ᓄᓕᐊᕐᓂᖅᑕᖃᑐᐊᕌᖓᑦ, ᑯᔭᖕᓂᒃᑯᑦ ᖁᐱᕐᕆᔪᖃᕈᓐᓇᑦᑎᐊᖅᐳᖅ. ᐱᐅᓯᖅᑕᖃᕈᓐᓇᕐᒪᑦ ᑯᔭᖕᓂᒃᑯᑦ ᐊᓕᐊᓇᐃᒍᓱᒃᑎᑦᑎᓂᕐᒥᒃ ᑯᔭᖕᓂᒃᑯᑦ ᖁᐱᕆᔾᔪᑕᐅᙱᓪᓗᓂ. ᑯᔭᖕᓂᓕᒫᑦ ᐊᔾᔨᒌᙱᑦᑐᓂᒃ ᐊᑦᑕᕐᓇᖅᑐᒦᓕᕈᑕᐅᔪᓐᓇᕐᒪᑕ, ᖃᐅᔨᒪᑦᑎᐊᕆᐊᖃᑦᑕᕐᓂᐊᖅᐳᓯ ᖃᓄᐃᙱᑦᑎᐊᕐᓂᓯ ᐃᒃᐱᒋᑦᑎᐊᕆᐊᕐᓗᒋᑦ ᐃᓕᖕᓂᓪᓗ ᓴᐳᑎᓯᒪᑦᑎᐊᕆᐊᖅᐸᒡᓗᑎᑦ ᑯᔭᖕᓂᑕᒫᑦ.

ᑯᔭᒃᑎᓪᓚᕆᐊᓘᔪᒪᑐᐊᕈᕕᑦ (ᐅᑦᑐᒃᑰᖦᖤᕋᓗᐊᖅᐸᑦ, ᒪᕿᓕᒑᔪᒥᒃ ᐊᒫᒪᒡᓗᒍ ᒪᕿᑎᑦᑎᖃᑦᑕᕋᓗᐊᕈᕕᑦ ᐅᕝᕙᓘᓐᓃᑦ ᑯᔭᓪᓚᑦᑖᖃᑦᑕᕋᓗᐊᕈᕕᑦ), ᐃᓕᖕᓂᒃ ᓴᐳᑎᓯᒪᔭᕆᐊᖃᖅᐳᑎᑦ ᐅᓲᑉ ᐴᖓᓂᒃ ᐊᑐᕐᓗᑎᑦ ᐅᕝᕙᓘᓐᓃᑦ ᐅᑦᑐᒃᑯᑦ ᐃᑎᒃᑯᓪᓘᓐᓃᑦ ᐴᕆᐊᓕᖕᓂᒃ. ᑯᔭᒃᑎᓪᓗᓯ ᐃᓕᔅᓯᓐᓂ ᓴᐳᑎᓯᒪᓇᓱᑐᐊᕈᔅᓯ, ᑯᔭᖕᓂᒃᑯᑦ ᖁᐱᕐᕆᔾᔪᑕᐅᕙᒃᑐᓂᒃ ᓄᖅᑲᖅᑎᑦᑎᔪᓐᓇᖅᐳᓯ.

ᑯᔭᖕᓂᒃᑯᑦ ᖁᐱᕐᕆᔾᔪᑕᐅᕙᒃᑐᑦ ᐱᕐᔪᐊᒻᒪᕆᐊᓘᖕᒪᑕ. ᑎᒦᓪᓗ ᖃᓄᐃᙱᑦᑎᐊᕐᓃᓪᓗ ᐃᒃᐱᒋᑦᑎᐊᕈᓐᓇᖅᐸᑎᑦ ᑯᔭᖕᓂᒃᑯᑦ ᖁᐱᕐᕆᑦᑕᐃᓕᒪᓂᕐᒥᒃ ᐊᑐᑦᑎᐊᓕᓇᓱᒡᓗᓯ. ᑕᒪᓐᓇᓕ ᐃᒪᓐᓇ ᑐᑭᖃᖅᐳᖅ:

• ᐅᓲᑉ ᐴᖏᓐᓂᒃ ᐅᕝᕙᓘᓐᓃᑦ ᐅᑦᑑᑉ ᐃᑎᐅᓪᓘᓐᓃᑦ ᐃᓗᐊᓄᑦ ᐴᕆᐊᓕᖕᓂᒃ ᐊᑐᑦᑎᐊᖃᑦᑕᕐᓂᖅ ᑯᔭᖕᓂᑕᒫᑦ ᐅᑦᑐᒃᑯᑦ, ᒪᕿᓕᒑᔪᒥᒃ ᐊᒫᒪᒡᓗᒍ ᒪᕿᑎᑦᑎᖃᑦᑕᕋᓗᐊᕈᕕᑦ ᐅᕝᕙᓘᓐᓃᑦ
• ᖃᐅᔨᓴᖅᑕᐅᖃᑦᑕᕐᓂᖅ ᑯᔭᑕᒫᑦ ᑯᔭᑕᒫᑦ ᐊᓯᓐᓂᐊᑐᐊᕌᖓᕕᑦ ᐅᕝᕙᓘᓐᓃᑦ ᐱᖃᑏᑦ ᐊᓯᓐᓂᐊᑐᐊᕌᖓᑦ
• ᑯᔭᖕᓂᒃᑯᑦ ᖁᐱᕐᕆᓐᓂᕈᕕᑦ, ᐃᓅᓕᓴᐅᑎᑖᕆᔭᑎᑦ ᐊᑐᑦᑎᐊᕐᓗᒋᑦ
• ᐱᖃᑎᓯ ᐅᖃᐅᑎᕙᒡᓗᓯᐅᒃ ᖁᐱᕐᕆᓯᒪᓕᕐᓂᔅᓯᓐᓂ ᖃᐅᔨᓴᖅᑕᐅᖃᑕᐅᔪᓐᓇᕐᓂᐊᕐᒪᑕ ᐃᓅᓕᓴᖅᑕᐅᓗᑎᓪᓗ
• ᖃᐅᔨᒪᑦᑎᐊᕆᐊᖅᐸᒡᓗᓯ ᑲᐱᔭᐅᖃᑦᑕᕐᓂᓯ ᓈᒻᒪᖅᑰᑦᑎᓯᒪᒐᓗᐊᕐᒪᖔᑕ ᑎᖑᒡᓗᓕᕈᑕᐅᔪᓐᓇᕐᒪᑕ

ᑯᔭᖕᓂᒃᑯᑦ ᖁᐱᕐᕆᔾᔪᑕᐅᕙᒃᑐᑦ ᐃᒃᐱᒋᑦᑎᐊᕐᓗᒋᑦ ᖃᐅᔨᓴᖅᑕᐅᔪᒪᖃᑦᑕᕐᓗᓂᓗ ᑕᑯᒃᓴᐅᑎᑦᑎᕗᖅ ᐃᒻᒥᒥᒃ ᐃᑉᐱᒍᓱᑦᑎᐊᕐᓂᕐᒥᒃ ᐱᖃᑎᒥᓗ ᓄᓕᐊᖃᑎᒋᕙᒃᑕᒥᒃ. ᐱᒻᒪᕆᐅᕗᖅ ᖃᐅᔨᓴᖅᑕᐅᖃᑦᑕᕆᐊᒃᓴᖅ ᐱᔾᔪᑎᖃᐅᕈᓘᔭᖅᖢᓂ:

• ᐃᒪᐃᒐᔪᖕᒪᑦ, ᐃᓄᐃᑦ ᖃᐅᔨᑲᐅᑎᒋᔪᓐᓇᙱᒻᒪᑕ ᖁᐱᕐᕆᓯᒪᒐᓗᐊᕐᒪᖔᑕ ᐋᓐᓂᐊᓕᕈᑕᐅᖃᑦᑕᖅᑐᓂᒃ ᓴᖅᑭᑦᑐᖃᖅᐸᙱᓐᓂᖓᓄᑦ. ᐃᒪᐃᒐᔪᒃᖢᓂ, ᖃᐅᔨᓴᖅᑕᐅᓗᓂ ᑭᓯᐊᓂ ᖃᐅᔨᔭᐅᔪᓐᓇᕐᒪᑕ.
• ᖁᐱᕐᕆᓯᒪᔪᑦ ᖃᐅᔨᔭᐅᓵᓕᓪᓗᑎᑦ ᑲᒪᒋᔭᐅᓴᕋᐃᓐᓂᖅᓴᐅᓲᖑᖕᒪᑕ.
• ᖁᐱᕐᕆᓯᒪᔅᓲᔭᓕᕐᓂᕈᕕᑦ, ᖃᓄᐃᙱᓐᓂᕆᔭᕐᓄᑦ ᖃᓄᐃᓕᕐᔪᐊᖅᑎᑦᑎᔪᓐᓇᕐᒪᑦ. ᐃᓚᖏᑦ ᖁᐱᕐᕆᓂᐅᔪᑦ ᐱᕐᔪᐊᒻᒪᕆᐊᓗᖕᒥᒃ ᐋᓐᓂᐊᖅᑖᕐᓇᕐᒪᑕ ᐅᕝᕙᓘᓐᓃᑦ ᕿᑐᕐᖓᖅᑖᕈᓐᓇᐃᓪᓕᔾᔪᑕᐅᔪᓐᓇᕐᒪᑕ (ᑐᑭᖃᖅᐳᖅ ᕿᑐᕐᖓᖅᑖᕈᓐᓇᐃᓪᓕᔪᓐᓇᕋᔭᕋᕕᑦ ᖃᖓᓕᒫᖅ).
• ᖃᐅᔨᒪᙱᒃᑯᕕᑦ ᖁᐱᕐᕆᓯᒪᔪᑎᑦ, ᑯᔭᒐᔅᓯᓐᓄᑦ ᐊᐃᑦᑐᕐᓘᑎᒋᑐᐃᓐᓇᕆᐊᖃᕋᔅᓯᐅᒃ ᖃᐅᔨᒪᙱᑦᑎᐊᕐᓗᓯ.
• ᐊᑕᐅᓯᐊᕐᓗᑎᑦ ᖁᐱᕐᕆᓚᐅᖅᓯᒪᑐᐊᕈᕕᑦ ᖁᐱᕐᕆᒃᑲᓐᓂᕐᓇᕐᒪᑦ ᑭᖑᓂᐊᒍᑦ.

ᑕᕝᕙᓂ ᖃᐅᔨᓴᖅᑕᐅᖃᑦᑕᕆᐊᖃᕐᓂᖅ ᐃᑭᐊᖅᑭᕕᖕᒥᒃ ᑐᑭᓯᒋᐊᒐᒃᓴᖅᑕᖃᕐᓂᖅᓴᐅᕗᖅ ᖃᖓᒃᑯᑦ ᖃᐅᔨᓴᖅᑕᐅᔭᕆᐊᖃᕐᒪᖔᔅᓯ ᓇᓂᓗ ᖃᐅᔨᓴᖅᑕᐅᔪᓐᓇᕐᒪᖔᓯ.

ᖁᐱᕐᕆᓂᐅᕙᒃᑐᓗᒃᑖᑦ, ᑭᓯᐊᓂᑦᑕᐅᖅ ᐊᑕᖏᐅᒪᙱᒃᑭᓪᓗᑎᑦ ᒪᒥᑎᑕᒃᓴᐅᙱᒻᒪᑕ. ᐃᓚᖏᑦ “ᐊᐅᓚᑕᒐᐅᓕᑐᐃᓐᓇᕈᓐᓇᖅᐳᑦ” ᐃᓅᓕᓴᕆᐊᖃᓕᕋᔭᖅᖢᑎᓪᓗ ᐃᓅᓯᓕᒫᕐᒥᓄᑦ. ᐃᒻᒥᒎᓪᓛᔪᒥᒃ ᐊᒻᒪᓛᔪᖅᑖᕐᓇᖅᑐᑦ, ᐊᕐᓇᐃᑦ ᐊᖕᒪᓂᖏᑦᑎᒍᑦ ᐊᖑᑏᓪᓗ ᐃᒡᔪᖃᕐᕕᖏᑦᑎᒍᑦ ᐅᙳᙳᐊᖅᑖᖅᑐᕈᓐᓇᖅᑐᑦ, ᐊᓐᓇᐅᒪᔾᔪᑎᖃᕈᓐᓃᕐᓇᖅᑐᑦ ᐊᒻᒪ, ᐃᓛᓐᓂᒃᑯᑦ, ᑎᖑᒡᓗᓕᕈᑕᐅᕙᒃᖢᓂ ᑖᒃᑯᐊ ᑕᒪᕐᒥᒃ ᖁᐱᕐᕆᓂᕐᒧᑦ ᑐᕌᖓᔪᐃᓐᓇᐅᕗᑦ.