STI-ᑖᕆᔭᐅᒐᔪᒃᑐᑦ ᓇᓗᓇᐃᔭᖅᑕᐅᓯᒪᕗᑦ ᐊᑖᓂ. ᐱᒻᒪᕆᐊᓘᕗᖅ ᖃᐅᔨᒪᓗᓂ ᐊᒥᓱᐃᑦ ᐃᓄᐃᑦ STI-ᖃᖅᑐᑦ ᑕᑯᒃᓴᐅᔪᓂᒃ ᐱᑕᖃᖅᐸᙱᓐᓂᖏᓐᓂᒃ. ᑕᐃᒪᐃᓐᓂᖓᓄᓪᓗ ᐱᒻᒪᕆᐊᓘᕗᖅ ᖃᐅᔨᓴᖅᑕᐅᖃᑦᑕᕈᕕᑦ ᐊᓯᔾᔨᖅᓯᑐᐊᕌᖓᕕᑦ ᓄᓕᐊᕐᓂᕐᒧᑦ ᐱᖃᑎᒋᕙᒃᑕᕐᓂᒃ ᐱᖃᑎᒋᕙᒃᑕᐃᓪᓘᓐᓃᑦ ᐊᓯᔾᔨᖅᓯᒃᐸᑦ ᓄᓕᐊᕐᓂᕐᒧᑦ ᐱᖃᑎᒋᕙᒃᑕᒥᓂᒃ. ᖃᐅᔨᓴᖅᑕᐅᓪᓗᐊᕆᕗᑎᑦᑕᐅᖅ ᖃᐅᔨᒍᕕᑦ ᐃᓚᖓᑦ ᐱᖃᑎᒋᕙᒃᑕᕕᑦ (ᒫᓐᓇᒃᑯᓪᓘᓐᓃᑦ ᐱᖃᑎᒋᕙᒃᑕᐃᑦ ᐱᖃᑎᒋᕙᓚᐅᖅᑕᑎᓪᓘᓐᓃᑦ ᑭᖑᓂᕐᓂ) STI-ᖃᖅᐸᑦ, ᐅᔾᔨᕈᓱᓕᕈᕕᓪᓘᓐᓃᑦ ᓇᓕᐊᖕᓂᑐᐃᓐᓇᖅ ᖃᐅᔨᔾᔪᑕᐅᔪᓐᓇᖅᑐᓂᒃ ᓇᓗᓇᐃᔭᖅᓯᒪᔪᓂᒃ ᐊᑖᓂ. ᑕᕝᕙᓂ, ᓇᓂᓯᓂᐊᖅᐳᑎᑦ ᐅᑯᓄᖓ STI-ᒋᔭᐅᓕᖅᐸᒃᑐᓄᑦ:

• Chlamydia (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• Gonorrhea (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• Syphilis (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ) 
• Trichomonas (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• HPV (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• Herpes (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• Scabies and Pubic Lice (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• Hepatitis B (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)
• HIV/AIDS (ᐊᑦᑕᑕᕈᑎ ᑎᑎᖅᑲᖏᓐᓄᐊᕈᒪᓗᓂ ᐊᑖᓃᑦᑐᖅ)

Chlamydia

Chlamydia-ᖑᓂᕋᖅᑕᐅᔪᖅ ᓴᖅᑭᒐᔪᓛᖑᖃᑕᐅᕗᖅ STI-ᓂᑦ ᐊᕗᖓᑲᓪᓚᒡᓗ ᐊᑲᐅᙱᓕᐅᕈᑕᐅᓕᕈᓐᓇᖅᖢᓂ. ᑕᒪᓐᓇ ᓯᐊᒻᒪᒃᑎᑕᐅᕙᓪᓕᐊᕙᒃᐳᖅ ᖃᓂᒃᑯᑦ, ᐅᑦᑐᒃᑯᒃ ᐃᑎᒃᑯᓪᓗ ᑯᔭᖕᓂᒃᑯᑦ – ᐅᔾᔨᕐᓇᖅᑐᓂᒃ ᐱᓯᒪᙱᒃᑲᓗᐊᕈᕕᑦ ᐊᐃᑦᑐᕐᓗᒃᓯᒪᓂᕐᒥᒃ.   ᖃᓂᕐᒧᑦ ᐊᕙᓗᑦᑎᓯᒪᔪᒥᒃ ᒪᑯᓂᖓᓗ ᐅᓲᑉ ᐴᖏᓐᓂᒃ ᐊᑐᖅᐸᒡᓗᓂ ᓄᖅᑲᖅᑎᑦᑎᓯᒪᕙᒃᐳᑦ ᐊᐃᑦᑐᕐᓗᒃᑕᐅᔪᓐᓇᖅᑐᖅ ᓯᐊᒻᒪᒃᑎᖅᑕᐅᔪᓐᓇᙱᑎᓪᓗᒍ. ᐱᐅᒋᕗᖅᑕᐅᖅ ᖃᐅᔨᒪᑦᑎᐊᕋᓱᒃᑯᕕᑦ ᓇᖕᒥᓂᖅ ᐱᖃᑎᒋᔭᐃᓪᓗ  ᖃᐅᔨᓴᖅᑕᐅᒍᔅᓯᒃ, ᐃᒪᓐᓇᐅᓂᖓᓄᑦ, ᖃᐅᔨᒪᙱᑐᐃᓐᓇᕆᐊᖃᕋᕕᑦ ᑕᐃᒪᐃᑦᑐᒥᒃ ᐱᓯᒪᓂᕐᓂᒃ. ᓴᐳᔾᔨᔾᔪᑎᓂᒃ ᐊᑐᖅᐸᒡᓗᓂ ᖃᐅᔨᓴᖅᑕᐅᓃᓪᓗ ᑖᒃᑯᐊᖑᕗᒃ ᓄᓕᐊᖅᐸᕐᓂᕆᔭᕐᓂᒃ ᖁᐊᖅᓵᕐᓇᙱᑎᑦᑎᕚᓪᓕᕈᓐᓇᖅᖢᑎᒃ ᐃᓕᖕᓂᒡᓗ ᐊᐃᑉᐸᕆᕙᒃᑕᕐᓂᒡᓗ ᐃᒃᐱᒋᑦᑎᐊᕐᓂᖃᖅᖢᓯᒃ.

ᖃᐅᔨᔾᔪᑕᐅᔪᓐᓇᖅᑐᑦ ᐊᕐᓇᐃᑦ Chlamydia-ᖃᑐᐃᓐᓇᕆᐊᖃᕐᓂᖏᓐᓄᑦ:

• ᓄᑖᒥᒃ ᐊᔾᔨᖃᙱᑦᑐᒥᒡᓘᓐᓃᑦ ᒪᕿᓂᖃᕐᓗᑎᒃ ᐅᑦᑐᒃᑯᑦ;
• ᖃᓯᓕᕙᒡᓗᑎᒃ ᖁᐃᓕᕌᖓᒥᒃ;
• ᐋᓐᓂᐊᕐᓂᖃᖅᐸᒡᓗᑎᒃ ᓈᖓᑕ ᐊᑎᖅᐸᓯᐊᒍᑦ, ᐃᓛᓐᓂᒃᑯᑦ ᐆᑎᕐᓇᖅᐸᒡᓗᑎᒃ ᐆᓕᖕᓂᖃᖅᐸᒡᓗᑎᒡᓗ;
• ᐋᓐᓂᐊᕐᓂᖃᖅᐸᒡᓗᑎᒃ ᓄᓕᐊᖃᑎᖃᓕᕌᖓᒥᒃ.
  

ᑕᒪᕐᒥᑲᓴᒃ ᐊᕐᓇᐃᑦ Chlamydia-ᖃᖅᑐᑦ ᐅᔾᔨᕐᓇᖅᑐᓂᒃ ᖃᐅᔨᔾᔪᑕᐅᔪᓐᓇᖅᑐᓂᒃ ᐱᖃᖅᐸᙱᓚᑦ. ᑕᐃᒪᐃᓐᓂᖓᓄᑦ ᐱᕐᔪᐊᒻᒪᕆᐊᓘᕗᖅ ᖃᐅᔨᓴᖅᑕᐅᓗᓂ ᓄᓕᐊᖃᑎᖃᖅᐸᒃᑯᕕᑦ.

ᖃᐅᔨᔾᔪᑕᐅᔪᓐᓇᖅᑐᑦ ᐊᖑᑎᑦ Chlamydia-ᖃᑐᐃᓐᓇᕆᐊᖃᕐᓂᖏᓐᓄᑦ:

• ᐃᒪᐅᖅᑰᔨᔪᒥᒃ ᐃᒻᒨᖅᑰᔨᔪᒥᒡᓘᓐᓃᑦ ᐅᓱᒃᑯᑦ “ᑯᕕᕙᓪᓕᐊᔪᖃᖃᑦᑕᖅᐸᑦ”;
•  ᐅᓱᕕᑦ ᐃᓗᐊᒍᑦ ᐅᖏᓚᖃᑦᑕᕈᕕᑦ;
• ᖃᓯᓕᕙᒡᓗᑎᒃ ᖁᐃᓕᕌᖓᒥᒃ;
• ᐃᒡᔫᒃᑭᒃ ᐋᓐᓂᐊᖃᖅᑕᖅᐸᑎᒃ ᐳᕕᓕᖃᑦᑕᖅᐸᑎᒡᓘᓐᓃᑦ
  

ᑕᒪᓐᓇ Chlamydia-ᖑᓂᕋᖅᑕᐅᔪᖅ ᖃᐅᔨᔭᐅᓵᓕᒍᓂ ᑲᒪᒋᔭᐅᑦᑎᐊᕈᓂᓗ, ᐱᔪᓐᓃᖅᑎᑕᐅᓵᓕᔪᓐᓇᖅᐳᖅ ᖁᐱᕐᕈᕐᓄᑦ ᑐᖁᓴᐅᑎᓄᑦ. ᒪᓕᒋᐊᖃᑦᑎᐊᕋᔭᖅᑐᑎᑦ ᑕᒪᐃᓐᓂᑦᑎᐊᖅ ᑲᒪᒋᔭᐅᓂᕐᒧᑦ ᐊᑐᖁᔭᐅᔪᓂᒃ ᐅᔾᔨᖅᓱᑦᑎᐊᕐᓗᑎᑦ ᒪᓕᑦᑎᐊᕋᓗᐊᕐᒪᖔᖅᐱᒋᑦ ᑭᖑᓂᖓᒍᓪᓗ ᑕᑯᔭᖅᑐᑦᑎᐊᕐᓗᑎᑦ ᐃᓗᐊᖅᓴᐃᔨᖕᓂᒃ ᓘᒃᑖᖕᓂᒡᓘᓐᓃᑦ ᖃᐅᔨᒪᑦᑎᐊᕈᒪᒧᑦ ᖃᐅᔨᔾᔪᑕᐅᔪᓐᓇᖅᑐᓕᒫᑦ ᐊᐃᑦᑐᕐᓗᒃᑕᐅᓯᒪᓂᕐᒥᒃ ᐱᑕᖃᕈᓐᓃᕋᓗᐊᕐᒪᖔᑕ.

ᑲᒪᒋᔭᐅᑎᙱᒃᑯᕕᐅᒃ  Chlamydia-ᖃᕐᓃᑦ, ᐃᓅᓯᕐᓂᒃ ᐊᒃᑐᖅᓯᕐᔪᐊᖅᑐᒻᒪᕆᐊᓘᔪᓐᓇᖅᐳᖅ. ᐊᕐᓇᐃᑦ ᐱᖃᐃᓐᓇᓕᑐᐃᓐᓇᕆᐊᓖᑦ ᐊᕗᖓᑲᓪᓚᐅᓗᓂᓗ ᐊᑦᑎᖕᓂᖓᒍᑦ  ᓈᖓᑕ ᐋᓐᓂᐊᑯᑖᖃᑦᑕᑐᐃᓐᓇᕆᐊᓖᑦ, ᓯᖓᐃᔪᓐᓇᐃᓪᓕᓗᑎᒃ ᐊᑲᐅᙱᓕᐅᕈᑎᖃᕐᔪᐊᓕᕐᓗᑎᒡᓘᓐᓃᑦ ᓯᖓᐃᓕᕈᑎᒃ ᑕᒪᒃᑯᐊᓗ ᐊᖑᑏᑦ ᕿᑐᕐᙱᐅᖅᑎᑦᑎᔪᓐᓇᐃᓪᓕᑐᐃᓐᓇᕆᐊᖃᖅᖢᑎᒃ.

ᓯᖓᐃᔪᑦ ᐊᕐᓇᐃᑦ Chlamydia-ᒥᒃ ᐊᐃᑦᑐᕐᓗᒃᓯᔪᓐᓇᖅᑐᑦ ᓄᑕᕋᓛᒥᓄᑦ ᕿᑐᕐᙵᖅᑖᓕᕈᑎᒃ. ᖃᐅᔨᓴᖅᑕᐅᒍᕕᑦ ᓯᖓᐃᑎᓪᓗᑎᑦ ᓇᓗᓇᙱᑎᑦᑎᑐᐃᓐᓇᔾᔮᙱᑦᑐᖅ ᖃᓄᐃᙱᑦᑎᐊᕐᓂᕐᓂᒃ, ᑭᓯᐊᓂᑦᑕᐅᖅ ᓄᑕᕋᓛᕐᓂᒃ ᓴᐳᔾᔨᓯᒪᓂᐊᕐᒥᔪᖅ.

Top

Gonorrhea

Gonorrhea (ᐃᒪᓐᓇ ᖃᐅᔨᒪᔭᐅᕙᒃᑭᓪᓗᓂ, "The Clap") ᐱᑖᕆᔭᐅᒐᔪᖕᓂᖅᐹᖑᖃᑕᐅᕗᖅ STI-ᓂᑦ. ᑕᒪᓐᓇ ᐊᐃᑦᑐᕐᓗᒍᑕᐅᕙᒃᑐᖅ ᖃᓂᒃᑯᑦ, ᐅᑦᑐᒃᑯᑦ, ᐃᑎᒃᑯᓪᓗ ᓄᓕᐊᕐᓂᒃᑯᑦ - ᑕᐃᒪᐃᑦᑐᖃᕐᓂᕐᓂᒃ ᓇᓗᓇᐃᒃᑯᑕᕐᓂᒃ ᐱᓯᒪᙱᒃᑲᓗᐊᕐᓂᕈᕕᓪᓘᓐᓃᑦ.  ᖃᓂᕐᒧᑦ ᐊᕙᓗᑦᑎᓯᒪᔪᒥᒃ ᒪᑯᓂᖓᓗ ᐅᓲᑉ ᐴᖏᓐᓂᒃ ᐊᑐᖅᐸᒡᓗᓂ ᐊᑐᑦᑎᐊᕐᓗᒋᓪᓗ ᓄᖅᑲᖅᑎᑦᑎᕙᒃᐳᖅ ᓯᐊᒻᒪᒃᑎᕆᓇᔭᕐᓂᕐᒥᒃ ᑕᒪᑐᒥᖓ ᐊᐃᑦᑐᕐᓗᒍᑕᐅᔪᓐᓇᖅᑐᒥᒃ. ᐱᐅᒋᕗᖅᑕᐅᖅ ᐱᖃᑎᒋᕙᒃᑕᐃᓐᓗ ᐃᕝᕕᓪᓗ ᖃᐅᔨᓴᖅᑕᐅᒍᔅᓯᒃ ᖃᐅᔨᒪᙱᑐᐃᓐᓇᕆᐊᖃᕋᔅᓯᒃ ᑕᐃᒪᐃᑦᑐᖃᕐᓂᔅᓯᓐᓂᒃ. ᓴᐳᔾᔨᔾᔪᑎᓂᒃ ᐊᑐᕐᓂᓯᒃ ᖃᐅᔨᓴᖅᑕᐅᓂᕐᓗ ᐊᑐᖅᑕᐅᔪᓐᓇᖅᑐᐃᓐᓇᐅᕗᒃ ᓄᓕᐊᕐᓂᒃᑯᑦ ᖁᐊᕐᓵᕐᓇᖅᑐᒧᐊᖅᑎᑦᑎᙱᓐᓂᖅᓴᐅᔪᓐᓇᖅᖢᑎᒃ ᐃᓕᖕᓂᒡᓗ ᐱᖃᑎᒋᕙᒃᑕᖕᓂᒡᓗ, ᐃᒃᐱᒋᖃᑦᑕᐅᑎᑦᑎᐊᖅᖢᓯᒡᓗ.

ᖃᐅᔨᔾᔪᑕᐅᔪᓐᓇᖅᑐᑦ gonorrhea-ᒧᑦ, ᐱᓯᒪᓕᕐᓂᕈᕕᒋᑦ, ᓴᖅᑭᓕᑕᐃᓐᓇᕋᔭᖅᑐᑦ 3-ᓂᑦ 5-ᓄᑦ ᐅᓪᓗᓂᒃ ᐊᓂᒍᐃᓯᒪᓕᕈᕕᑦ ᐊᐃᑦᑐᕐᓗᒃᑕᐅᕌᓪᓚᓚᐅᕐᓗᑎᑦ. ᑭᓯᐊᓂᑦᑕᐅᖅ, ᐊᐃᑦᑐᕐᓗᒃᓯᒪᔪᓐᓇᕐᒥᔪᑎᑦ gonorrhea-ᒥᒃ ᖃᐅᔨᔾᔪᑕᐅᔪᓐᓇᖅᑐᓂᒡᓗ ᐱᓯᒪᙱᑦᑎᐊᕐᓗᑎᑦ. ᑕᒪᓐᓇ ᑕᐃᒪᐃᒐᔪᓗᐊᕐᓂᖅᓴᐅᓄᖅ ᑕᑯᒃᓴᐅᑎᑦᑎᙱᓪᓗᓂ ᐊᕐᓇᓂ, ᐊᖑᑎᓪᓗᑦᑕᐅᖅ ᐊᒥᓲᕙᒃᑲᓗᐊᕆᓪᓗᑎᒃ ᑕᐃᒪᐃᑦᑐᖃᕐᓂᕐᒥᓂᒃ ᑕᑯᒃᓴᐅᕝᕕᐅᙱᑦᑐᑦ.

ᖃᐅᔨᔾᔪᑕᐅᔪᓐᓇᖅᑐᑦ ᐊᕐᓇᐃᑦ gonorrhea-ᖃᑐᐃᓐᓇᕆᐊᖃᕐᓂᖏᓐᓄᑦ:

• ᓄᑖᒥᒃ ᐊᔾᔨᐅᙱᑦᑐᒥᒡᓘᓐᓃᑦ ᒪᕿᕙᓪᓕᐊᔪᖃᕐᓗᓂ ᐅᑦᑐᖕᓂᑦ;
• ᖃᓯᓕᓇᖅᑐᖅᑕᖃᕐᓗᓂ ᖁᐃᓕᕌᖓᕕᑦ;
• ᐋᓐᓂᐊᕐᓂᖃᖅᐸᒡᓗᑎᑦ ᓈᕕᑦ ᐊᑎᖅᐸᓯᐊᒍᑦ, ᐃᓛᓐᓂᒃᑯᑦ ᐆᑎᕐᓇᖅᐸᒡᓗᑎᑦ ᐆᓕᖕᓂᖃᖅᐸᒡᓗᑎᓪᓗ;
• ᐋᓐᓂᐊᕐᓂᖃᖅᐸᒡᓗᑎᒃ ᓄᓕᐊᖃᑎᖃᓕᕌᖓᒥᒃ.

ᖃᐅᔨᔾᔪᑕᐅᔪᓐᓇᖅᑐᑦ ᐊᖑᑎᑦ  gonorrhea-ᖃᑐᐃᓐᓇᕆᐊᖃᕐᓂᖏᓐᓄᑦ:

• ᒪᕿᓂᖃᕐᓗᑎᒃ ᐅᓱᒃᑯᑦ (ᑭᓂᕐᓗᓂ, ᐃᒻᒨᖅᑰᔨᕈᔪᒡᓗᓕ, ᑕᖅᓴᖃᕐᓗᓂ ᖁᕐᓱᖅᑐᒥᒃ-ᑐᖑᔪᕈᔪᒃᑐᒥᒃ);
• ᖃᓯᓕᓇᖅᑐᖅᑕᖃᕐᓗᓂ ᖁᐃᓕᕌᖓᕕᑦ;
• ᐋᓐᓂᕐᓇᕐᓗᑎᒃ ᐳᑯᓪᓗᑎᒡᓘᓐᓃᑦ ᐃᒡᔫᒃᑭᒃ.
  

ᖃᐅᔨᔭᐅᓵᓕᒍᓂ ᑲᒪᒋᔭᐅᑦᑎᐊᓕᕈᓂᓗ, ᑕᒪᓐᓇ gonorrhea-ᖑᓂᕋᖅᑕᐅᔪᖅ ᐱᓯᒪᔭᐅᔪᓐᓃᑲᐅᖅᑐᕈᓐᓇᖅᐳᖅ ᖁᐱᕐᕈᓄᑦ ᑐᖁᓴᐅᑎᓄᑦ. ᒪᓕᒋᐊᖃᕋᔭᖅᑐᑎᑦ  ᑲᒪᒋᔭᐅᓂᕐᒧᑦ ᐊᑐᖅᑕᐅᖁᔭᐅᓯᒪᔪᓕᒫᓂᒃ ᐊᑐᑦᑎᐊᕐᓗᒋᑦ ᑭᖑᓂᖓᒍᓪᓗ ᑕᑯᔭᖅᑐᐃᖕᒥᓗᑎᑦ ᐃᓗᐊᖅᓴᐃᔨᖕᓂᒃ ᓘᒃᑖᕐᓂᒡᓘᓐᓃᑦ ᖃᐅᔨᒪᑦᑎᐊᕈᒪᒍᕕᑦ ᖃᐅᔨᔾᔪᑕᐅᔪᓐᓇᖅᑐᓕᒫᑦᑎᐊᑦ ᖁᐱᕐᕆᓯᒪᓂᕐᓂᒃ ᐱᑕᖃᕈᓐᓃᕋᓗᐊᕐᒪᖔᑦ.

Gonorrhea-ᖃᕐᓂᕆᔭᐃᑦ ᑲᒪᒋᔭᐅᑎᙱᒃᑯᕕᐅᒃ, ᐃᓅᓯᖕᓂᒃ ᐊᒃᑐᖅᓯᕐᔪᐊᖅᑐᒻᒪᕆᐅᔪᓐᓇᖅᑐᖅ. ᐊᕐᓇᐃᑦ ᓯᖓᐃᔪᓐᓇᐃᓪᓕᔪᓐᓇᑐᐃᓐᓇᕆᐊᓖᑦ ᐊᖑᑏᓪᓗ  ᕿᑐᕐᙵᖅᑖᖅᑎᑦᑎᔪᓐᓇᐃᓪᓕᓗᑎᒃ.
 
ᓯᖓᐃᔪᑦ ᐊᕐᓇᐃᑦ gonorrhea-ᒥᒃ ᐊᐃᑦᑐᕐᓗᐃᔪᓐᓇᖅᑐᑦ ᓄᑕᕋᓛᒥᓄᑦ ᕿᑐᕐᙵᖅᑖᕆᓂᕈᓂᐅᒃ. ᖃᐅᔨᓴᖅᑕᐅᒍᕕᑦ ᓯᖓᐃᓕᕈᕕᑦ ᖃᓄᐃᙱᑦᑎᐊᕐᓂᕐᓂᒃ ᓇᓗᓇᙱᑎᑦᑎᑐᐃᓐᓇᔾᔮᙱᓚᖅ, ᑭᓯᐊᓂᑦᑕᐅᖅ ᓄᑕᕋᓛᕐᓂᒃ ᓴᐳᔾᔨᓯᒪᖕᒥᓗᓂ.

Top

Syphilis

Syphilis-ᖑᓂᕋᖅᑕᐅᔪᖅ ᐱᕐᔪᐊᒻᒪᕆᐊᓘᕗᖅ STI-ᖑᓪᓗᓂ ᐊᐃᑦᑐᕐᓘᑕᐅᕙᒃᖢᓂ ᐃᓄᖕᒥᑦ ᐃᓄᖕᒧᑦ ᓴᐳᔾᔨᔾᔪᑎᖃᙱᖦᖢᑎᒃ ᖃᓂᒃᑯᒃ, ᐃᑎᒃᑯᑦ ᐅᑦᑐᒃᑯᓪᓘᓐᓃᑦ ᓄᓕᐊᖃᑎᒌᒃᑐᖃᕌᖓᑦ. ᐊᑐᖅᑐᖃᖅᐸᑦ ᖃᓂᕐᒧᑦ ᐊᕙᓗᑦᑎᓯᒪᔪᒥᒃ ᒪᑯᓂᖓᓗ, ᐅᓲᑉ ᐴᖏᓐᓂᒃ ᐊᑐᑦᑎᐊᕐᓗᒋᓪᓗ, ᓄᖅᑲᖅᑎᑦᑎᓯᒪᕙᒃᐳᖅ ᑕᒪᑐᒥᖓ ᐊᐃᑦᑐᕐᓘᑕᐅᔪᓐᓇᖅᑐᒥᒃ ᓯᐊᒻᒪᒃᑎᖅᑎᓐᓇᒍ. ᖃᓄᐃᙱᑦᑎᐊᕆᕗᖅᑕᐅᖅ ᓇᖕᒥᓂᖅ ᐊᐃᑉᐸᐃᓪᓗ ᖃᐅᔨᓴᖅᑕᐅᒍᔅᓯᒃ ᖃᐅᔨᒪᙱᑐᐃᓐᓇᕆᐊᖃᕋᔅᓯᒃ ᑕᐃᒪᐃᑦᑐᖃᕐᓂᔅᓯᖕᓄᑦ.  ᓴᐳᔾᔨᔾᔪᑎᓂᒃ ᐊᑐᕐᓂᓯᒃ ᖃᐅᔨᓴᖅᑕᐅᓂᕐᓗ ᐊᑐᖅᑕᐅᔪᓐᓇᖅᑐᐃᓐᓇᐅᕗᒃ ᓄᓕᐊᕐᓂᒃᑯᑦ ᖁᐊᕐᓵᕐᓇᖅᑐᒧᐊᖅᑎᑦᑎᙱᓐᓂᖅᓴᐅᔪᓐᓇᖅᖢᑎᒃ ᐃᓕᖕᓂᒡᓗ ᐱᖃᑎᒋᕙᒃᑕᖕᓂᒡᓗ, ᐃᒃᐱᒋᖃᑦᑕᐅᑎᑦᑎᐊᖅᖢᓯᒡᓗ.

Syphilis-ᖃᕐᓂᖅ, ᑕᒪᐃᖕᓂ ᐊᖑᑎᓂ ᐊᕐᓇᓂᓗ, ᓴᖅᑭᑉᐸᓪᓕᐊᕙᒃᐳᖅ ᐱᐅᔪᓐᓃᖅᐸᓪᓕᐊᓪᓗᓂ ᑎᓴᒪᐃᓕᖅᑲᖓᓪᓗᓂ.

• ᐱᒋᐊᕐᓂᖓᓂ 1-ᒥ, ᐋᓐᓂᐊᙱᑦᑐᒥᒃ ᐋᓐᓂᐊᒥ ᐊᑎᖃᖅᑐᒥᒃ ᖃᓪᓗᓈᑎᑐᑦ ᐃᒪᓐᓇ chancre-ᒥᒃ (pronounced kanker) ᓴᖅᑭᑦᑐᖃᑐᐃᓐᓇᕆᐊᓕᒃ ᐅᓪᓗᐃᑦ 9-ᓗ 90-ᓗ ᐊᑯᓐᓂᖏᓐᓂ ᑕᐃᒪᐃᑦᑐᓕᖕᒥᒃ ᐱᖃᑎᖃᖅᑐᖄᓪᓚᓚᐅᕐᓗᓂ, ᓴᖅᑭᓕᕐᓗᓂᓗ ᐅᓱᒃᑯᑦ, ᐅᑦᑑᑉ ᐃᓗᐊᒍᑦ ᐊᕙᓗᐊᒍᓪᓘᓐᓃᑦ, ᖃᓂᐅᓪᓘᓐᓃᑦ ᐃᑎᐅᓪᓘᓐᓃᑦ ᐃᓗᐊᒍᑦ. ᑕᒪᒃᑯᐊ ᐋᓐᓂᐊᕐᓇᐃᑦ ᑕᑯᔭᐅᒐᔪᙱᑦᑐᓐᓇᑦᑎᐊᖅᐳᑦ, ᑕᐃᒪᐃᓐᓂᖓᓄᓪᓗ ᖃᐅᔨᒪᙱᑐᐃᓐᓇᕆᐊᖃᖅᑐᑎᑦ ᑕᐃᒪᐃᑦᑐᖃᓚᐅᖅᓯᒪᖕᒪᖔᖅᐱᑦ.
• ᑐᒡᓕᐊᓂ 2-ᒥ, ᑕᒪᓐᓇ 6-ᓂᒃ ᐱᓇᓱᐊᕈᓯᕐᓂᑦ 6-ᓄᑦ ᑕᖅᑭᓄᑦ ᐊᓂᒍᖅᓯᒪᓕᖅᑎᓪᓗᒍ ᐊᐃᑦᑐᕐᓗᒃᑕᐅᔪᖄᓪᓚᓚᐅᕐᓗᓂ, ᐆᑎᕐᓇᖅᑐᖃᓕᑐᐃᓐᓇᕆᐊᓕᒃ ᑎᒥᓕᒫᖓᓗ ᐱᖑᔭᒡᓗᓂ ᑕᒪᓐᓇᓗ ᐅᔾᔨᕐᓇᕐᓂᖅᐹᖑᓗᓂ ᐊᒡᒐᕕᑦ ᐃᑎᒪᖏᓐᓂ ᐃᓯᒐᕕᓪᓗ ᐊᓗᖏᓐᓂ. ᑕᒪᒃᑯᐊ syphilis-ᖃᕐᓂᕐᒧᑦ ᖃᐅᔨᔾᔪᑏᑦ ᐅᔾᔨᕆᙱᑐᐃᓐᓇᕆᐊᖃᖅᐸᑎᑦ, ᑕᐃᒪᐃᓐᓂᖓᓄᓪᓗ ᐃᓱᒪᑐᐃᓐᓇᕆᐊᖃᖅᖢᑎᑦ ᑕᐃᒪᐃᑦᑐᖃᙱᓐᓂᕐᓂᒃ.
• ᖃᐅᔨᔾᔪᑕᐅᔪᓐᓇᖅᑐᓂᒃ ᐱᑕᖃᖅᐸᙱᓚᖅ ᐱᖓᔪᖓᓐᓂ 3-ᒥ, ᑭᓯᐊᓂ ᑕᒪᓐᓇ ᐊᐃᑦᑐᕐᓗᒃᑕᐅᓯᒪᓃᑦ ᓯᐊᒻᒪᒃᐸᓪᓕᐊᓪᓗᓂ ᑎᒥᒃᑯᑦ, ᑕᒪᓐᓇᓗ ᑕᐃᒪᐃᓕᐅᖅᐸᓪᓕᐊᕙᒃᖢᓂ ᐊᕐᕌᒍᓄᑦ ᐱᖓᓱᓄᑦ!
• ᑎᓴᒪᖓᓐᓂ 4-ᒥ, ᑕᒪᓐᓇᓗ ᓴᖅᑭᙱᑐᐃᓐᓇᕆᐊᖃᖅᖢᓂ ᐊᕐᕌᒍᒐᓴᖕᓄᑦ ᓯᕗᓪᓕᖅᐹᒥᒃ ᐊᐃᑦᑐᕐᓗᒃᑕᐅᕌᓪᓚᓚᐅᖅᖢᑎᑦ, ᐃᓗᐊᖅᓴᖅᑕᐅᓯᒪᙱᑦᑐᖅ syphilis-ᖑᓂᕋᖅᑕᐅᔪᖅ ᑕᐅᑐᒍᓐᓃᖅᑎᑦᑎᔪᓐᓇᖅᑐᖅ, ᖃᕋᓴᐃᑦ ᓱᕋᒃᐸᓪᓕᐊᓕᕐᓗᓂ, ᐆᒻᒪᑎᕐᓗᓕᕐᓗᑎᑦ, ᓄᑭᖃᕈᓐᓃᕐᓗᑎᑦ ᑐᖁᒻᒪᕆᒡᓗᑎᓪᓘᓐᓃᑦ.

ᓯᖓᐃᒍᕕᑦ, ᑕᒪᓐᓇ syphilis-ᖑᓂᕋᖅᑕᐅᔪᖅ ᐃᕐᓂᐊᕆᙱᑕᕐᓄᑦ ᓱᓕ ᓄᑕᕋᓛᒃᓴᓄᐊᕈᓐᓇᖅᐸᐃᑦ. ᑕᒪᓐᓇ ᖃᓪᓗᓈᑎᑐᑦ ᐃᒪᓐᓇ ᑕᐃᔭᐅᕙᒃᑐᖅ, congenital syphilis. ᓄᑕᕋᓛᑦ ᐃᓅᔪᑦ syphilis-ᖃᕐᓗᑎᒃ ᑕᐅᑐᙱᑐᐃᓐᓇᕆᐊᓖᑦ, ᑐᓵᙱᓪᓗᑎᒃ ᐃᓅᓯᕐᒥᓗ ᐱᕙᓪᓕᐊᓂᕆᔭᖏᑦ ᑭᖑᕙᓯᒡᓗᑎᒃ. ᓴᐅᓂᖏᑦ ᐋᖅᑭᒃᐸᓪᓕᐊᙱᑐᐃᓐᓇᕆᐊᓖᑦ ᐋᖅᑭᒃᐸᓪᓕᐊᓂᕆᔭᐅᕙᒃᑐᑎᑐᑦ, ᐃᓅᓗᑎᒡᓘᓐᓃᑦ ᐊᓂᕐᓂᖃᙱᓪᓗᑎᒃ. ᖃᐅᔨᓴᖅᑕᐅᒍᕕᑦ ᓯᖓᐃᓂᕐᓂ ᖃᐅᔨᒪᑦᑎᐊᑐᐃᓐᓇᔾᔮᙱᓚᑎᑦ ᖃᓄᐃᙱᑦᑎᐊᕐᓂᕐᓄᑦ, ᑭᓯᐊᓂᑦᑕᐅᖅ ᓄᑕᕋᓛᒃᓴᕐᓂᒃ ᓴᐳᔾᔨᓯᒪᓂᐊᕆᕗᑎᑦ.

ᐊᐃᑦᑐᕐᓘᑎᒋᔪᓐᓇᖅᐸᐃᑦ ᑕᒪᓐᓇ syphilis-ᖑᓂᕋᖅᑕᐅᔪᖅ ᓄᓕᐊᖃᑎᒋᕙᒃᑕᕐᓄᑦ ᓇᐅᒃᑯᓕᒫᖅ ᐊᐃᑦᑐᕐᓗᒃᑕᐅᓯᒪᓂᖃᕐᓂᕐᓂ. ᑕᒪᒃᑯᐊ ᖃᐅᔨᔾᔪᑕᐅᔪᓐᓇᖅᑐᑦ ᑕᐃᒪᐃᑦᑐᖃᕐᓂᕐᓂᒃ ᖃᐅᔨᙱᑦᑐᓐᓇᕐᓂᖏᓐᓄᑦ, ᖃᐅᔨᙱᑐᐃᓐᓇᕆᐊᖃᖅᑐᑎᑦ ᑕᐃᒪᐃᑦᑐᖃᕐᓂᕐᓄᑦ.

Syphilis-ᖑᓂᕋᖅᑕᐅᔪᖅ ᐃᓗᐊᖅᓴᖅᑕᐅᕝᕕᐅᔪᓐᓇᖅᐳᖅ ᖃᖓᑐᐃᓐᓇᒃᑯᑦ ᐱᓯᒪᓕᕈᕕᑦ, ᑭᓯᐊᓂ ᖃᐅᔨᓴᖅᑕᐅᔭᕆᐊᖃᖅᐳᑎᑦ ᖃᐅᔨᒪᔪᒪᒍᕕᑦ ᐃᓗᐊᖅᓴᖅᑕᐅᔭᕆᐊᖃᕐᓂᕐᓂᒃ. ᖃᐅᔨᒪᓕᑐᐊᕈᕕᑦ syphilis-ᖃᕐᓂᕐᓂᒃ, ᐃᓗᐊᖅᓴᖅᑕᐅᔪᓐᓇᖅᐳᑎᑦ, ᐊᒻᒪᓗ, ᑕᐃᒪᐃᑦᑐᖃᕐᓂᕐᓂᒃ ᖃᐅᔨᓵᓕᒍᕕᑦ, ᑕᒪᓐᓇ ᐱᖃᕈᓐᓃᒐᒃᓴᐅᕗᖅ ᖁᐱᕐᕈᓄᑦ ᑐᖁᓴᐅᑎᓄᑦ. ᒪᓕᒋᐊᖃᕋᔭᕋᕕᒋᑦ ᐃᓗᐊᖅᓴᖅᑕᐅᓂᕐᒧᑦ ᒪᓕᖁᔭᐅᓯᒪᔪᓕᒫᑦ ᒪᓕᑦᑎᐊᕐᓗᒋᓪᓗ, ᑭᖑᓂᐊᒍᓪᓗ ᖃᐅᔨᓴᖅᑕᐅᑦᑎᐊᒃᑲᓐᓂᕐᓗᑎᑦ ᐃᓗᐊᖅᓴᐃᔨᖕᓂᑦ ᓘᒃᑖᖕᓂᓪᓘᓐᓃᑦ ᖃᐅᔨᒪᑦᑎᐊᕈᒪᒍᕕᑦ ᑕᒪᕐᒥᑦᑎᐊᖅ ᐊᐃᑦᑐᕐᓗᒃᑕᐅᓯᒪᓂᕐᓂᒃ ᖃᐅᔨᔾᔪᑏᑦ ᐱᑕᖃᕈᓐᓃᕋᓗᐊᕐᒪᖔᑕ.

Top

Trichomonas

Trichomonas-ᖑᓂᕋᖅᑕᐅᔪᖅ (ᐃᒪᓐᓇ ᑕᐃᔭᐅᕙᒃᑭᓪᓗᓂ, "Trich") ᐱᑕᖃᖅᑎᑕᐅᕙᒃᐳᖅ ᖁᐱᕐᕈᒥᑦ  ᐅᑦᑐᖕᒦᑦᑐᒥᑦ (ᐊᕐᓇᑎᒍᑦ) ᐃᒪᕐᑐᒥᓘᓐᓃᑦ urethra-ᒥ (ᐊᖑᑎᓂ ᐊᕐᓇᓂᓗ). ᐊᑐᕐᓂᖅ ᖃᓂᕐᒧᑦ ᐊᕙᓗᑦᑎᓯᒪᔪᒥᒃ ᒪᑯᓂᖓᓗ, ᐅᓲᑉ ᐴᖏᓐᓂᒃ ᓄᖅᑲᖅᑎᑦᑎᓯᒪᑦᑎᐊᖅᐸᒃᐳᖅ ᑕᒪᑐᒥᖓ ᐊᐃᑦᑐᕐᓗᐃᕙᓪᓕᐊᓂᕐᒥᒃ. ᐱᐅᒋᕗᖅᑕᐅᖅ ᖃᐅᔨᒪᑦᑎᐊᕈᕕᑦ ᐃᕝᕕᑦ ᐱᖃᑎᒋᕙᒃᑕᐃᓪᓗ ᖃᐅᔨᓴᖅᑕᐅᒍᔅᓯᒃ ᐃᒪᓐᓇᐅᓂᖓᓄᑦ, ᖃᐅᔨᒪᙱᑐᐃᓐᓇᕆᐊᖃᕋᕕᑦ ᑕᐃᒪᐃᑦᑐᖃᕐᓂᕐᓂᒃ. ᓴᐳᔾᔨᔾᔪᑎᓂᒃ ᐊᑐᕐᓂᓯᒃ ᖃᐅᔨᓴᖅᑕᐅᓂᕐᓗ ᐊᑐᖅᑕᐅᔪᓐᓇᖅᑐᐃᓐᓇᐅᕗᒃ ᓄᓕᐊᕐᓂᒃᑯᑦ ᖁᐊᕐᓵᕐᓇᖅᑐᒧᐊᖅᑎᑦᑎᙱᓐᓂᖅᓴᐅᔪᓐᓇᖅᖢᑎᒃ ᐃᓕᖕᓂᒡᓗ ᐱᖃᑎᒋᕙᒃᑕᖕᓂᒡᓗ, ᐃᒃᐱᒋᖃᑦᑕᐅᑎᑦᑎᐊᖅᖢᓯᒡᓗ.

ᑕᐃᒪᐃᑦᑐᖃᕐᓂᕐᒧᑦ ᖃᐅᔨᔾᔪᑕᐅᔪᓐᓇᖅᑐᑦ ᓴᖅᑭᑉᐸᓪᓕᐊᓕᖅᐸᒃᐳᑦ 3-ᓂᑦ 21-ᓄᑦ ᐅᓪᓗᓄ ᐊᐃᑦᑐᕐᓗᒃᑕᐅᕌᓪᓚᓚᐅᖅᑎᓪᓗᑎᑦ.
 
ᐃᓚᖏᑦ ᖃᐅᔨᔾᔪᑕᐅᔪᓐᓇᖅᑐᑦ ᐊᕐᓇᐃᑦ  trichomonas-ᖃᑐᐃᓐᓇᕆᐊᖃᕐᓂᖏᓐᓄᑦ:

• ᐊᓯᔾᔨᖅᓯᒪᔪᖃᓕᕐᓗᓂ ᐅᑦᑐᖕᓂᙶᖅᑐᒥᒃ: ᐊᖏᒡᓕᕙᓪᓕᐊᓗᓂ ᑕᐅᓅᓇ ᓴᖅᑭᑎᑉᐸᓪᓕᐊᕙᒃᑕᐃᑦ, ᑕᒪᓐᓇ ᑭᓂᕈᓐᓃᖅᐹᓪᓕᕐᓗᓂ ᖃᐳᐊᖑᓂᖅᓴᐅᓕᕐᓗᓂᓘᓐᓃᑦ, ᑎᐹᕿᓂᖓᓘᓐᓃᑦ ᐊᔾᔨᒋᔪᓐᓃᕐᓗᓂᐅᒃ;
• ᐅᑦᑐᒃᑯᑦ ᐋᓐᓂᐊᕐᓂᖃᕐᓗᑎᑦ, ᐅᖏᓚᒃᐸᒡᓗᑎᑦ, ᐊᐅᐸᖅᓯᓂᖅᓴᐅᓯᒪᓗᓂᓘᓐᓃᑦ ᐃᓗᐊᒍᑦ ᖄᖓᒍᓪᓗ;
• ᖁᐃᓕᕌᖓᕕᑦ ᐋᓐᓂᐊᖅᐸᒡᓗᓂ;
• ᓄᓕᐊᖃᑎᖃᓕᕌᖓᕕᑦ ᐋᓐᓂᕐᓇᖅᐸᒡᓗᓂ.

ᑕᒪᕐᒥᑲᓴᒃ ᐊᖑᑏᑦ  trichomonas-ᖃᖅᑐᑦ ᖃᐅᔨᔾᔪᑕᐅᔪᓐᓇᖅᑐᓂᒃ ᑕᐃᒪᐃᑦᑐᖃᕐᓂᕐᒥᒡᓘᓐᓃᑦ ᐱᖃᖅᐸᙱᑦᑐᑦ, ᑭᓯᐊᓂ ᐃᓛᓐᓂᒃᑯᑦ ᐊᖑᑎᑦ ᖃᐅᔨᕙᒃᑐᑦ ᐃᓗᐊᙱᑦᑐᖅᑕᖃᕐᓂᖓᓂᒃ ᐋᓐᓂᕐᓇᖅᑐᖃᕐᓂᖓᓂᒡᓘᓐᓃᑦ ᐅᓱᐊᑕ ᐃᓗᐊᒍᑦ, ᐊᖏᓗᐊᙱᑦᑐᒥᒃ ᒪᕿᓂᖃᓕᖅᐸᒃᑐᑦ ᖃᓯᓕᓇᕐᓗᓂᓘᓐᓃᑦ ᖁᐊᕌᓂᒃᑳᖓᒥᒃ ᒪᕿᐊᓂᒃᑳᖓᒥᒡᓘᓐᓃᑦ.

Trichomonas-ᖑᓂᕋᖅᑕᐅᔪᖅ ᐱᑕᖃᕈᓐᓃᖅᑎᑕᐅᔪᓐᓇᖅᐳᖅ ᖁᐱᕐᕈᓄᑦ ᑐᖁᓴᐅᑎᓄᑦ. ᒪᓕᒋᐊᖃᕋᔭᕋᕕᒋᑦ ᑕᒪᕐᒥᑦᑎᐊᖅ ᐃᓗᐊᖅᓴᖅᑕᐅᓂᕐᒧᑦ ᒪᓕᖁᔭᐅᓯᒪᔪᑦ ᒪᓕᑦᑎᐊᕐᓗᒋᓪᓗ, ᑭᖑᓂᐊᒍᓪᓗ ᖃᐅᔨᓴᖅᑕᐅᑦᑎᐊᒃᑲᓐᓂᕐᓗᑎᑦ ᐃᓗᐊᖅᓴᐃᔨᖕᓂᑦ ᓘᒃᑖᖕᓂᓪᓘᓐᓃᑦ ᖃᐅᔨᒪᑦᑎᐊᕈᒪᒍᕕᑦ ᑕᒪᕐᒥᑦᑎᐊᖅ ᐱᖃᕐᓂᕐᓂᒃ ᐊᐃᑦᑐᕐᓗᒃᑕᐅᓯᒪᓂᕐᓂᒃ ᖃᐅᔨᔾᔪᑏᑦ ᐱᑕᖃᕈᓐᓃᕋᓗᐊᕐᒪᖔᑕ. 

HPV

HPV-ᖑᓂᕋᖅᑕᐅᔪᖅ (Human Papilloma Virus) ᐱᑕᖃᒐᔪᖕᓂᖅᐹᖑᕗᖅ STI-ᖑᓂᕋᖅᑕᐅᔪᓂᑦ ᓄᓇᕐᔪᐊᓕᒫᒥ. 100 ᐅᖓᑖᓃᑉᐳᑦ ᐊᔾᔨᒌᙱᑦᑐᑦ ᑕᐃᒪᐃᑦᑐᑦ ᖁᐱᕐᕆᔾᔪᑕᐅᔪᓐᓇᖅᑐᑦ, ᒪᕐᕉᖕᓄᑦ ᐱᓪᓗᐊᑕᕐᓄᑦ ᑕᐅᑐᒃᑕᐅᔪᓐᓇᖅᖢᑎᒃ. "ᖁᐊᖅᓵᕐᓇᓗᐊᙱᓐᓂᕋᖅᑕᐅᔪᑦ", ᑕᒪᒃᑯᐊ ᐊᖕᒪᓂᒃᑯᑦ ᐃᑎᒃᑯᓐᓗ ᐅᙳᖅᑖᕐᓇᖅᖢᑎᒃ, ᒪᑯᐊᓗ "ᖁᐊᖅᓵᕐᓇᕐᓂᕋᖅᑕᐅᔪᓪᓗ", ᑕᒪᒃᑯᐊᓗ ᑳᓐᓱᒃᓴᕐᓂᒃ ᐱᕈᖅᐸᓪᓕᐊᑎᑦᑎᔪᓐᓇᖅᖢᑎᒃ ᑳᓐᓱᑖᖅᑎᑦᑎᔪᓐᓇᖅᖢᑎᒡᓗ ᐅᑯᓄᖓ cervix, vulva, ᐅᑦᑐᖕᒥᒃ, ᐅᓱᖕᒥᒃ, ᐃᑎᕐᒥᒃ, ᓂᐊᖁᕐᒥᒃ ᖁᖓᓯᕐᒥᒡᓗ.

ᑕᒪᕐᒥᑲᓴᒃ ᐃᓄᐃᑦ HPV-ᑖᖅᓯᒪᓂᐊᕐᑐᑦ ᖃᓄᕆᑦᑐᒻᒪᕆᖕᒥᑭᐊᖅ ᐃᓅᓯᕐᒥᓂ, ᖃᐅᔨᔾᔪᑕᐅᔪᓐᓇᖅᑐᓂᒃ ᐱᓯᒪᙱᑦᑐᖃᖅᐸᒃᖢᓂᓗ.  ᐃᒪᓐᓇᐅᒐᔪᒃᑐᖅ, ᑕᒪᓐᓇ ᖁᐱᕐᕆᓯᒪᓂᖅ ᐱᑕᖃᕈᓐᓃᖅᐸᒃᑐᖅ ᐃᒻᒥᓂᒃ ᓇᖕᒥᓂᖅ ᐃᕝᕕᑦ ᐱᖃᕐᓂᕐᓂᒃ ᖃᐅᔨᓚᐅᙲᓐᓇᕐᓗᑎᑦ.  ᐊᓯᐊᒍᓪᓗ ᐃᒪᓐᓇᐅᕙᒃᖢᓂ, ᐱᑕᖃᕈᓐᓃᓚᐅᕐᓗᓂ ᖃᖓᙳᒃᑲᓐᓂᖅᐸᑦ ᐱᑕᖃᓕᒃᑲᓐᓂᕐᒥᓗᓂ.
 
HPV-ᖑᓂᕋᖅᑕᐅᔪᖅ ᓯᐊᒻᒪᒃᑎᖅᑕᐅᕙᒃᐳᖅ ᐊᒃᑐᐊᖃᑦᑕᐅᑎᓂᒃᑯᑦ ᐅᑯᓄᖓ ᐅᓱᒃ, ᐊᑦᑎᖕᓂᖓ ᓈᑉ, ᐅᑦᑐᒃ, vulva  ᐃᑎᒃᑯᓪᓘᓐᓃᑦ. ᑕᒪᓐᓇ ᐊᐃᑦᑐᕐᓘᑕᐅᔪᓐᓇᖅᑐᖅ ᑖᓐᓇ ᑕᐃᒪᐃᑦᑐᖃᖅᑐᖅ ᐱᖃᑎᒋᔭᐅᔪᖅ ᖃᐅᔨᔾᔪᑕᐅᔪᓐᓇᖅᑐᓂᒃ ᐱᖃᙱᒃᑲᓗᐊᖅᐸᑦ ᑕᐃᒪᐃᑦᑐᖃᕐᓂᕐᒥᓂᒡᓗ ᖃᐅᔨᔾᔪᑕᐅᔪᓐᓇᖅᑐᑕᖃᙱᒃᑲᓗᐊᖅᐸᑦ. ᐊᔪᕐᓇᙱᒃᑭᕗᖅᑕᐅᖅ ᐊᑕᐅᓯᐅᙱᑦᑐᒥᒃ HPV-ᑖᕆᐊᒃᓴᖅ. ᐱᑕᖃᙱᑦᑎᐊᖅᐳᖅ ᖃᓄᓕᒫᖅ ᓴᐳᔾᔭᐅᓯᒪᔭᕆᐊᒃᓴᖅ HPV-ᑖᖅᑕᐅᓕᒪᓂᕐᒧᑦ. ᖃᓂᕐᒧᑦ ᐊᕙᓗᑦᑎᓯᒪᔪᒥᒃ ᒪᑯᓂᖓᓗ, ᐅᓲᑉ ᐴᖏᑦ ᐱᐅᓂᖅᐹᖑᕗᑦ ᐃᓕᖕᓂᒃ ᓴᐳᑎᓯᒪᓂᐊᕈᕕᑦ, ᑭᓯᐊᓂᑦᑕᐅᖅ ᑕᒪᒃᑯᐊ ᓴᐳᔾᔨᔾᔪᑎᖅᓯᒪᙱᓐᓂᓯ ᓱᓕ ᐊᐃᑦᑐᕐᓗᒃᑕᐅᕝᕕᐅᔪᓐᓇᖅᐳᑦ.

ᐃᓚᖏᑦ ᖃᐅᔨᔾᔪᑕᐅᔪᓐᓇᖅᑐᑦ ᐊᕐᓇᐃᑦ HPV-ᖃᑐᐃᓐᓇᕆᐊᖃᕐᓂᖏᓐᓂᒃ:

• ᐊᐅᐸᕈᔪᒃᑐᒥᒃ, ᐊᐅᐸᖅᑐᒥᒃ, ᓯᐊᕐᓇᕐᒥᒃ ᖃᐅᓪᓗᖅᑐᓂᒡᓘᓐᓃᑦ ᐅᙳᖃᕐᓗᑎᑦ ᐅᑦᑐᒃᑯᑦ ᐊᒻᒪᓗ/ᐅᕝᕙᓘᓐᓃᑦ ᐃᑎᒃᑯᑦ;
• ᖃᓯᓕᕙᒡᓗᑎᑦ, ᐅᖏᓚᒃᐸᒡᓗᑎᑦ, ᐋᓐᓂᐊᕆᔭᖃᖅᐸᒡᓗᑎᑦ ᐊᐅᓈᕐᓂᖃᖅᐸᒡᓗᑎᓪᓘᓐᓃᑦ ᐊᖕᒪᓂᖅᐱᑦ ᐊᕙᓗᐊᒍᑦ.

ᐃᓚᖏᑦ ᖃᐅᔨᔾᔪᑕᐅᔪᓐᓇᖅᑐᑦ ᐊᖑᑎᑦ HPV-ᖃᑐᐃᓐᓇᕆᐊᖃᕐᓂᖏᓐᓄᑦ:

• ᐊᖏᓗᑎᒃ, ᐊᕿᓪᓗᑎᒃ ᐱᕈᖅᑐᖃᕐᓗᓂ ᐅᓱᒃᑯᑦ ᐃᑎᖅᐱᓪᓘᓐᓃᑦ ᐊᕙᓗᐊᒍᑦ
• ᐅᓯᕋᐅᕐᓗᑎᑦ ᐅᓱᒃᑯᑦ;
• ᐊᐅᓈᕐᓗᑎᑦ ᐊᒻᒪᓗ/ᐅᕝᕙᓘᓐᓃᑦ ᒪᕿᓂᖅᑕᖃᕐᓗᓂ ᐅᓱᒃᑯᑦ;
• ᖁᐃᓕᕌᖓᕕᑦ ᑯᕕᒡᒐᖅᐸᓪᓕᐊᓂᖃᕐᓗᓂ.

HPV-ᒧᑦ ᖁᐱᕐᕆᓯᒪᓂᕐᒧᑦ ᖃᐅᔨᓴᖅᑕᐅᓂᖅ ᑭᒃᑯᑐᐃᓐᓇᓄᑦ ᒪᓂᒪᑎᑕᐅᕙᙱᓚᖅ ᑖᓐᓇᓗ ᖁᐱᕐᕈᖅ ᐃᓗᐊᖅᓴᐅᑎᖃᙱᖦᖢᓂ. ᖁᐊᖅᓵᕐᓇᕐᓂᖅᐹᖑᔪᖅ HPV-ᖃᖅᖢᓂ cancer-ᑖᕐᓂᖅ cervix-ᑯᑦ. ᑕᒪᓐᓇ cervical cancer-ᖃᕐᓂᖅ ᖃᐅᔨᔾᔪᑕᐅᔪᓐᓇᖅᑐᓂᒃ ᐱᑕᖃᖅᐸᙱᓐᓂᖓᓄᑦ ᑭᓯᐊᓂ ᐱᔭᐅᕐᔪᐊᖅᓯᒪᓕᕌᖓᒥ, ᑕᐃᒪᐃᓐᓂᖓᓄᓪᓗ ᐱᕐᔪᐊᒻᒪᕆᐊᓘᕗᖅ ᐊᕐᓇᐃᑦ ᖃᐅᔨᓴᖅᑕᐅᖃᑦᑕᕈᑎᒃ PAP smear-ᑯᑦ ᐊᕐᕌᒍᑕᒫᑦ ᓯᕗᓂᖓᒍᑦ ᖃᐅᔨᒪᔪᒪᒧᑦ ᖃᐅᔨᔾᔪᑕᐅᔪᓐᓇᖅᑐᓂᒃ ᑳᓐᓱᒧᑦ. ᑕᒪᓐᓇ ᐊᑐᖅᑕᐅᔪᓐᓇᕆᕗᖅ ᓇᖕᒥᓂᖅ ᐃᒃᐱᒋᑦᑎᐊᕐᓂᖃᕈᕕᑦ - ᑎᒦᑦ ᑲᒪᒋᑦᑎᐊᕈᕕᐅᒃ ᐃᓕᖕᓂᒃ ᐃᑲᔪᕋᔭᖅᑐᖅ ᖃᓄᐃᙱᑦᑎᐊᕐᓗᓂ ᐊᑯᓂ ᐃᓅᔪᓐᓇᕐᓂᕐᓂᒃ.

HPV-ᖑᓂᕋᖅᑕᐅᔪᖅ ᐊᐃᑦᑑᑕᐅᑐᐃᓐᓇᕆᐊᖃᕆᕗᖅ ᓯᖓᐃᔪᓂᑦ ᐊᕐᓇᓂᑦ ᐃᕐᓂᐊᖅᑖᕆᓯᒪᙱᑕᒥᓄᑦ ᓱᓕ ᓄᑕᕌᓛᒃᓴᒥᓄᑦ. ᐅᖃᖃᑎᒋᓂᐊᖅᐸᐃᑦ ᓘᒃᑖᕆᔭᐃᑦ/ᓇᔭᙳᐊᕆᔭᐃᓪᓘᓐᓃᑦ ᑕᒪᑐᒧᖓ ᖁᐊᖅᓵᕐᓇᖅᑐᒧᑦ ᐃᓱᒫᓘᑎᖃᕈᕕᑦ.

HPV-ᖃᕈᓐᓃᕐᓇᖅᑐᒥᒃ ᐃᓗᐊᖅᓴᐅᑎᑕᖃᙱᒃᑲᓗᐊᖅᑎᓪᓗᒍ, ᐅᙳᐃᑦ ᐃᓗᐊᖅᓴᖅᑕᐅᔪᓐᓇᖅᑐᑦ. ᐅᖃᓪᓚᖃᑎᒋᓂᐊᖅᐸᐃᑦ ᐃᓗᐊᖅᓴᐃᔩᑦ ᓘᒃᑖᕆᔭᐃᓪᓘᓐᓃᑦ ᑭᓱᑦ ᐃᓕᖕᓄᑦ ᑕᒪᑐᒧᖓ ᓈᒻᒪᒃᑲᔭᕐᒪᖔᑕ.
 
HPV ᒥᒃᓵᓄᑦ ᖃᐅᔨᒃᑲᓐᓂᕈᒪᒍᕕᑦ, ᐅᓇ ᐊᑦᑕᑕᕐᕕᒃ ᖃᐅᔨᒋᐊᕈᓐᓇᖅᑕᐃᑦ:
http://www.hpvinfo.ca/hpvinfo/teens/index.aspx

Top

Genital Herpes

Genital herpes-ᖑᓂᕋᖅᑕᐅᔪᖅ ᐋᓐᓂᕐᓇᖅᖢᓂ STI-ᖑᕗᖅ ᐋᓐᓂᐊᖅᑐᓂᒃ ᓴᖅᑭᑎᑦᑎᕙᒃᖢᓂ ᐅᓲᑉ ᖄᖓᒍᑦ ᐊᕙᑖᒍᓪᓘᓐᓃᑦ, ᐅᑦᑐᒃᑯᑦ ᐊᒻᒪᓗ/ᐅᕝᕙᓘᓐᓃᑦ ᐃᑎᒃᑯᑦ. ᑕᒪᓐᓇ ᓴᖅᑭᑎᑕᐅᕙᒃᐳᖅ ᐆᒧᖓ herpes simplex virus-ᖑᓂᕋᖅᑕᐅᔪᒧᑦ. ᒪᕐᕉᕗᒃ ᐊᔾᔨᒌᙱᑦᑑᒃ herpes simplex virus-ᑖᕆᔭᐅᔪᓐᓇᖅᑑᒃ. ᐃᒪᐃᑦᑐᖅ 2 ᓴᖅᑭᑎᑦᑎᒐᔪᒃᐸᒃᑐᖅ herpes-ᖃᕐᓂᕐᒧᑦ ᓴᖅᑭᑦᑐᓂᒃ ᐊᖕᒪᓃᑦ ᐊᕙᓗᖏᑎᒍᑦ, ᑭᓯᐊᓂᑦᑕᐅᖅ herpes-ᖃᕐᓂᕐᒧᑦ ᓴᖅᑭᑦᑐᖃᕈᓐᓇᕆᓪᓗᓂ ᖃᓂᐅᑉ ᐊᕙᓗᐊᒍᑦ. ᐃᒪᐃᑦᑐᖅ 1 ᓴᖅᑭᑎᑦᑎᒐᔪᒃᐸᒃᐳᖅ herpes-ᖃᕐᓂᕐᒧᑦ ᓴᖅᑭᑦᑐᓂᒃ (ᓄᕙᖕᓂᕐᒧᑦ ᐋᓐᓂᐊᕆᔭᐅᕙᒃᑐᑦ) ᖃᓂᐅᑉ ᐊᕙᓗᐊᒍᑦ, ᑭᓯᐊᓂᑦᑕᐅᖅ ᑕᒪᓐᓇ, herpes-ᖃᕐᓂᕐᒧᑦ ᓴᖅᑭᑎᑦᑎᔪᓐᓇᖅᐳᖅ ᐊᖕᒪᓃᑦ ᐊᕙᓗᖏᑎᒍᑦ. ᑕᐃᒪᐃᓐᓂᖓᓄᓪᓗ, ᐃᕝᕕᓪᓘᓐᓃᑦ ᐊᐃᑉᐸᐃᓪᓘᓐᓃᑦ  herpes-ᖃᕐᓂᕐᒧᑦ ᖁᐱᕐᕆᓯᒪᒍᔅᓯᒃ, ᖃᓂᖅᐱᓪᓘᓐᓃᑦ ᐊᕙᑖᒍᑦ ᐅᕝᕙᓘᓐᓃᑦ ᖄᖏᑎᒍᑦ/ᐊᕙᓗᖏᑎᒍᑦ ᐊᖕᒪᓂᕕᑦ, ᑕᒪᓐᓇ ᐊᐃᑦᑐᕐᓘᑎᒋᔪᓐᓇᖅᑕᐃᑦ ᐊᐃᑉᐸᕕᑦ ᖃᓂᐊᓄᑦ ᐊᖕᒪᓂᖏᓐᓄᓪᓘᓐᓃᑦ.

Genital Herpes-ᖑᓂᕋᖅᑕᐅᔪᖅ ᓯᐊᒻᒪᒃᑎᖅᑕᐅᓛᖑᔪᓐᓇᖅᐳᖅ ᑕᒪᒃᑯᐊ ᐋᓐᓂᐊᕐᓃᑦ ᓴᖅᑭᔮᕌᖓᑕ. ᑭᓯᐊᓂᑦᑕᐅᖅ, genital herpes-ᑖᕈᓐᓇᕆᕗᑎᑦ ᐊᐃᑉᐸᕐᓂᑦ ᑕᑯᔪᓐᓇᙱᑦᑎᐊᕋᓗᐊᕈᕕᑦ ᐋᓐᓂᐊᕐᓂᕐᓂᒃ ᑎᒥᖏᓐᓂ. ᑕᒪᒃᑯᐊ ᖃᓂᕐᒧᑦ ᐊᕙᓗᑦᑎᓯᒪᔾᔪᑏᑦ ᒪᑯᐊᓗ, ᐅᓲᑉ ᐴᖏᑦ  ᑎᒥᐅᑉ ᐃᓚᐃᓐᓇᑯᓗᐊᓂᒃ ᒥᑭᑦᑐᒥᒃ ᖃᓪᓕᖅᓯᓯᒪᕙᖕᓂᖏᓐᓄᑦ, ᐊᑕᙱᑦᑎᐊᖅᖢᑎᒃ genital herpes-ᒧᑦ ᓴᐳᔾᔨᓯᒪᕙᙱᓚᑦ. ᐱᐅᓂᖅᐹᖑᓇᔭᖅᑐᖅ ᐃᓕᖕᓄᑦ ᓴᐳᔾᔨᓯᒪᓗᓂᓗ ᖃᐅᔨᓴᖅᑕᐅᓂᓯᒃ ᐊᐃᑉᐸᐃᓪᓗ ᓄᓕᐊᖃᑎᒌᒍᒪᓚᐅᙱᓐᓂᔅᓯᓐᓂᒃ. ᖃᐅᔨᓴᖅᑕᐅᓗᓂ ᑕᑯᑎᑦᑎᔪᓐᓇᖅᐳᑎᑦ ᐃᒃᐱᒋᔭᖃᑦᑎᐊᕐᓂᕐᓂᒃ ᖃᓄᐃᙱᑦᑎᐊᕈᓐᓇᕐᓂᕐᓂᒃ ᐊᐃᑉᐸᕕᓪᓗ ᖃᓄᐃᙱᑦᑎᐊᕈᓐᓇᕐᓂᖓᓄᑦ.
 
ᐅᓪᓗᓂᒃ ᐊᒥᓲᙱᑦᑐᓂᒃ ᐱᓇᓱᐊᕈᓯᕐᒧᑦ ᐊᑐᖅᑐᖃᕋᔪᒃᐳᖅ ᖃᐅᔨᔾᔪᑕᐅᔪᓐᓇᖅᑐᑦ herpes-ᖃᕐᓂᕐᒧᑦ ᐅᔾᔨᕆᔾᔪᑕᐅᓕᕈᓐᓇᖅᑐᓂᒃ. ᐊᐃᑦᑐᕐᓗᒃᑕᐅᓯᒪᔪᖃᖅᐸᑦ herpes-ᒧᑦ, ᑕᒪᕐᒥᒃ ᐊᖑᑎᑦ ᐊᕐᓇᐃᓪᓗ ᐅᔾᔨᕆᔭᖃᕋᔭᖅᑐᑦ ᐃᒃᐱᖕᓇᖅᑐᒥᒃ ᐅᖏᓚᖕᓇᖅᑐᒥᒡᓘᓐᓃᑦ ᐊᖕᒪᓂᖏᑕ ᐊᕙᓗᐊᒍᑦ. ᖃᖓᙳᒃᑲᓐᓂᐊᕐᔪᒃᐸᑦ, ᐱᑕᖃᓕᕋᔭᖅᑐᖅ ᖃᔅᓯᑲᓪᓚᑯᓗᖕᓂᒃ ᒥᑭᒃᑐᒻᒪᕆᑯᓗᖕᓂᒃ ᐃᒻᒪᒃᓯᒪᔪᓂᒃ. ᑕᒪᒃᑯᐊ ᐃᒻᒪᒃᓯᒪᓃᑦ ᖄᕌᖓᑕ, ᐱᑕᖃᓕᖅᑎᑦᑎᕙᒃᑐᑦ ᐋᓐᓂᐊᖅᑐᓂᒃ ᖄᖃᙱᒃᑐᓂᒃ ᐅᓲᑉ, ᐅᑦᑑᑉ ᐊᕙᓗᖏᑎᒍᑦ ᐊᒻᒪᓗ/ᐅᕝᕙᓘᓐᓃᑦ ᐃᑎᒃᑯᑦ.; ᑕᒪᒃᑯᐊ ᐋᓐᓂᐊᕐᓇᐃᑦ ᓴᖅᑭᔮᖅᐸᒃᑐᑦ ᐱᓇᓱᐊᕈᓰᖕᓂᑦ ᒪᕐᕉᖕᓂᑦ ᐱᓇᓱᐊᕈᓯᕐᓄᑦ ᑎᓴᒪᓄᑦ.

ᐃᓗᐊᖅᓴᐅᑎᑕᖃᙱᓚᖅ ᐋᓐᓂᐊᖃᕈᓐᓃᕐᓇᖅᑐᒥᒃ herpes-ᒥᒃ. ᐃᓚᖏᑦ ᐃᓄᐃᑦ ᐊᑕᐅᓯᐊᑐᐃᓐᓇᕐᓗᑎᒃ ᑕᐃᒪᐃᑦᑐᒥᒃ ᓴᖅᑭᔮᕐᕕᐅᓇᔭᖅᑐᑦ, ᑭᓯᐊᓂᑦᑕᐅᖅ ᐃᓚᖏᑦ ᐃᓅᓯᓕᒫᒥᓂ ᑕᐃᒪᐃᑦᑐᖃᖃᑦᑕᐃᓐᓇᕋᔭᖅᑐᑦ. ᐃᓚᖏᑦ ᐃᓄᐃᑦ ᐊᐃᑦᑐᕐᓗᒃᑕᐅᓯᒪᔪᑦ ᑕᑯᒃᓴᐅᓕᕐᕕᐅᕙᙱᑐᐃᓐᓇᕆᐊᓖᑦ ᑕᐃᒪᐃᑦᑐᖃᕐᓂᕐᒥᓂᒃ. ᖃᐅᔨᓴᖅᑕᐅᓗᑎᑦ ᖃᐅᔨᔭᐅᒍᕕᑦ ᑕᐃᒪᐃᑦᑐᖃᕐᓂᕐᓄᑦ, ᐃᓗᐊᖅᓴᐃᔩᑦ ᓘᒃᑖᓪᓘᓐᓃᑦ ᐃᓕᖕᓂᒃ ᐃᓗᐊᖅᓴᐃᑎᑎᑦᑎᔪᓐᓇᖅᑐᑦ ᐱᑐᐃᓐᓇᐅᙱᑦᑐᓂᒃ ᐃᓕᖕᓂᒃ ᐃᑲᔪᕋᔭᖅᑐᓂᒃ ᑲᒪᒋᔭᖃᕐᓂᕐᒧᑦ ᑕᒪᑐᒥᖓ ᐊᐃᑦᑐᕐᓗᒃᑕᐅᓯᒪᓂᕐᓂᒃ ᒥᑭᒡᓕᒋᐊᖅᑎᑦᑎᓗᓂᓗ ᓴᖅᑭᒐᔪᒍᓐᓃᖅᑎᑦᑎᓗᓂ ᐊᑯᓂᐅᑎᑦᑎᙱᓐᓂᖅᓴᐅᓗᓂᓗ ᑕᐃᒪᐃᑐᖃᕐᓂᕐᒧᑦ ᓴᖅᑭᓕᖅᐸᒃᑐᓂᒃ.
 
ᐃᓕᖕᓂᒃ ᓴᐳᑎᓯᒪᔪᒪᒍᕕᑦ ᑕᒪᑐᒧᖓ genital herpes-ᒧᑦ, ᐅᓲᑉ ᐴᖏᓐᓂᒃ ᐊᑐᐃᓐᓇᐅᔭᕐᓗᑎᑦ ᐃᒪᐃᑦᑐᓂᒡᓘᓐᓃᑦ ᖃᓂᕐᒧᑦ ᐊᕙᓗᑦᑎᓯᒪᔾᔪᑎᓂᒃ ᓄᓕᐊᖃᑎᖃᓕᕌᖓᕕᑦ ᖃᓄᑐᐃᓐᓇᕐᓗ ᓄᓕᐊᕐᓂᒃᑯᑦ ᐊᒃᑐᖅᓯᑦᑕᐃᓕᕙᒡᓗᑎᑦ ᐃᓄᖕᒧᑦ ᓴᖅᑭᔮᖅᑐᓂᒃ ᐋᓐᓂᐊᖃᖅᑐᒧᑦ ᖃᓂᕐᒥᒍᑦ ᐊᕙᓗᐊᒍᓪᓘᓐᓃᑦ ᐊᖕᒪᓂᒥᓂᑎᒍᓪᓘᓐᓃᑦ.

ᐊᓈᓇᒋᔭᐅᔪᖅ herpes-ᒥᒃ ᖁᐱᕐᕆᓐᓇᖅᑐᒥᒃ ᐊᐃᖅᑐᕐᓗᐃᔪᓐᓇᖅᑐᖅ ᓄᑕᕋᓛᒥᓄᑦ ᐃᕐᓂᐊᕆᓕᕈᓂᐅᒃ, ᑕᒪᓐᓇᓗ ᓴᖅᑭᑎᑦᑎᓕᑐᐃᓐᓇᕆᐊᖃᖅᖢᓂ ᐃᓅᓯᕐᒧᑦ-ᖁᐊᖅᓵᕐᓇᖅᑐᒥᒃ ᐋᓐᓂᐊᖅᑖᕐᒥᒃ ᓄᑕᕋᓛᑉ ᑎᒥᖓᓄᑦ ᐊᑐᖅᐸᒃᑐᓂᒃ. ᖃᐅᔨᓴᖅᑕᐅᓂᖅ ᓯᖓᐃᓕᕈᕕᑦ ᖃᐅᔨᒪᔾᔪᑎᒋᑐᐃᓐᓇᔾᔮᙱᑕᐃᑦ ᖃᓄᐃᙱᑦᑎᐊᕐᓂᕐᓂᒃ, ᑭᓯᐊᓂᓗᑦᑕᐅᖅ ᓄᑕᕋᓛᕐᓂᒃ ᓴᐳᔾᔨᓯᒪᖕᒥᓗᓂᑦᑕᐅᖅ. ᓯᖓᐃᒍᕕᑦ ᓯᖓᐃᓕᕈᕕᓪᓘᓐᓃᑦ  herpes-ᖃᕐᓗᑎᓪᓗ, ᐅᖃᐅᑎᓂᐊᖅᐸᐃᑦ ᓘᒃᑖᕆᔭᐃᑦ.

Hepatitis B - ᖑᓂᕋᖅᑕᐅᔪᖅ

Hepatitis B-ᖑᓂᕋᖅᑕᐅᔪᖅ (ᐃᒪᓐᓇ ᑕᐃᔭᐅᕙᒃᑭᓪᓗᓂ, Hep B) STI-ᖑᕗᖅ ᓱᕋᒃᑎᕆᕙᒃᖢᓂ ᑎᖑᖕᒥᒃ. ᑕᒪᓐᓇ ᐊᐃᑦᑐᕐᓘᑕᐅᕙᒃᑐᖅ ᓴᐳᔾᔨᔾᔪᑎᖃᙱᓪᓗᓂ ᖃᓂᒃᑯᑦ, ᐃᑎᒃᑯᑦ ᐅᑦᑐᒃᑯᓪᓗ ᓄᓕᐊᖅᑐᖃᓕᕌᖓᑦ. ᖃᓂᕐᒧᑦ ᐊᕙᓗᑦᑎᓯᒪᔾᔪᑎᓂᒃ ᐅᓲᓪᓗ ᐴᖓᓂᒃ ᐊᑐᖅᐸᒡᓗᓂ ᓄᖅᑲᖅᑎᑦᑎᓯᒪᑦᑎᐊᖅᐸᒃᐳᖅ ᑕᒪᑐᒥᖓ ᐊᐃᑦᑐᕐᓘᑕᐅᔪᓐᓇᖅᑐᒥᒃ ᓯᐊᒻᒪᒃᑎᕆᙱᖦᖢᓂ.  ᐱᐅᒋᕗᖅᑕᐅᖅ ᖃᐅᔨᒪᑦᑎᐊᕈᕕᑦ ᐃᕝᕕᓪᓗ ᐱᖃᑎᒋᕙᒃᑕᐃᓪᓗ ᑕᒪᔅᓯᒃ ᑲᐱᔭᐅᒍᔅᓯᒃ ᑕᒪᑐᒪ Hepatitis B-ᖑᓂᕋᖅᑕᐅᔫᑉ ᐅᓇᑕᐅᑎᒃᓴᖓᓂᒃ. ᓴᐳᔾᔨᔾᔪᑎᓂᒃ ᐊᑐᖅᐸᒡᓗᓂ ᖃᐅᔨᓴᖅᑕᐅᓂᕐᓗ ᐊᑐᖅᑕᐅᔪᓐᓇᖅᑐᐃᓐᓇᐅᕗᒃ ᓄᓕᐊᕐᓂᕐᒥᒃ ᖁᐊᖅᓵᕐᓇᙱᓐᓂᖅᓴᐅᑎᑦᑎᓗᑎᒃ ᐃᓕᖕᓂᒡᓗ ᐊᐃᑉᐸᖕᓂᒡᓗ ᐃᒃᐱᒋᑦᑎᐊᕐᓂᔅᓯᓐᓂᒃ.

ᖃᔅᓯᑲᓪᓚᐃᑦ ᐃᓄᐃᑦ Hepatitis B-ᒥᒃ ᐊᐃᑦᑐᕐᓗᒃᑕᐅᓯᒪᓂᕐᒥᓂᒃ ᓴᖅᑭᕝᕕᐅᕙᙱᑦᑐᑦ. ᑕᒪᒃᑯᐊᓕ ᓴᖅᑭᕝᕕᐅᓯᒪᔪᑦ, ᐊᑐᕋᔭᖅᑐᒃᓴᐅᕗᑦ "ᐆᑎᕐᓇᖅᑰᔨᓂᕐᒥᒃ" ᖃᐅᔨᔾᔪᑕᐅᔪᓐᓇᖅᑐᓂᒃ ᓲᕐᓗ ᑕᖃᓯᒪᓂᖅ, ᓇᒡᒍᐊᒥᒍᑦ ᐋᓐᓂᐊᕈᓘᔭᕐᓗᑎᒃ, ᓈᙳᑲᑕᒡᓗᑎᒃ, ᑳᒍᓐᓇᐃᓪᓕᓗᑎᒃ ᒥᕆᐊᙳᑲᑕᒡᓗᑎᒡᓗ. 45-ᓂᑦ ᐅᓪᓗᓂᑦ 180-ᓄᑦ ᐅᓪᓗᓄᑦ ᐊᑐᖅᑐᖃᑐᐃᓐᓇᕆᐊᓕᒃ ᐊᐃᑦᑐᕐᓗᒃᑕᐅᔪᖄᓪᓚᓚᐅᕐᓗᓂ ᖃᐅᔨᔾᔪᑕᐅᔪᓐᓇᖅᑐᑦ ᓴᖅᑭᓐᓇᓱᖕᓂᖏᓐᓂ.

ᒪᕐᕈᐃᓕᖅᑲᖓᕗᒃ ᐊᑐᖅᑕᐅᓇᔭᖅᑐᒃ Hepatitis B-ᒥᒃ ᐊᐃᑦᑐᕐᓗᒃᑕᐅᓯᒪᔪᖃᕐᓗᓂ. ᐃᓄᒃ ᓯᕗᓪᓕᕐᒥᒃ ᐊᐃᑦᑐᕐᓗᒃᑕᐅᒍᓂ, ᑕᒪᓐᓇ ᐃᒪᓐᓇ, "acute" (ᕿᓚᒥᑯᓘᓗᓂ) ᑕᐃᔭᐅᕙᒃᐳᖅ ᐊᐃᑦᑐᕐᓘᑕᐅᓪᓗᓂ. ᐊᒥᓱᐃᑦ ᐃᓄᐃᑦ ᐱᔪᓐᓃᖅᐸᒃᐳᑦ ᑕᐃᒪᐃᕌᓚᓚᐅᖅᖢᑎᒃ ᑕᖅᑭᓂ ᐅᓐᓄᙱᑦᑐᓂ ᑎᒥᖏᑦ ᓴᓇᕙᓪᓕᐊᓂᖏᓐᓄᑦ ᐅᓇᑕᐅᑎᒃᓴᓂᒃ ᑕᒪᑐᒧᖓ ᖁᐱᕐᕈᕐᒧᑦ ᑕᒪᑐᒥᖓᓗ ᖁᐱᕐᕆᓯᒪᔭᒥᓂᒃ ᐅᓇᑖᕆᔭᖃᓕᖅᖢᑎᒃ.

ᑕᒪᒃᑯᐊ ᐃᓄᐃᑦ ᑎᒥᖏᑦ ᐅᓇᑖᕆᔭᖃᕈᓐᓇᙱᑦᑐᑦ ᑕᒪᑐᒥᖓ ᐊᐃᑦᑐᕐᓗᒃᑕᐅᓂᕐᒥᒃ ᓴᖅᑭᕝᕕᐅᓕᖅᐸᒃᑐᑦ "ᑕᐃᒪᐃᙱᓐᓇᐅᔭᕐᓂᐊᖅᑐᒥᒃ" (ᐊᑯᓂᐊᓗᒃ) Hepatitis B-ᒥᒃ. Hepatitis B-ᖑᓂᕋᖅᑕᐅᔪᖅ ᑕᐃᒪᐃᙱᓐᓇᐅᔭᕐᓂᐊᕐᓂᕋᖅᑕᐅᓕᖅᐸᒃᐳᖅ ᐊᐃᑦᑐᕐᓘᑕᐅᓯᒪᓪᓗᓂ ᑕᖅᑮ 6 ᐊᓂᒍᖅᓯᒪᓕᕌᖓᑕ. ᐃᓄᐃᑦ ᐱᑕᖃᕐᕕᐅᓕᖅᑐᑦ ᑕᐃᒪᐃᙱᓐᓇᐅᔭᕐᓂᐊᓕᖅᑐᒥᒃ Hepatitis B-ᒥᒃ ᖁᐊᖅᓵᕐᓇᖅᑐᒦᓐᓂᖅᓴᐅᕙᒃᐳᑦ ᑎᖑᖏᑦ ᐊᔪᓕᕋᔭᕐᓂᖏᓐᓄᑦ, ᑎᖑᒃᑯᑦ ᐋᓐᓂᐊᖃᓕᕋᔭᕐᓂᕐᒥᒃ, cancer-ᖃᓕᕋᔭᕐᓂᕐᒧᓪᓗ ᑎᖑᒥᒍᑦ. ᐃᓗᐊᖅᓴᐅᑎᑕᖃᖅᐳᖅ ᒪᓂᒪᔪᓂᒃ ᐃᑲᔪᕈᑕᐅᔪᓐᓇᖅᑐᓂᒃ ᑕᐃᒪᐃᙱᓐᓇᐅᔭᕐᓂᐊᓕᖅᑐᒥᒃ hepatitis-ᖃᖅᑐᖃᖅᐸᑦ ᑲᒪᔾᔪᑕᐅᔪᓐᓇᖅᑐᓂᒃ. ᑕᐃᒪᐃᑦᑐᒧᑦ ᐊᐃᑦᑐᕐᓗᒃᑕᐅᓯᒪᒍᕕᑦ, ᐅᖃᖃᑎᒋᓂᐊᖅᐸᐃᑦ ᐃᓗᐊᖅᓴᐃᔩᑦ ᓘᒃᑖᓪᓘᓐᓃᑦ ᑭᓱᓂᒃ ᐊᑐᖔᓕᕈᓐᓇᖅᑕᕐᓂᒃ ᐃᓕᖕᓄᑦ ᒪᓂᒪᑎᑕᐅᔪᖃᕐᒪᖔᑦ.

Hepatitis B-ᖃᕈᓐᓃᕈᑕᐅᔪᓐᓇᖅᑐᒥᒃ ᐱᑕᖃᙱᓚᖅ ᑭᓯᐊᓂᑦᑕᐅᖅ ᑲᐱᔭᐅᔾᔪᑕᐅᔪᓐᓇᕆᕗᖅ, ᑕᐃᒪᐃᓐᓂᖓᓄᓪᓗ ᐃᓗᐊᖅᓴᐃᔩᑦ ᓘᒃᑖᓪᓘᓐᓃᑦ ᐅᖃᓪᓚᖃᑎᒋᓗᒍ ᑲᐱᔭᐅᔪᓐᓇᕐᓂᕐᒧᑦ. ᑖᓐᓇ Hepatitis B-ᒧᑦ ᑲᐴᑦ ᐊᑐᖅᑕᐅᑎᑕᐅᙱᓐᓇᐅᔭᖅᐳᖅ ᓄᑕᕋᓛᓄᑦ ᓄᓇᕘᒦᑦᑐᓄᑦ.

Top

HIV/AIDS - ᖑᓂᕋᖅᑕᐅᔪᖅ

HIV/AIDS-ᖑᓂᕋᖅᑕᐅᔪᖅ (Human Immunodeficiency Virus and Acquired Immune Deficiency Syndrome) ᐃᓅᓯᓕᒫᒥ ᐊᐃᑦᑐᕐᓘᑕᐅᓯᒪᕙᒃᐳᖅ ᓯᐊᒻᒪᒃᑎᖅᑕᐅᒐᔪᖕᓂᖅᐹᖑᓪᓗᓂᓗ ᓴᐳᒻᒥᔾᔪᑎᖃᙱᖦᖢᓂ ᓄᓕᐊᖃᑎᖃᕐᓗᓂ ᖃᓂᒃᑯᑦ, ᐃᑎᒃᑯᑦ ᐅᑦᑐᒃᑯᓪᓗ. ᖃᓂᕐᒧᑦ ᐊᕙᓗᑦᑎᓯᒪᔾᔪᑎᓂᒃ ᐅᓲᓪᓗ ᐴᖓᓂᒃ  ᐊᑐᖃᑦᑕᕐᓗᓂ ᓄᖅᑲᖅᑎᑦᑎᓯᒪᑦᑎᐊᕐᓇᖅᐳᖅ ᑕᒪᓐᓇ ᐊᐃᑦᑐᕐᓘᑕᐅᔪᓐᓇᖅᑐᑦ ᓯᐊᒻᒪᒃᑎᙱᓪᓗᒍ. ᐱᐅᒋᕗᖅᑕᐅᖅ ᖃᐅᔨᒪᑦᑎᐊᕈᕕᑦ ᓇᖕᒥᓂᖅ ᐱᖃᑎᒋᕙᒃᑕᐃᓪᓗ ᖃᐅᔨᓴᖅᑕᐅᑦᑎᐊᕈᔅᓯᒃ ᐃᒪᐃᓐᓂᖓᓄᑦ, ᖃᐅᔨᒪᙱᑐᐃᓐᓇᕆᐊᖃᕋᕕᑦ ᑕᐃᒪᐃᑦᑐᖃᕐᓂᕐᓄᑦ. ᓴᐳᔾᔨᔾᔪᑎᓂᒃ ᐊᑐᖅᐸᒡᓗᓂ ᖃᐅᔨᓴᖅᑕᐅᓂᕐᓗ ᑖᒃᑯᐊᖑᔪᓐᓇᖅᐴᒃ ᓄᓕᐊᕐᓂᖅ ᖁᐊᖅᓵᕐᓇᙱᓐᓂᖅᓴᐅᑎᓪᓗᒍ ᐃᓕᖕᓂᒡᓗ ᐱᖃᑎᒋᕙᒃᑕᐃᓪᓗ ᐃᒃᐱᒋᓂᖃᑦᑎᐊᕐᒥᓗᓯᒃ.

ᑕᒪᕐᒥᐅᙱᑦᑐᖅ ᓴᖅᑭᔮᓕᕐᕕᐅᕙᒃᐳᑦ HIV-ᒧᑦ ᐱᖃᕐᓂᕐᒥᒃ ᐊᐃᑦᑐᕐᓗᒃᑕᐅᓯᒪᓂᕐᒥᒃ ᖃᐅᔨᔾᔪᑕᐅᔪᓐᓇᖅᑐᓂᒃ. ᑭᓯᐊᓂᑦᑕᐅᖅ ᐃᓛᓐᓂᒃᑯᑦ, 6 ᐱᓇᓱᐊᕈᓰᑦ ᑕᖅᑮᓪᓗ ᐱᖓᓱᑦ ᐊᑯᓐᓂᖏᓐᓂ, ᑎᒦᑦ ᖃᐅᔨᔾᔪᑕᐅᔪᓐᓇᖅᑐᓂᒃ ᓴᖅᑭᔮᖅᑎᑦᑎᑐᐃᓐᓇᕆᐊᓕᒃ ᐊᑐᕐᓗᓂᓘᓐᓃᑦ ᑕᐃᒪᐃᑦᑐᖃᕐᓂᕐᒧᑦ ᐊᑐᖅᑕᐅᓕᖅᐸᒃᑐᓂᒃ. ᑕᒪᒃᑯᐊ ᖃᐅᔨᔾᔪᑕᐅᔪᓐᓇᖅᑐᑦ ᑕᐃᒪᐃᑦᑐᖃᕐᓂᕐᒧᓪᓘᓐᓃᑦ ᐋᓐᓂᐊᑦ ᐅᑯᓂᖓ ᐃᓚᖃᑐᐃᓐᓇᕆᐊᖃᖅᐳᑦ, ᐱᖑᔭᖕᓂᕐᒥᒃ, ᓄᑭᑎᑦ ᐋᓐᓂᐊᕈᓘᔭᕐᓗᑎᒃ ᐳᕕᓕᕐᓗᑎᓪᓗ ᐊᒡᓕᕈᖅᐱᑦ ᐊᑖᒍᑦ ᑕᓕᖅᐱᓪᓗ ᐊᑖᒍᑦ. ᑕᒪᕐᒥᑲᓴᒃ ᐃᓄᐃᑦ ᓄᑖᒥᒃ HIV-ᒥᒃ ᐊᐃᑦᑐᕐᓗᒃᑕᐅᓵᖅᑐᑦ ᑕᒪᒃᑯᓂᖓ ᖃᐅᔨᔾᔪᑕᐅᔪᓐᓇᖅᑐᓂᒃ ᑕᑯᒃᓴᐅᕝᕕᐅᓇᔭᙱᓚᑦ ᑕᐃᒪᐃᓐᓂᖓᓄᓪᓗ ᖃᐅᔨᓴᖅᑕᐅᒋᑦ ᖃᐅᔨᒪᑦᑎᐊᕈᒪᒍᕕᑦ ᐊᐃᑦᑐᕐᓗᒃᑕᐅᓯᒪᙱᒃᑲᓗᐊᕐᒪᖔᑦ.
 
ᒪᕐᕈᐃᓕᖅᑲᖓᕗᒃ ᐊᑐᖅᑕᐅᕙᒃᑐᒃ ᑕᐃᒪᐃᑦᑐᒥᒃ ᐋᓐᓂᐊᖃᓕᕐᓗᓂ. ᓯᕗᓪᓕᖅ ᐊᑐᖅᑕᐅᕙᒃᑐᖅ HIV-ᖑᓂᕋᖅᑕᐅᕗᖅ ᑕᒪᓐᓇ ᓴᙲᒡᓕᒋᐊᖅᑎᑦᑎᕙᒃᖢᓂ ᑎᒥᐅᑉ ᓴᐳᔾᔨᔾᔪᑎᒋᕙᒃᑕᖏᓐᓂᒃ ᐊᔪᕐᓇᖅᓯᑎᑦᑎᕚᓪᓕᖅᐸᒃᖢᓂ ᑎᒥ ᐅᓇᑕᕆᔭᖃᕈᓐᓇᐃᓪᓕᓂᖅᓴᐅᓪᓗᓂ ᐊᐃᑦᑐᕐᓘᑎᓂᒃ ᖁᐱᕐᕈᓂᒡᓗ ᑕᒪᒃᑯᐊ ᐅᕙᑦᑎᓐᓂᒃ ᖃᓄᐃᙱᑦᑎᐊᖅᑎᑦᑎᕙᖕᓂᖏᓐᓄᑦᑕᐅᖅ. HIV-ᖑᓂᕋᖅᑕᐅᔪᖅ ᐱᑕᖃᕈᓐᓃᖅᑎᑕᐅᔪᓐᓇᙱᓚᖅ ᐃᓗᐊᖅᓴᐅᑎᓄᑦ, ᑭᓯᐊᓂ ᐊᐅᓚᑕᐅᔪᓐᓇᖅᐳᖅ ᐊᕐᕌᒍᒐᓴᖕᓄᑦ ᖁᐱᕐᕈᖅᓯᐅᑎᓄᑦ ᐃᓗᐊᖅᓴᐅᑎᓄᑦ ᐃᓅᓯᑦᑎᐊᕆᒃᓂᒃᑯᓪᓗ ᖃᓄᐃᙱᑦᑎᐊᖅᑐᒥᒃ.

 ᐃᓗᐊᖅᓴᖅᑕᐅᑦᑎᐊᕋᓗᐊᕈᓂᓘᓐᓃᑦ, ᑕᒪᓐᓇ HIV ᓴᙲᒡᓕᑎᑦᑎᒐᔪᒃᐳᖅ ᑎᒥᐅᑉ ᓴᐳᒻᒥᔾᔪᑎᖏᓐᓂᒃ ᓴᖅᑭᓕᖅᐸᒃᖢᓂᓗ "ᑎᒥᓕᒫᒦᓕᖅᖢᓂ" AIDS-ᖑᓂᕋᖅᑕᐅᓕᖅᖢᓂ. ᑕᒪᓐᓇ HIV-ᖑᓂᕋᖅᑕᐅᔪᖅ AIDS-ᖑᕌᖓᒥ, ᖃᓄᐃᙱᑦᑎᐊᕈᓐᓇᕐᓂᕆᔭᖓ ᐊᐃᑦᑐᕐᓗᒃᑕᐅᓯᒪᔫᑉ ᐱᐅᔪᓐᓃᖅᐸᓪᓕᐊᕌᓴᓕᖅᐸᒃᐳᖅ ᑕᐃᒪᐃᓐᓂᖓᓄᓪᓗ ᑕᒪᒃᑯᐊ ᐋᓐᓂᐊᖅᑖᖅᓴᕋᐃᑦᑐᑯᓘᓕᖅᐸᒃᖢᑎᒃ. ᑕᒪᓐᓇ ᑎᒥᒥᒃ ᓴᐳᔾᔨᓯᒪᔪᓐᓇᕐᓂᕆᔭᐅᔪᖅ ᓴᙲᒡᓕᔪᑯᓘᒃᐸᑦ, ᐃᓅᑉ ᐋᓐᓂᐊᖅᑖᕆᔭᒥᓄᑦ ᓴᖅᑭᓕᖅᑎᑦᑎᑐᐃᓐᓴᕆᐊᓕᒃ ᐃᓅᔪᓐᓃᕈᑎᖃᑐᐃᓐᓇᕆᐊᓕᒃ.
 
ᓯᖓᐃᔪᑦ ᐊᕐᓇᐃᑦ HIV/AIDS-ᖃᖅᑐᑦ ᑕᒪᓐᓇ ᐊᐃᑦᑐᕐᓗᒃᑕᐅᓯᒪᓂᑎᒃ ᓄᑕᕋᓛᒧᐊᑐᐃᓐᓇᕆᐊᖃᖅᐸᒃᐸᔾᔪᒃ ᐃᓗᐊᖅᓴᖅᑕᐅᑦᑎᐊᖃᑦᑕᙱᒃᑯᑎᒃ/ᑲᒪᒋᔭᐅᑦᑎᐊᖃᑦᑕᙱᒃᑯᑎᒃ. ᐃᓅᓯᖃᕈᕕᑦ HIV/AIDS-ᖃᕐᓗᑎᑦ ᓯᖓᐃᓗᑎᓪᓗ, ᐅᖃᐅᑎᓪᓗᐊᖅᐸᐃᑦ ᐃᓗᐊᖅᓴᐃᔩᑦ, ᓘᒃᑖᑦ, ᓯᖓᐃᔪᓕᕆᔩᑦ ᐃᕐᓂᓱᒃᓰᔨᓘᓐᓃᑦ ᖃᐅᔨᒪᑦᑎᐊᕈᒪᒍᕕᑦ ᐃᕝᕕᓪᓗ ᓄᑕᕌᓛᓪᓗ ᖃᓄᐃᙱᖁᓪᓗᓯᒃ.

Scabies and Pubic Lice (Crabs) - ᖃᒃᖠᖃᕐᓂᖅ ᑎᖏᒃᑯᓪᓗ ᑯᒪᐃᑦ (ᐳᔾᔫᑏᓕᑦ)

ᖃᒃᓖᑦ ᑎᖏᒃᑯᓪᓗ ᑯᒪᐃᑦ ᐊᐃᑦᑐᕐᓘᑕᐅᕙᒃᐳᑦ ᑕᒪᐃᑎᒍᑦ ᓄᓕᐊᕐᓂᒃᑯᑦ ᓄᓕᐊᙱᒃᑲᓗᐊᕐᓗᓂᓘᓐᓃᑦ ᐊᒃᑐᖅᓯᓂᒃᑯᑦ. ᑖᒃᑯᐊᒃ ᑕᒪᕐᒥᒃ ᖁᐱᕐᕉᕗᒃ ᒥᑭᖦᖢᑎᒃ ᐆᒪᕙᒃᖢᑎᒃ ᐅᕕᓂᖕᒥ. ᖃᒃᖠᖕᓂᒃ ᑯᒪᖕᓂᒡᓘᓐᓃᑦ ᐱᑖᕈᓐᓇᖅᑐᑎᑦ ᑎᒥᒃᑯᑦ ᐊᒃᑐᖅᓯᓂᒃᑯᑦ ᐃᓄᖕᒥᒃ ᑕᐃᒪᐃᑦᑐᖃᖅᑐᒥᒃ ᐊᒃᑐᖅᓯᓐᓂᕈᕕᑦ, ᐊᑐᖃᑎᖃᕐᓂᕈᕕᓪᓘᓐᓃᑦ ᐊᓪᓕᓂᕐᓂᒃ ᕿᐱᖕᓂᒃ, ᐊᓐᓄᕌᓂᒃ ᐊᓪᓚᕈᑎᓂᒡᓘᓐᓃᑦ ᑕᐃᒪᐃᑦᑐᖃᖅᑐᒥᒃ ᐊᒥᖅᑳᖃᑎᖃᕐᓂᕈᕕᑦ.  ᑕᒪᒃᑯᐊ ᖁᐱᕐᕈᐃᑦ ᓯᐊᒻᒪᒃᑎᖅᐸᓪᓕᐊᙱᑦᑐᓐᓇᖅᑕᑎᑦ ᑎᒥᒃᑯᑦ ᑭᓇᑐᐃᓐᓇᒥᒃ ᐊᒃᑐᖅᓯᑦᑕᐃᓕᒪᒍᕕᑦ ᑖᓐᓇᓗ ᖃᐅᔨᒪᓗᒍ ᑕᐃᒪᐃᑦᑐᖃᕐᓂᖓᓂᒃ. ᑕᒪᒃᑯᐊ ᖃᓂᕐᒧᑦ ᐊᕙᓗᑦᑎᓯᒪᔾᔪᑏᑦ ᒪᑯᐊᓗ, ᐅᓲᑉ ᐴᖏᑦ  ᒥᑭᑦᑐᑯᓗᖕᒥᒃ ᑎᒥᐅᑉ ᐃᓚᐃᓐᓇᖓᓂᒃ ᒪᑐᓯᓯᒪᕙᖕᓂᖏᓐᓄᑦ, ᓴᐳᔾᔨᓯᒪᕙᙱᑦᑐᑦ ᑕᒪᒃᑯᓄᖓ ᖃᒃᖠᒃᑖᕆᔭᐅᕙᒃᑐᓄᑦ ᑎᖏᒃᑯᓪᓗ ᑯᒪᒃᑖᕆᔭᐅᕙᒃᑐᓄᑦ.

ᖃᒃᖠᖃᑐᐃᓐᓇᕆᐊᖃᖅᐳᑎᑦ ᐅᖏᓚᖃᑕᒃᕈᕕᑦ ᑎᒥᓕᒫᒃᑯᑦ -- ᐱᓗᐊᙳᐊᖅᖢᓂ ᐅᓐᓄᒃᑯᑦ. ᐱᖑᔭᖕᓂᖅ,ᑕᐃᒪᐃᑎᑕᐅᕙᒃᖢᓂ ᐊᕐᓇᐃᑦ ᖁᐱᕐᕈᐃᑦ ᐊᒡᒐᓕᕌᖓᑕ ᐅᕕᓂᖕᓄᑦ ᒪᓐᓂᒃᑖᕋᓱᒃᖢᑎᒃ, ᓴᖅᑭᒐᔪᒃᐸᒃᐳᑦ ᐅᕕᓂᒃᐱᑦ ᐱᕐᓂᖏᓐᓂ ᐅᓲᑉ ᐊᕙᓗᐊᒍᑦ  ᐅᑦᑑᓪᓘᓐᓃᑦ, ᐊᒡᒐᕕᑦ ᐊᑯᓐᓂᖏᓐᓂ, ᐊᒡᒐᐅᑎᖕᓂᓗ, ᐃᑯᓯᖕᓂ ᓈᖅᐱᓪᓗ ᐊᑦᑎᖕᓂᖓᒍᑦ.
 
ᑯᒪᖃᑐᐃᓐᓇᕆᐊᖃᖅᐳᑎᑦ ᐳᔾᔫᓂᒃ ᐅᖏᓚᑲᑕᒃᑯᕕᑦ  ᐊᖕᒪᓂᖅᐱᑦ ᐊᕙᓗᖏᑎᒍᑦ ᑕᑯᒍᕕᓪᓗ, ᑲᔪᕈᔪᖕᓂᒃ ᒥᑭᑦᑑᑎᓂᒃ ᖁᐱᕐᕈᕐᓂᒃ ᐅᕕᓂᖕᓂ ᐱᓱᑲᑕᒃᑐᓂᒃ. ᑕᒪᒃᑯᐊ ᖁᐱᕐᕈᐃᑦ ᒪᓐᓂᒃᑖᖅᓯᒪᓕᖅᐸᑕ, ᑕᑯᓇᔭᖅᑐᑎᑦ ᒪᓐᓂᒃᑎᑐᑦ-ᐋᖅᑭᒃᓯᒪᔪᓂᒃ "ᖄᓕᖕᓂᒃ" ᑎᖏᖕᓂ ᑕᒪᒃᑯᐊᓗ ᐲᒐᒃᓴᐅᙱᑲᓴᑦᑎᐊᖅᖢᑎᒃ.

ᖃᒃᓖᑦ ᐳᔾᔪᐃᓪᓗ ᑯᒪᐃᑦ ᑲᒪᒋᔭᐅᕙᒃᐳᑦ ᐱᑐᐃᓐᓇᐅᙱᑦᑐᓄᑦ ᐊᓪᓚᕈᔾᔭᒐᕐᓄᑦ, ᑭᓂᖅᑐᓄᑦ ᓄᔭᖅᓯᐅᑎᓄᓪᓘᓐᓃᑦ ᐅᐊᓴᕈᑎᓄᑦ ᓂᐅᕕᕈᓐᓇᖅᖢᒋᓪᓗ ᑕᒪᒃᑯᐊ ᓄᓇᔅᓯᓐᓂ ᐄᔭᒐᖅᑖᕐᕕᒃᓯᓐᓂ ᐱᔪᓐᓇᖅᖢᓯᐅᒡᓘᓐᓃᑦ ᓄᓇᓕᔅᓯᓐᓂ ᐋᓐᓂᐊᕕᓕᐊᕐᕕᔅᓯᓐᓂ.

Top