ᑲᙳᓱᒃᑕᐃᓕᒋᑦ ᖃᐅᓯᓴᖅᑕᐅᓂᐊᕐᓗᑎᑦ STI-ᓄᑦ. STI-ᖃᑐᐃᓐᓇᕆᐊᖃᕋᕕᑦ ᖃᐅᔨᒪᙱᓪᓗᑎᓪᓗ ᐊᐃᑦᑐᕐᓗᒃᑕᐅᓯᒪᓂᕐᓂᒃ. ᐱᖃᑎᒋᕙᒃᑕᐃᓪᓗ ᑕᐃᒪᐃᑐᐃᓐᓇᕆᐊᖃᕆᓪᓗᓂ. ᑕᒪᕐᒥᑦᑎᐊᖅ ᓄᓕᐊᖃᑎᖃᖅᐸᒃᑐᑦ ᐊᖑᑎᑦ ᐊᕐᓇᐃᓪᓗ ᖃᐅᔨᓴᖅᑕᐅᔭᕆᐊᖃᖅᐳᑦ. ᓂᕈᐊᕆᔭᖃᕐᓂᖅ ᐃᓕᖕᓂᒃ ᐃᒃᐱᒋᑦᑎᐊᕐᓂᕐᒥᒃ ᐱᖃᑎᒋᕙᒃᑕᐃᓪᓗ ᑐᑭᖃᖅᐳᖅ ᑲᒪᒋᔭᖃᕐᓂᖅ ᖃᓄᐃᙱᑦᑎᐊᕈᓐᓇᕐᓂᕐᓂᒃ - ᑕᒪᓐᓇᓗ ᑐᑭᖃᕆᓪᓗᓂ ᖃᐅᔨᓴᖅᑕᐅᔭᕆᐊᖃᖅᐸᖕᓂᖕᓂᒃ ᓄᓕᐊᖃᑎᖃᖅᐸᒃᑯᕕᑦ.

STI-ᒧᑦ ᖃᐅᔨᓴᖅᑕᐅᓂᖅ ᓄᓇᕘᒥ ᐊᑭᖃᙱᓚᖅ ᑭᒃᑯᑐᐃᓐᓇᓂᓪᓗ ᖃᐅᔨᔭᐅᓐᓇᕋᓂ. ᖃᐅᔨᒋᐊᕐᕕᒋᔪᓐᓇᖅᑕᐃᑦ ᓄᓇᔅᓯᓐᓂ ᐋᓐᓂᐊᕕᓕᐊᕐᕕᓯ  (ᐊᑦᑕᑕᕈᑎ ᖃᐅᔨᒋᐊᕐᕕᐅᔪᓐᓇᖅᑐᓄᑦ) ᑭᒃᑯᑐᐃᓐᓇᓄᓪᓘᓐᓃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᑎᑎᕋᕐᕕᖓᑦ.

ᒫᓐᓇ ᐊᑏ ᑕᒪᓐᓇ ᐱᓕᕆᐊᕆᓯᑲᐅᑎᒋᒍᒃ

ᖃᐅᔨᓴᖅᑕᐅᓂᖅ ᖃᐅᔨᔾᔪᑎᒋᔪᓐᓇᖅᑕᑐᐊᕆᕙᑦ ᖃᐅᔨᒪᑦᑎᐊᓕᕐᓗᑎᓪᓗ STI-ᖃᕐᓂᕈᕕᑦ. ᖃᐅᔨᒪᓕᑐᐊᕈᕕᑦ STI-ᖃᕐᓂᕐᓂᒃ, ᐃᓗᐊᖅᓴᖅᑕᐅᔪᓐᓇᖅᐳᑎᑦ ᑕᐃᒪᐃᒃᑯᕕᓪᓗ ᖃᓄᐃᙱᑦᑎᐊᕈᓐᓇᕋᔭᖅᖢᑎᑦ ᐱᖃᑎᒋᕙᒃᑕᑎᓪᓗ ᓴᐳᑎᓯᒪᖕᒥᓗᒋᑦ. ᐃᓗᐊᖅᓴᖅᑕᐅᓵᓕᒍᕕᑦ ᐃᓕᖕᓂᒃᑕᐅᖅ ᐃᑲᔪᕆᕗᖅ ᐋᖅᑭᒃᓯᔪᑎᒋᓪᓗᒍ ᑕᐃᒪᐃᑦᑐᖃᕐᓂᕐᓄᑦ ᖃᐅᔨᔾᔪᑎᖕᓂᒃ ᐊᒻᒪᓗ/ᐅᕝᕙᓘᓐᓃᑦ ᐊᐃᑦᑐᕐᓗᒃᑕᐅᓯᒪᓂᕐᓂᒃ, ᑕᒪᓐᓇ ᓱᒃᑲᓕᓂᖅᓴᐅᓪᓗᓂ ᖃᐅᔨᒪᑦᑎᐊᕈᑎᒋᓪᓗᒍᓗ ᐱᐅᓂᖅᐹᓂᒃ ᓴᖅᑭᓕᕋᔭᖅᑐᓂᒃ ᐃᓗᐊᖅᓴᖅᑕᐅᓂᕐᓄᑦ. ᖃᐅᔨᓵᓕᒍᕕᑦ STI-ᖃᕐᓂᕐᓂᒃ ᓲᕐᓗ syphilis-ᒥᒃ, chlamydia-ᒥᒃ gonorrhea-ᒥᒡᓗ ᐊᑑᑎᖃᒻᒪᕆᒃᐳᖅ ᐊᑯᓂᐊᓗᒃ ᖃᓄᐃᙱᑦᑎᐊᕈᓐᓇᕐᓂᕆᓇᔭᖅᑕᕐᓄᑦ ᐃᓅᓯᑦᑎᐊᕆᖕᓂᕆᓇᔭᖅᑕᕐᓄᓪᓗ. ᓄᓕᐊᖃᑎᖃᖅᐸᒃᑯᕕᑦ, ᖃᐅᔨᓴᖅᑕᐅᖃᑦᑕᕆᑦ. ᖃᐅᔨᒪᑦᑎᐊᕆᐊᕆᑦᑕᐅᖅ ᐱᖃᑎᒋᕙᒃᑕᑎᑦ ᖃᐅᔨᓴᖅᑕᐅᖃᑦᑕᕋᓗᐊᕐᓂᖏᓐᓂᒃᑕᐅᖅ.

ᒪᑐᐃᙶᑦᑎᐊᕆᑦ ᓱᓕᑦᑎᐊᖅᐸᒡᓗᑎᓪᓗ

STI-ᒧᑦ ᖃᐅᔨᓴᖅᑕᐅᔭᖅᑐᕌᖓᕕᑦ, ᐱᒻᒪᕆᐊᓘᕗᖅ ᖃᓄᓕᒫᑦᑎᐊᖅ ᓱᓕᑦᑎᐊᖃᑦᑕᕈᕕᑦ ᐃᓗᐊᖅᓴᐃᔨᖕᓄᑦ ᓘᒃᑖᕐᓄᒡᓘᓐᓃᑦ. ᐳᐃᒍᖅᑕᐃᓕᒋᑦ, ᖁᐊᖅᓵᕐᓇᙱᑦᑐᒦᑦᑐᑎᑦ ᑭᒃᑯᑐᐃᓐᓇᓄᓪᓗ ᑐᓴᖅᑕᐅᓐᓇᙱᑦᑐᒦᖦᖢᑎᑦ ᖃᐅᔨᓴᖅᑕᐅᓕᕈᕕᑦ, ᑕᐃᒪᐃᓐᓂᖓᓄᓪᓗ ᑲᑉᐱᐊᓱᒃᑕᐃᓕᒋᑦ ᓱᓕᔪᓂᒃ ᐅᖃᕆᐊᒃᓴᖅ ᖃᔅᓯᓂᒃ ᓄᓕᐊᖃᑎᖃᖅᓯᒪᖕᒪᖔᖅᐱᑦ ᖁᐊᖅᓵᕐᓇᖅᑐᒥᒡᓗ ᓄᓕᐊᖃᑎᖃᕐᓂᕈᕕᑦ. ᐊᕐᓇᐅᒍᕕᑦ, ᐅᖃᕐᓗᑎᑦ ᖃᓄᑐᐃᓐᓇᖅ ᐃᓗᐊᖅᓴᐅᑎᑖᖅᓯᒪᒍᕕᑦ ᓯᖓᐃᑦᑕᐃᓕᒪᔾᔪᑎᓂᒃ. ᐅᖃᐅᓯᖃᓪᓗᐊᕆᕗᑎᑦᑕᐅᖅ ᖃᓄᑐᐃᓐᓇᖅ ᐋᓐᓂᐊᕐᓂᖃᕈᕕᑦ ᒪᐃᓐᓂᖃᕈᕕᓪᓘᓐᓃᑦ ᓈᕕᑦ ᓇᓕᐸᓗᐊᒍᑦ, ᐊᔾᔨᖃᙱᑦᑐᒥᒡᓘᓐᓃᑦ ᐃᓕᓴᕐᓇᙱᑦᑐᒥᒃ ᒪᕿᕙᓪᓕᐊᒍᕕᑦ, ᐱᖑᔭᑲᑕᒃᑯᕕᑦ, ᒪᐃᓐᓂᖃᐅᕈᕕᓪᓘᓐᓃᑦ ᓴᖅᑭᔮᖅᑐᓂᒃ. ᐊᐱᖅᑯᑎᒃᓴᖃᕐᓂᕈᕕᑦ ᓄᓕᐊᕐᓂᐅᑉ ᒥᒃᓵᓄᑦ, ᖃᓄᐃᙱᑦᑎᐊᕈᓐᓇᕐᓂᕐᒧᑦ ᑲᒪᔨᒋᕙᒃᑕᐃᑦ ᐊᐱᕆᔭᒃᓴᑦᑎᐊᕙᒻᒪᕆᐅᕗᖅ. ᑕᒪᒃᑯᐊ ᖃᐅᔨᒪᓂᖃᑦᑎᐊᖅᐳᑦ ᐊᐱᖅᑯᑎᒋᔭᕐᓂᒡᓗ ᑭᐅᓇᔭᖅᖢᑎᒃ ᐃᖅᑲᖅᑐᐃᙱᑦᑎᐊᕐᓗᑎᒃ.

ᖃᐅᔨᓴᖅᑕᐅᔭᕆᐊᖃᕐᓂᖅ

ᖃᓄᐃᓕᐅᖅᑕᐅᔭᕆᐊᖃᕋᔭᓕᕐᒥᔪᖅ STI-ᒧᑦ ᖃᐅᔨᓴᖅᑕᐅᓂᕐᒧᑦ ᑎᒥᒃᑯᑦ ᖃᐅᔨᓴᖅᑕᐅᓇᔭᕐᓂᖅ. ᐃᓗᐊᖅᓴᐃᔩᑦ ᓘᒃᑖᓪᓘᓐᓃᑦ ᖃᐅᔨᓴᓪᓛᑲᐅᖅᑐᕋᔭᖅᑐᖅ ᖃᓄᓕᒫᖅ ᕿᓂᕐᓗᓂ ᑕᑯᒃᓴᐅᔪᓂᒃ ᖃᐅᔨᔾᔪᑕᐅᔪᓐᓇᖅᑐᓂᒃ ᐊᐃᑦᑐᕐᓗᒃᑕᐅᓯᒪᓂᕐᒧᑦ. ᑲᒪᒋᔭᐅᓪᓗᐊᑕᕋᔭᕐᒥᔪᑦ ᑎᒥᖕᓂ ᑕᐃᒪᐃᑦᑐᖃᕐᓂᕐᒧᑦ ᖃᐅᔨᔾᔪᑕᐅᕝᕕᐅᔪᓐᓇᖅᑐᑦ ᐱᖃᕐᕕᐅᓕᖅᐸᒃᖢᑎᒃ: ᐊᖕᒪᓂᑎᑦ, ᐃᔩᒃᑭᒃ, ᖃᓃᑦ ᕿᖓᐃᓪᓗ. ᐃᓗᐊᖅᓴᐃᔩᑦ ᓘᒃᑖᓪᓘᓐᓃᑦ ᐅᖃᐅᑎᓂᐊᖅᐸᐃᑦ ᓄᓕᐊᖃᑎᖃᓚᐅᕐᓂᕈᕕᑦ ᐃᑎᒃᑯᑦ (ᖃᓂᒃᑯᑦ ᑯᔭᒡᓗᑎᓪᓘᓐᓃᑦ) ᑕᐃᒪᐃᓐᓂᕈᕕᑦ. ᑎᓴᒪᐅᕗᑦ ᖃᐅᔨᓴᕈᑕᐅᔪᓐᓇᖅᑐᑦ ᖃᐅᔨᔾᔪᑕᐅᔪᓐᓇᖅᖢᑎᒃ STI-ᖃᕐᓂᕐᒧᑦ:

• ᐊᐅᒃᑯᑦ ᖃᐅᔨᓴᖅᑕᐅᓃᑦ - ᐃᒪᓐᓇᐃᓕᐅᕐᕕᐅᕙᒃᐳᖅ, ᐊᐅᖕᒥᒃ ᐲᖅᓯᐊᕐᔪᒡᓗᓂ ᑲᐴᑎᒧᑦ ᑖᓐᓇᓗ ᖃᐅᔨᓴᕐᕕᖕᒧᑦ ᓇᒃᓯᐅᔾᔭᐅᓗᓂ ᖃᐅᔨᓴᖅᑕᐅᓂᐊᕐᒪᑦ. Hepatitis, herpes, HIV ᐅᓇᓗ syphilis STI-ᖑᕗᑦ ᖃᐅᔨᔭᐅᓕᕈᓐᓇᖅᖢᑎᒃ ᐱᖃᖅᑐᖃᕐᒪᖔᑦ ᐊᐅᒃᑯᑦ ᖃᐅᔨᓴᖅᑕᐅᓂᒃᑯᑦ.
• ᐃᑎᕈᒃᑯᑦ ᖃᐅᔨᓴᖅᑕᐅᓂᖅ - ᐊᔪᕐᓇᙱᑦᑐᑯᓘᕗᖅ ᐋᓐᓂᕐᓇᕋᓂᓗ ᐱᓕᕆᐊᖑᓕᕈᓂ. ᖁᐃᑐᐃᓐᓇᕋᔭᖅᑐᑎᑦ ᒥᑭᑦᑐᒧᑦ ᐴᑯᓗᖕᒧᑦ ᑐᓂᓗᒍᓗ ᐋᓐᓂᐊᖃᕐᓇᙱᑦᑐᓕᕆᔨᖕᓄᑦ ᖃᐅᔨᓴᕐᕕᖕᒥᓘᓐᓃᑦ ᐱᓕᕆᔨᒧᑦ. Chlamydia-ᓗ gonorrhea-ᓗ STI-ᖑᕗᒃ ᖃᐅᔨᔭᐅᔪᓐᓇᖅᖢᑎᒃ ᖁᐃᓂᒃᑯᑦ ᖃᐅᔨᓴᖅᑕᐅᓂᒃᑯᑦ.
• ᑕᑯᒃᓴᐅᔪᓄᑦ ᖃᐅᔨᓴᖅᑕᐅᓂᖅ - ᐊᑐᖅᑕᐅᔪᓐᓇᖅᑐᖅ ᖃᐅᔨᔾᔪᑕᐅᔪᓐᓇᖅᖢᓂ ᐊᖕᒪᓂᕐᒥ ᐅᙳᕐᓂᒃ, ᑎᖏᒃᑯᑦ ᑯᒪᖕᓂᒃ (ᐴᔾᔫᑏᑦ) ᖃᒃᖡᓪᓗ.
• ᑭᓕᐅᖅᓯᓗᓂ ᖃᐅᔨᓴᖅᑕᐅᓂᖅ - ᐊᑐᖅᑐᖃᖅᐸᒃᐳᖅ ᐃᓱᐊᒍᑦ ᓂᕈᒥᒃᑐᑯᓗᖃᖅᖢᑎᒃ ᑖᓐᓇ ᒥᓱᒃᑕᐅᕙᒃᖢᓂ ᐊᓪᓚᕈᑎᒋᔭᐅᕙᒃᖢᓂᓘᓐᓃᑦ ᒪᓴᖕᓄᑦ , ᒪᕿᕙᓪᓕᐊᔪᓄᑦ ᑯᕕᐊᕐᔪᒃᐸᓪᓕᐊᓄᔪᓪᓘᓐᓃᑦ ᐅᑯᓇᙵᑦ cervix, urethra, ᐃᑎᕐᒥᑦ, ᐃᒡᒋᐊᕐᒥᑦ ᖃᓂᕐᒥᓪᓘᓐᓃᑦ. ᑖᓐᓇ ᐊᓪᓚᖅᑕᐅᔪᖅ ᓇᒃᓯᐅᔾᔭᐅᓕᖅᐸᒃᐳᖅ ᖃᐅᔨᓴᕐᕕᖕᒧᑦ ᖃᐅᔨᓴᖅᑕᐅᓂᐊᕐᒪᑦ. ᐊᓪᓚᖅᓯᓪᓗᓂ ᖃᐅᔨᓴᕈᑏᑦ ᐊᑐᖅᑕᐅᕙᒃᐳᑦ ᒪᑯᓄᖓ, Chlamydia, gonorrhea, herpes, HIV, syphilis ᐅᓇᓗ trichomonas.