᓇᓱᓕᕈᔅᓯᒃ, ᐅᕝᕙᓘᓐᓃᑦ ᓄᓕᐊᕐᓂᕐᒧᑦ ᐱᙳᐊᕈᑎᓂᒃ ᐊᑐᖃᑦᑕᐅᑎᒍᔅᓯᒃ ᐱᖃᑎᒋᔭᐃᓪᓗ. ᐅᓇ ᓇᕿᓪᓗᒍ ᑐᑭᓯᒋᐊᒃᑲᓐᓂᕈᒪᒍᔅᓯ ᖃᓄᖅ ᓄᓕᐊᕐᓃᑦ ᐊᐃᑦᑐᕐᓗᒍᑕᐅᔪᓐᓇᕐᒪᖔᑕ ᖁᐱᕐᕆᓂᕐᒧᑦ.