ᓄᓕᐊᕈᓐᓇᕋᓱᒋᓕᑐᐊᕈᕕᑦ ᐃᓄᖕᒧᑦ ᐊᑕᐅᓯᕐᒧᑦ ᐃᒃᐱᒋᔭᓂᒃ ᐃᓱᒪᓕᐅᕈᓐᓇᕐᒪᒍ ᑕᒪᑦᑕᑦᑎᐊᕐᓗ ᐃᓱᒪᒋᔭᖃᖅᑐᐃᓐᓇᐅᓪᓗᑕ ᐊᔾᔨᒌᙱᑦᑐᓂᒃ ᓄᓕᐊᕐᓂᐅᑉ ᒥᒃᓵᓄᑦ ᖃᐅᔨᒪᔪᓐᓇᖅᖢᑕᓗ ᖃᖓᒃᑯᑦ ᓄᓕᐊᕈᓐᓇᖅᓯᖕᒪᖔᑦᑕ. ᑖᒃᑯᐊ ᓇᓗᓇᐃᖅᓯᒪᔪᑦ, ᓄᕙ ᔅᑰᓯᐊᒃᑯᑦ ᒐᕙᒪᒃᑯᖏᑦᑕ ᖃᐅᔨᒪᔾᔪᑎᖏᓐᓂᒃ ᐋᖅᑭᒃᑕᐅᓚᐅᖅᓯᒪᔪᑦ, ᐱᔾᔪᑎᖃᕈᓘᔭᖅᐳᑦ ᖃᓄᐃᒻᒪᑦ ᓄᓕᐊᕆᐊᖃᙱᒻᒪᖔᓯ. ᐱᔾᔪᑎᒋᔭᑦ ᓄᓕᐊᕆᐊᖃᕐᓂᐅᑉ ᒥᒃᓵᓄᑦ ᓇᓗᓇᐃᖅᑕᐅᓯᒪᑐᐊᖅᐸᑦ, ᓂᕈᐊᕆᐊᖃᖅᐳᑎᑦ ᐃᓕᖕᓂᒃ ᐃᒃᐱᒋᑦᑎᐊᕐᓗᑎᑦ ᐃᓱᒪᓗᑎᓪᓗ ᓄᓕᐅᓂᒍᓐᓇᖅᓯᖕᒪᖔᖅᐱᑦ ᒫᓐᓇ.

• ᑭᐱᙳᑎᓪᓗᑎᑦ
• ᐊᖓᔮᖅᑎᓪᓗᑎᑦ
• ᓱᐴᖅᑐᒐᖅᓯᒪᑎᓪᓗᑎᑦ
• ᐊᓯᖕᓂᒃ ᑕᐃᒪᐃᓕᐅᖁᔭᐅᑎᓪᓗᑎᑦ
• ᐃᓱᒪᒋᔭᖃᑐᐊᕈᕕᑦ ᐊᑭᓕᒃᓴᖃᕋᓱᒋᓗᑎᑦ ᑭᓇᒧᒃᑭᐊᖅ
• ᐃᓱᒪᒋᔭᖃᑐᐊᕈᕕᑦ ᑭᓇᒧᒃᑭᐊᖅ ᐊᑭᓕᒃᓴᖃᕐᕕᐅᓇᓱᒋᓗᑎᑦ
• ᐃᓱᒪᒋᔭᖃᑐᐊᕈᕕᑦ ᑭᒃᑯᓕᒫᕌᓗᖕᓂ ᐊᑐᖅᑕᐅᓇᓱᒋᓗᒍ
• ᐊᔾᔨᐅᙱᑦᑐᑑᔪᒪᙱᓗᐊᒧᑦ ᐅᕝᕙᓘᓐᓃᑦ ᖃᐅᔨᒪᔭᐅᑦᑎᐊᕈᒪᓗᐊᒧᑦ
• ᖃᐅᔨᒪᔭᐅᔪᒪᓗᐊᒧᑦ ᐃᓐᓇᕐᕙᓲᓕᕐᓂᕐᓂᒃ - ᐃᓕᖕᓄᑦ, ᐱᖃᓐᓇᕆᔭᕐᓄᑦ ᐊᖓᔪᖅᑳᖕᓄᓪᓘᓐᓃᑦ
• ᑕᐅᑐᖃᑦᑕᕐᓂᕐᓄᑦ ᓄᓕᐊᙳᐊᖅᑐᓂᒃ ᑕᕐᕆᔭᐅᑎᑎᒍᑦ ᑕᕐᕆᔭᕐᓂᒃᑯᓪᓘᓐᓃᑦ ᐃᓱᒪᓕᕐᓗᑎᓪᓗ ᓄᓕᐊᖅᑎᐅᖃᑕᐅᔭᕆᐊᒃᓴᖅ
• ᐃᓱᒪᒋᔭᖃᑐᐊᕈᕕᑦ ᓄᓕᐊᕐᓗᓂ ᑭᓯᐊᓂ ᓇᒡᓕᒋᔭᐅᓕᕐᓇᕋᓱᒋᓗᒍ ᐱᖃᑎᖕᓄᑦ
• ᐃᓱᒪᒋᔭᖃᑐᐊᕈᕕᑦ ᓄᑕᕋᓛᖃᕐᓗᓂ ᐊᓕᐊᓇᐃᓐᓂᐊᕋᓱᒋᓗᒍ ᓄᑕᕋᓛᖃᓕᕐᓗᑎᓪᓗ ᓇᒡᓕᒍᓱᒃᑐᒥᒃ ᐃᓕᖕᓂᒃ
• ᖃᐅᔨᔭᐅᑎᓐᓇᓱᓗᐊᒧᑦ ᐃᓕᖕᓂᒃ "ᐊᕐᓇᐅᖃᑎᖕᓂᒃ ᐊᖑᑕᐅᖃᑎᖕᓂᒃ ᐱᖃᑎᖃᓲᖑᙱᓐᓂᕐᓂᒃ"
• ᐊᐃᓐᓈᕆᔭᖃᑐᐊᕈᕕᑦ ᐋᒃᑳᕆᐊᒃᓴᖅ
• ᐃᓱᒪᒋᔭᖃᑐᐊᕈᕕᑦ ᓄᑕᕋᓛᖃᓕᕈᕕᑦ ᐊᖑᑎ ᐱᖃᓐᓇᕆᔭᑦ ᐃᓕᖕᓃᖏᓐᓇᕐᓂᐊᕋᓱᒋᓗᒍ
• ᑐᓐᓂᖅᑯᓯᐊᖃᑦᑕᕐᓃᑦ ᑮᓇᐅᔭᖅᑖᖅᑎᑕᐅᖃᑦᑕᕐᓃᓪᓘᓐᓃᑦ ᐱᔾᔪᑕᐅᓇᓱᒋᑐᐊᕈᕕᒋᑦ
• ᐅᖃᐅᔾᔭᐅᓯᒪᑐᐊᕈᕕᑦ ᑭᓇᒧᒃᑭᐊᖅ ᓄᓕᐊᖃᑎᒋᔭᐅᒍᕕᑦ ᖃᓄᐃᓕᐅᕐᓂᐊᕐᓂᕋᖅᓯᒪᔪᖃᖅᐸᑦ ᐅᒃᐱᕆᑐᐊᕈᖕᓂᓗ
• ᑭᓇᒥᒃᑭᐊᖅ ᐋᓐᓂᖅᓯᔪᒪᓗᐊᒧᑦ ᐅᕝᕙᓗᑭᐊᖅ ᑭᓇᒥᒃᑭᐊᖅ ᐊᑭᒋᐊᕈᒪᓗᐊᒧᑦ

 
ᖃᓄᐃᙱᑦᑎᐊᖅᑐᖅ ᓄᓕᐅᙱᒃᑲᓗᐊᕈᕕᑦ. ᐱᖃᓐᓇᕆᔭᑎᑦ ᐊᒻᒪ/ᐅᕝᕙᓘᓐᓃᑦ ᐱᖃᑎᓯ ᓂᕈᐊᕆᔭᔅᓯᓐᓂᒃ ᐃᒃᐱᒍᓱᑦᑎᐊᕆᐊᖃᕋᓗᐊᕐᒪᑕ. ᖃᐅᔨᒪᑐᐊᕈᕕᑦ ᓄᓕᐊᕈᒪᙱᑦᑐᑎᑦ ᓱᓕ, ᖃᐅᔨᒋᐊᕈᓐᓇᖅᐳᓯ ᑎᑎᕋᖅᓯᒪᔪᓂᒃ ᐃᒪᐃᓕᖓᔪᓂᒃ ᐋᑳᕆᐊᖃᕐᓂᖅ ᐊᒻᒪ ᖃᓄᖅ ᐊᖏᙱᑦᑐᓐᓇᕐᒪᖔᑦ ᐃᒃᐱᒋᔭᐃᑦ ᒪᓕᒡᓗᒍ.

 ᓄᓕᐊᕈᓐᓇᕋᓱᒋᓕᑐᐊᕈᕕᑦ, ᑖᒃᑯᐊ ᑎᑎᕋᖅᓯᒪᔪᑦ ᓇᓗᓇᐃᖅᓯᓯᒪᕗᑦ ᖃᓄᐃᓕᐅᕆᐊᖃᕐᓂᕐᓂᒃ ᐃᓱᒪᒋᔭᕆᐊᖃᖅᑕᑎᓪᓘᓐᓃᑦ ᖃᓂᒃᑯᑦ ᓄᓕᐊᓯᒋᐊᓚᐅᙱᓐᓂᔅᓯᓐᓂ, ᑯᔭᓯᒋᐊᓚᐅᙱᓐᓂᔅᓯᓐᓂ ᐅᕝᕙᓘᓐᓃᑦ ᖃᓄᑐᐃᓐᓇᑦᑎᐊᖅ ᓯᖓᐃᓕᕐᓇᕆᔭᔅᓯᓐᓂ ᖁᐱᕐᕆᔾᔪᑕᐅᔪᓐᓇᖅᑐᓂᒡᓘᓐᓃᑦ ᐱᓕᕆᓂᐊᕌᖓᔅᓯ. ᑎᑎᕋᖅᑕᐅᓚᐅᖅᓯᒪᔪᖅ ᓘᒃᑖᖅ ᑭᐅᕋᓐ ᕋᐃᓐ-ᒧᑦ.
 
ᓄᓕᐊᕈᓐᓇᕐᓯᖕᒪᖔᓯ ᓄᓕᐊᖅᑎᐅᔪᒪᙱᒃᑯᔅᓯᓘᓐᓃᑦ ᓇᖕᒥᓂᖅ ᑭᓯᐊᓂ ᐃᓱᒪᓕᐊᕆᔭᒃᓴᐅᖕᒪᑦ, ᑎᑎᕋᖅᑕᐅᓯᒪᔪᓗᒃᑖᑦ ᐊᖏᖃᑎᒋᙱᑐᐃᓐᓇᕆᐊᖃᖅᑕᓯ. ᖃᓄᐃᙱᑦᑐᖅ ᐊᖏᖃᑎᒋᙱᒃᑲᓗᐊᕈᔅᓯᐅᒃ, ᑭᓯᐊᓂ ᐊᖏᔪᒻᒪᕆᖕᒥᒃ ᐅᖃᐅᔾᔪᖅᓱᐃᑦᑎᐊᖅᓯᒪᖕᒪᑕ ᑕᒪᓐᓇ ᐃᓕᖕᓂᒃ ᑭᐅᔾᔪᑎᒋᓇᓱᑐᐊᕈᖕᓂ ᐃᓕᖕᓄᑦ. ᐅᕝᕙᐅᑯᐊ ᑎᑎᕋᓚᐅᖅᓯᒪᔭᖏᑦ:

• ᒪᕿᕙᒡᓗᓯ - ᓄᓕᐊᖅᑎᙳᓚᐅᙱᓐᓂᔅᓯᓐᓂ, ᐃᓕᔅᓯᓐᓂᒃ ᒪᕿᑎᑉᐸᒡᓗᓯ. ᐱᒻᒪᕆᐅᖕᒪᑦ ᖃᐅᔨᒪᔭᕆᐊᒃᓴᖅ ᖃᓄᐃᓕᐅᕐᓗᑎᑦ ᐊᓕᐊᓇᐃᒋᔭᖃᕐᒪᖔᖅᐱᑦ ᖃᐅᔨᒪᓗᑎᑦ ᐱᖃᑏᑦ ᖃᐅᔨᑎᑦᑐᓐᓇᓛᕋᕕᐅᒃ.
• ᐱᖃᑎᕕᑦ ᓄᓕᐅᖃᑦᑕᖅᓯᒪᓂᖓ ᑭᖑᓂᑦᑎᓐᓂ ᖃᐅᔨᒪᓗᒍ - ᑕᒪᓐᓇ ᑐᑭᖃᖅᐳᖅ ᐃᓄᒃ ᐊᕐᓇᐅᖦᖤᕋᓗᐊᖅᐸᑦ ᐊᖑᑕᐅᖦᖤᕋᓗᐊᖅᐸᑦ-ᐅᑦᑐᒃᑯᑦ ᓄᓕᐊᕐᓂᑐᐊᓄᑦ ᑐᕌᖓᙱᓐᓂᖓᓂᒃ.
• 3. ᖃᐅᔨᒪᒋᐊᕐᓗᓯ ᐱᖃᑎᓯ ᖁᐱᕐᕆᖃᑦᑕᕐᓂᑰᖕᒪᖔᑕ ᐃᓕᔅᓯᓐᓂᓪᓗ ᓇᖕᒥᓂᖅ ᖃᐅᔨᒪᑦᑎᐊᕆᐊᕐᓗᓯ - ᖃᐅᔨᒪᔾᔪᑕᐅᔪᓐᓇᖅᑐᑐᐊᖅ ᐱᖃᑎᖕᓄᓪᓗ ᐃᓕᖕᓄᓪᓗ ᖃᐅᔨᓴᖅᑕᐅᔪᐃᓐᓇᐅᓗᓯᒃ ᖁᐱᕐᕆᓯᒪᙱᒃᑲᓗᐊᕐᒪᖔᔅᓯᒃ.
• ᐅᖃᐅᓯᖃᑦᑎᐊᖅᐸᒡᓗᓯ ᖃᓄᖅ ᖁᐱᕐᕆᔾᔪᑕᐅᕙᒃᑐᓄᑦ ᓴᐳᑎᓯᒪᔪᓐᓇᕐᒪᖔᓯ ᖃᓄᐃᑦᑐᓂᒡᓗ ᓯᖓᐃᓕᕐᓇᙱᑦᑐᓂᒃ ᐊᑐᕐᓂᐊᕐᒪᖔᔅᓯᒃ - ᑖᒃᑯᐊᒃ ᒪᕐᕉᒃ ᐃᓱᒪᒋᔭᒃᓵᒃ ᑐᕋᖓᔪᐃᓐᓇᐅᖕᒪᑎᒃ ᓄᓕᐊᕇᓄᑦ ᐊᕐᓇᐅᖃᑎᒥᖕᓂᒃ ᐊᖑᑕᐅᖃᑎᒥᖕᓂᒃ ᐱᖃᑎᖃᖅᐸᙱᑦᑐᓄᑦ ᐊᒻᒪ ᖁᐱᕐᕆᓂᕐᒧᑦ ᓴᐳᔾᔨᔾᔪᑎᒃᓴᓄᑦ ᐸᕐᓇᐃᓂᖅ (ᐱᕙᒌᔭᕐᓂᖅ) ᐊᖏᕈᑕᐅᔭᕆᐊᖃᖅᑐᐃᓐᓇᐅᖕᒪᑕ ᐊᓯᓕᒫᖏᓐᓄᑦ ᓄᓕᐊᕇᓄᑦ.
• ᐊᕐᓇᐅᖃᑎᒋᙱᑕᕐᓂᒃ ᐊᖑᑕᐅᖃᑎᒋᙱᑕᕐᓂᓪᓘᓐᓃᑦ ᓄᓕᐊᖃᑦᑕᕈᕕᑦ, ᐅᖃᐅᓯᖃᖅᐸᒡᓗᓯ ᖃᓄᐃᓕᖓᓕᕈᑕᐅᕙᒃᑐᓂᒃ ᐊᕐᓇᖅ ᓯᖓᐃᓕᕐᓂᕌᖓᑦ - ᐱᓪᓚᕆᖕᓂᖅ ᐊᔾᔨᒋᙱᒻᒪᒍ ᑕᐃᒪᐃᓐᓇᓱᒋᔭᐅᔪᒧᑦ. ᐅᖃᐅᓯᕆᕙᒌᖅᖢᒍ ᐊᑲᐅᓂᖅᓴᐅᓪᓚᕆᖕᒪᑦ.
• ᐱᖃᓐᓇᕆᔭᕕᑦ ᓴᐃᒻᒪᖅᑎᓯᒪᓂᖓ ᐃᒃᐱᒋᓗᒍ - ᐃᒪᐃᒐᔪᖕᓂᖓᓄᑦ ᐱᖃᓐᓇᕆᔭᕗᑦ ᑕᑯᔪᓐᓇᖅᐸᖕᒪᑕ ᓇᒡᓕᒃᑎᒋᔭᕗᑦ ᖃᓄᖅ ᐃᓅᓯᖃᕐᒪᖔᑦᑕ. ᓈᓚᒃᐸᒡᓗᒋᑦ ᐅᖃᐅᓯᒃᓴᖏᑦ ᑐᓴᖅᑕᓯᓗ ᐆᒻᒪᒥᐅᑦᑕᕆᑦᑎᐊᖅᐸᒡᓗᓯᐅᒃ. ᑐᓴᕈᒪᙱᒃᑯᖕᓂ, ᑕᖅᑭᓕᒫᒥᒃ ᐅᑕᖅᑭᔾᔪᑎᒋᓚᐅᕋᓗᐊᕐᓗᒍ. ᑭᖑᓂᐊᒍᓪᓗ ᐊᐱᖅᑯᓯᕆᓗᒍ ᐱᖃᓐᓇᕆᔭᕕᑦ ᐊᓯᐊᓄᑦ ᖃᐅᔨᓇᓱᒡᓗᒋᓪᓗ ᖃᓄᕐᓕ ᐃᓱᒪᖕᒪᖔᑕ.
• ᐊᔪᕐᓇᙱᑐᐊᕌᖓᑦ ᐱᖃᑎᕕᑦ ᐊᖓᔪᖅᑳᖏᑦ ᑕᑰᑎᒋᐊᖅᐸᒡᓗᒋᑦ - ᐱᖃᑎᐅᑉ ᐃᓚᖏᓐᓂᒃ ᖃᐅᔨᒪᖃᑕᐅᓗᓂ ᐱᒻᒪᕆᐅᖕᒪᑦ.
• ᐃᓕᖕᓂᒃ ᐊᐱᕆᕙᒡᓗᑎᑦ ᐃᖢᕆᓇᔭᕋᓗᐊᕐᒪᖔᖅᐱᑦ ᐊᓐᓄᕋᐃᙶᕆᐊᒃᓴᖅ ᐱᖃᑎᕕᑦ ᓵᖓᓂ. ᒪᒃᑯᒃᑐᑦ ᓄᓕᐅᓂᒃᐸᓪᓕᐊᓕᖅᑐᑦ ᐃᓛᓐᓂᒃᑯᑦ ᓄᓕᐅᓂᖕᓂᕆᔭᑎᒃ ᐃᔨᖅᓯᒪᓲᖑᖕᒪᒍ ᑖᕐᓂᕐᒥᒃ. ᐱᖃᑎᒌᖕᓂᖅ ᐅᒃᐱᕇᖃᑦᑕᐅᑎᑦᑎᐊᓕᕌᖓᑕ ᑕᒪᑐᒥᖓ ᑲᙳᓱᒍᓐᓃᓕᑕᐃᓐᓇᓲᖑᖕᒪᑕ ᓄᓕᐊᕐᓂᓪᓛᑦᑖᕌᓗᖕᓂᒃ ᐱᓕᕆᒋᐊᓚᐅᙱᓐᓂᕐᒥᓂᒃ.
• ᐅᓲᑉ ᐴᖏᓐᓂᒃ ᓇᐅᑦᑎᐅᒪᔭᖃᐃᓐᓇᐅᔭᕐᓗᓯ - ᐅᔾᔨᕆᑦᑎᐊᕆᐊᖅᐸᒡᓗᒋᑦ ᓈᒻᒪᒃᑲᓗᐊᕐᒪᖔᑕ ᐊᒻᒪᓗ ᐊᑐᕐᓂᕆᔪᓐᓇᖅᑕᖏᑦ ᐃᓱᓕᓯᒪᙱᒃᑲᓗᐊᕐᒪᖔᑕ. ᐅᓲᑉ ᐴᖏᑦ ᐃᓚᒋᔭᐅᖏᓐᓇᐅᔭᕆᐊᖃᕐᒪᑕ ᖃᓄᓗᒃᑖᑦᑎᐊᖅ ᓄᓕᐊᓂᖅᑕᖃᕐᓂᐊᕌᖓᑦ.
• ᖃᐅᔨᒪᑦᑎᐊᕆᐊᖃᑦᑕᕐᓗᓯ ᐱᖃᑎᓯ ᑕᒪᒃᑯᓂᖓᓗᒃᑖᖅ ᐊᑐᖃᑦᑕᖅᓯᒪᒐᓗᐊᕐᒪᖔᑕ - ᖃᐅᔨᒪᑦᑎᐊᕆᐊᖅᐸᒡᓗᓯᓗ ᑕᒪᔅᓯᒃ ᐃᒃᐱᒋᔭᔅᓯᓐᓂᒃ ᑲᒪᑦᑎᐊᕋᓗᐊᕐᒪᖔᔅᓯᒃ ᐃᓅᓯᑦᑎᐊᕙᓯᓗ ᑲᒪᒋᑦᑎᐊᕐᓗᒋᑦ. ᑲᒪᑦᑎᐊᖅᐸᒡᓗᓯ ᑕᒪᐃᔅᓯᓐᓄᑦ ᐃᓕᖕᓄᑦ ᐱᖃᑎᖕᓄᓪᓗ.

ᑎᑎᕋᖅᓯᒪᔪᑦ ᐃᔾᔪᐊᖅᑕᐅᔪᑦ ᑎᑎᕋᖅᓯᒪᔪᒥᒃ ᐊᖏᕈᑎᖃᖅᖢᓂ ᐅᑯᓇᙵᑦ ᓅᕙ ᓯᑯᓯᐊᒥ ᐋᓐᓂᐊᖅᑐᓕᕆᓂᕐᒧᑦ ᐅᔾᔨᕆᔭᐅᓕᖅᑎᑦᑎᓂᕐᒧᑦ ᓴᐳᔾᔨᓯᒪᓂᕐᒧᓪᓗ, 2009.