ᖁᐊᖅᓵᕐᓇᙱᓐᓂ ᖅᓴᐅᔪᒃᑯᑦ ᓄᓕᐊᕐᓂᖅ

  • ᑯᔭᑦᑕᐃᓕᓂᖅ ᑐᑭᖃᖅᐳᖅ ᐊᑯᓛᒃᑯᑦ ᐊᑦᑐᕐᓯᑦᑕᐃᓕᓂᕐᒥᑦ, ᐊᑯᓛᒥᑦ ᐅᕕᓂᒻᒧᑦ ᐅᕝᕙᓘᓐᓃᑦ ᐊᑯᓛᒥ ᖃᐅᓯᕐᒧᑦ ᐊᑯᓛᓐᓃᓐᖔᖅᑐᓂᒃ ᖃᓄᑐᐃᓐᓇᖅ ᐊᑦᑑᑎᓐᖏᓪᓗᑎᒃ. ᑕᐃᒫᒃ ᑭᓯᐊᓂ ᓇᔾᔨᓕᕈᓐᓇᕋᔭᓐᖏᓚᑎᑦ ᐊᒻᒪᓗ ᖁᐱᕐᕆᒐᔭᓐᖏᓚᑎᑦ ᖁᔭᓐᓂᒃᑯᑦ (ᑭᓯᐊᓂ ᐊᓯᖏᑦ ᖁᐱᕐᕆᒍᓐᓇᖅᐳᑦ ᓲᕐᓗ ᐊᓴᐱᔅᓴᕐᒥᑦ-ᐊᓴᐱᒥᑦ ᐊᒻᒪᓗ ᐊᐅᓪᓗᓐᓇᕐᒥᒃ B ᑲᑐᔾᔨᒍᕕᑦ ᑲᐴᑎᓂᒃ ᐅᕝᕙᓘᓐᓃᑦ ᑎᒥᒃᑯᑦ ᑎᑎᖅᑐᒐᕐᕕᐅᒍᕕᑦ). ᑯᔭᒋᐅᕐᓂᖑᓐᖏᒃᑲᓗᐊᕈᕕᑦ ᓂᕈᐊᕈᓐᓇᖅᐳᑎᑦ ᑯᔭᑦᑕᐃᓕᓂᕐᒥᑦ ᑯᔭᖃᑎᖃᖃᑦᑕᖏᓪᓗᑎᑦ ᑭᓇᓕᒫᒥᑦ ᓯᕗᓂᔅᓴᑦᑎᓐᓂᑦ ᒫᓐᓇᐸᓗᒃ.
  • ᐃᒻᒥᓂᒃ ᐱᓐᖑᐊᕆᓂᖅ ᑐᑭᖃᖅᐳᖅ ᐃᒻᒥᓂᒃ ᐊᓕᐊᓇᐃᒍᓱᑦᑎᒃᑯᕕᑦ ᐊᑦᑐᐊᓪᓗᑎᑦ ᐊᑯᓛᒃᑯᑦ. ᐃᒻᒥᓂᒃ ᐱᓐᖑᐊᕆᒍᕕᑦ ᐃᓄᑑᓪᓗᑎᑦ ᖁᐱᕐᕆᒍᓐᓇᓐᖏᓚᑎᑦ ᐅᕝᕙᓘᓐᓃᑦ ᓇᔾᔨᓕᕈᓐᓇᓐᖏᓚᑎᑦ. ᑭᓯᐊᓂᓕ, ᐊᓯᕕᑦ ᐅᓱᓐᖑᐊᖏᓐᓂᑦ ᐊᓯᖏᓐᓂᓪᓗ ᐅᐊᓴᖅᑕᐅᑦᑎᐊᕐᓂᖏᑦᑐᓂᒃ ᐅᕝᕙᓘᓐᓃᑦ ᐊᓯᕕᑦ ᐊᑯᓛᖏᓐᓃᓐᓂᖅᐸᑕ ᖁᐱᕐᕆᑐᐃᓐᓇᕆᐊᖃᖅᐳᑎᑦ.

    • ᑯᔭᖃᑦᑕᕈᒪᓂᐊᕈᕕᑦ ᐊᓯᓐᓂᒃ ᐊᑐᖃᑦᑕᕐᓗᑎᑦ ᖁᐱᕐᕆᑦᑕᐃᓕᔾᔪᑕᐅᔪᓐᓇᖅᑐᓂᒃ ᐅᕝᕙᓘᓐᓃᑦ ᓇᔾᔨᓕᑲᓪᓚᓐᓂᐊᓐᖏᓐᓇᕕᑦ. ᐊᒥᓱᑲᓪᓚᐅᕗᑦ “ᐅᓗᕆᐊᓇᓐᖏᒍᑎᔅᓴᐃᑦ ᑯᔭᓪᓗᓂ” ᐅᓗᕆᐊᓇᓐᖏᓂᖅᓴᒦᔾᔪᑕᐅᔪᓐᓇᖅᑐᑦ.

  • ᐃᓄᑑᖃᑎᖃᖃᑦᑕᕐᓂᖅ ᑐᑭᖃᖅᐳᖅ ᐊᑕᐅᓰᓐᓇᕐᒥᑦ ᑯᔭᖃᑎᖃᖃᑦᑕᕈᕕᑦ, ᖁᐱᕐᕆᔅᓯᓂᒪᓐᖏᑦᑐᒥᑦ ᐃᓕᓐᓂᑐᐊᕐᓗ ᑯᔭᖃᑦᑕᖅᑐᒥᑦ. ᖁᐱᕐᕆᑦᑕᐃᓕᖁᓪᓗᓯᒃ ᖃᐅᔨᓴᖅᑕᐅᖅᑳᕈᓐᓇᖅᐳᓯᒃ ᑯᔭᓚᐅᓐᖏᓂᔅᓯᓐᓂᒃ. ᖁᐱᕐᕈᖃᖅᑑᔮᓐᖏᒃᑲᓗᐊᕈᔅᓯ ᖃᐅᔾᔩᑦᑑᒍᓐᓇᕆᕗᖅ ᖁᐱᕐᕆᓯᒪᔪᒥᓂᐅᓪᓗᓂ. ᐃᓱᒪᒋᑦᑎᐊᕆᑦ ᐃᒻᒥᓂᒃ ᐊᐃᑉᐸᕐᓂᓪᓗ ᐊᓯᓐᓂᐊᖃᑦᑕᖏᓪᓗᑎᑦ ᐊᒻᒪᓗ ᓴᓪᓗᖃᑦᑕᖏᓪᓗᑎᑦ ᐊᐃᑉᐸᕐᓄᑦ.
  • ᐊᒥᓲᓗᐊᓐᖏᑦᑐᓂᒃ ᐊᐃᑉᐸᖃᖃᑦᑕᕆᑦ - ᐊᒥᓲᓂᖅᓴᐅᑉᐸᑕ ᐊᐃᑉᐸᕆᕙᑦᑕᑎᑦ ᖁᐱᕐᕆᑐᐃᓐᓇᕆᐊᖃᕐᓂᖅᓴᐅᕗᑎᑦ. ᐊᐃᑉᐸᖃᖃᑦᑕᕐᓗᑎᑦ ᑭᓯᐊᓂ ᑕᐃᒃᑯᓂᖓ ᖃᐅᔨᒪᑦᑎᐊᖅᑕᕐᓂᒃ ᐊᒻᒪᓗ ᐅᑉᐱᕆᑦᑎᐊᖅᑕᕐᓂᒃ. ᐃᒻᒥᓂᒃ ᐃᓱᒪᒋᔭᖃᑦᑎᐊᕐᓂᖅ ᐃᓚᖃᖅᐳᖅ ᐃᓱᒪᓕᐅᑦᑎᐊᕈᓐᓇᕐᓂᕐᒥᒃ ᑭᒃᑯᓐᓂᒃ ᐊᐃᑉᐸᖃᖃᑦᑕᕐᒪᖔᖅᐱᑦ.
  • ᐅᖃᖃᑎᒋᖅᑳᖃᑦᑕᕈᒃ ᐊᐃᑉᐸᐃᑦ ᑯᔭᓚᐅᓐᖏᓂᔅᓯᓐᓂᒃ - ᐅᖃᐅᓯᖃᖃᑦᑕᕐᓗᓯᒃ ᒪᑐᐃᖓᑦᑎᐊᖅᑐᒥᒃ ᖁᐱᕐᕆᓐᓂᐅᑉ ᒥᔅᓵᓄᑦ, ᓴᐳᑦᑎᔾᔪᑎᔅᓴᐃᑦ ᖁᐱᕐᕆᓇᖅᑐᓂᒃ, ᐊᒻᒪᓗ ᓇᔾᔨᓂᐅᑉ ᒥᔅᓵᓄᑦ. ᐅᖃᐅᓯᖃᖃᑦᑕᕐᓗᓂ ᑕᒪᒃᑯᓂᖓ ᑐᑎᓚᐅᓐᖏᓂᔅᓯᓐᓂ ᐅᑉᐱᕈᓱᓕᑦᑎᐊᕐᓇᖅᐳᖅ ᐃᓱᒪᒋᔭᖃᑦᑎᐊᓕᕐᓄᓕᓗ ᐊᓯᒥᓐᓂᒃ ᐱᒻᒪᕆᐅᓪᓗᓂ ᖁᐱᕐᕆᑦᑕᐃᓕᔾᔪᑕᐅᕙᑦᑐᓂ ᐅᕝᕙᓘᓐᓃᑦ ᓇᔾᔨᓕᑲᓪᓚᑦᑕᐃᓕᔾᔪᑕᐅᔪᓐᓇᕐᒪᑦ. ᑯᔭᒍᓐᓇᖅᓯᓂᖅ ᑐᑭᖃᕆᕗᖅ ᐅᖃᐅᓯᖃᕈᓐᓇᓕᕐᓂᕐᒥᒃ ᓴᐳᒻᒥᔾᔪᑕᐅᔪᓂᒃ, ᖁᐱᕐᕆᓐᓂᐅᔪᓂᒃ ᐊᒻᒪᓗ ᓇᔾᔨᓂᕐᒥᒃ.
  • ᓴᐳᑎᔾᔪᑎᓂᒃ ᐊᑐᖃᑦᑕᕐᓗᑎᑦ – ᐅᓱᒻᒪᑦ ᐴᑦ ᐊᒻᒪᓗ-ᐅᕝᕙᓘᓐᓃᑦ ᖃᓂᕐᒧᑦ ᐴᑦ ᐊᑐᖅᑕᐅᑦᑎᐊᖃᑦᑕᕆᐊᖃᖅᐳᑦ ᐊᒫᒪᒐᐃᒍᕕᑦ ᐅᓱᒻᒥᑦ-ᐊᓗᑉᐹᕋᐃᒍᕕᑦ ᐅᑦᑑᓐᓂᒃ, ᐅᑦᑐᒃᑯᑦ ᐅᕝᕙᓘᓐᓃᑦ ᐃᑎᒃᑯᑦ ᑯᔭᑦᑕᐅᓂᐊᕈᕕᑦ ᐅᕝᕙᓘᓐᓃᑦ ᐊᐃᑉᐸᖅᐱᑦ ᐊᑯᓛᖓ ᐊᑦᑐᕐᓂᐊᕈᕕᒃ ᐃᑎᖓᓘᓐᓃᑦ. ᐊᑐᕈᕕᑦ ᓴᓗᐊᔾᔭᐃᒃᑯᑎᒥ, ᐃᒪᖃᕆᐊᖃᖅᐳᖅ ᓲᕐᓗ ᐅᖅᓱᖅᑎᕈᑎᑎᑐᑦ, ᐅᖅᓱᖃᖅᑐᑦ ᓴᓗᐊᔾᔭᐃᒃᑯᑏᑦ, ᓲᕐᓗ ᐅᖅᓱᖅᑎᕈᑏᑦ, ᓄᑕᕋᕐᓄᑦ ᐅᖅᓱᖅᑎᕈᑏᑦ ᐃᒦᑦ, ᐅᖅᓱᐃᑦ ᓂᖅᑎᐅᖅᑐᓂ ᐃᒦᑦ ᓱᕋᒍᑕᐅᔪᓐᓇᖅᐳᑦ ᐅᓱᒻᒧᑦ ᐴᕐᒧᑦ ᓴᐳᔾᔨᔪᓐᓃᕐᓗᑎᒃ. ᐊᒻᒪᓗ ᐃᓱᒪᔅᓴᖅᓯᐅᕈᓐᓇᖅᐳᑎᑦ ᐊᓯᖏᓐᓂᑦ ᐊᑐᕈᓐᓇᕋᕕᑦ ᓇᔾᔨᔾᔭᐃᒃᑯᑎᓂᒃ ᓇᔾᔨᓕᑲᓪᓚᖁᓇᑎᑦ ᓇᔾᔨᔪᒪᑎᓐᓇᒃ. ᓇᒻᒥᓂᖅ ᓴᐳᑎᒍᕕᑦ ᐊᒻᒪᓗ ᐊᐃᑉᐸᕐᓂᒃ ᑐᑭᖃᖅᐳᖅ ᓇᒻᒥᓂᖅ ᐃᓱᒪᒋᔭᖃᑦᑎᐊᕋᕕᑦ ᐊᐃᑉᐸᕐᓂᓪᓗ.
  • ᑯᔭᖃᑎᖃᖃᑦᑕᕐᓗᑎᑦ ᑕᐃᒃᑯᓂᖓ ᑭᓯᐊᓂ ᖃᐅᔨᒪᑦᑎᐊᖅᑕᕐᓂᒃ - ᐅᖃᖃᑎᖃᖃᑦᑕᕐᓗᑎᑦ ᐊᐱᖅᓱᕐᓗᒍ ᐊᐃᑉᐸᕆᓂᐊᖅᑕᐃᑦ ᐊᒥᓲᓗᐊᖅᑐᓂᒃ ᐊᐃᑉᐸᖃᖅᓯᒪᓐᖏᒃᑲᓗᐊᕐᒪᖔᖅ ᑯᔭᓚᐅᓐᖏᓂᔅᓯᓐᓂᒃ, ᖃᐅᔨᒪᓂᐊᕋᕕᑦ ᐅᓗᕆᐊᓇᕐᒪᖔᖅ ᓴᐳᑎᒍᓐᓇᕐᓂᐊᕋᕕᓪᓗ ᓇᒻᒥᓂᖅ. ᑯᔭᒍᓐᓇᖅᓯᓂᖅ ᑐᑭᖃᕆᕗᖅ ᐅᖃᖃᑎᖃᕈᓐᓇᖅᓯᓂᕐᒥᑦ ᐊᐃᑉᐸᕐᓂᑦ ᖁᐱᕐᕆᒍᑕᐅᕙᑦᑐᑦ ᒥᔅᓵᓄᑦ ᐊᒻᒪᓗ ᓴᐳᑎᔪᓐᓇᕐᓂᕐᒥᒃ.
  • ᖃᐅᔨᓴᖅᑕᐅᖃᑦᑕᐃᓐᓇᕆᐊᖃᖅᐳᑎᑦ – ᑯᔭᖃᑦᑕᕈᕕᑦ ᖃᐅᔨᓴᖅᑕᐅᖃᑦᑕᕆᑦ ᓘᑦᑖᒧᑦ ᐋᓐᓂᐊᓯᐅᖅᑎᒧᓪᓘᓐᓃᑦ ᐊᑕᐅᓯᐊᖅ ᐊᕐᕌᒍᒥ. ᐊᒥᓱᓂᒃ ᐊᐃᑉᐸᖃᖃᑦᑕᕈᕕᑦ ᐊᔾᔨᒌᓐᖏᑦᑑᑎᓂᒃ, ᖃᐅᔨᓴᖅᑕᐅᖃᑦᑕᕆᑦ ᐊᓯᐊᓃᓕᕋᐃᒍᕕᑦ ᐅᕝᕙᓘᓐᓃᑦ ᐊᐃᑉᐸᐃᑦ ᐊᓯᐊᓃᓐᓂᕋᐃᑉᐸᑦ ᐃᓕᓐᓃᒃᑲᓐᓂᕐᓗᓂᓗ. ᖃᐅᔨᓴᖅᑕᐅᖃᑦᑕᕈᕕᑦ ᐃᕝᕕᑦ ᑎᒥᖓᓂᑦ ᑲᒪᒐᓱᐊᑦᑎᐊᖅᐳᑎᑦ.
  • ᐅᖃᖃᑎᖃᖃᑦᑕᕐᓗᑎᑦ ᑯᔭᖃᑦᑕᖅᓯᒪᔭᕐᓂᑦ ᖁᐱᕐᕆᓯᒪᓐᓂᕈᕕᑦ ᖃᐅᔨᓴᖅᑕᐅᒋᐊᖃᖅᐳᑎᑦ ᐄᔭᒐᖅᑎᑕᐅᓗᑎᓪᓗ. ᐊᒥᓱᑦ ᖁᐱᕐᕆᓯᒪᔪᑦ ᖃᐅᔨᓇᖅᐸᓐᖏᓚᑦ ᖃᐅᒪᕙᓐᖏᓚᓪᓗ ᖃᐅᔨᓴᖅᑕᐅᒋᐊᖃᕐᓂᕐᒥᓂᒃ ᑭᓯᐊᓂ ᐅᖃᐅᔾᔭᐅᑉᐸᑕ. ᐊᐃᑉᐸᕆᓯᒪᔭᑎᑦ ᐅᖃᐅᑎᑦᑎᐊᕆᐊᖃᖅᐸᑎᑦ ᖃᐅᔨᓴᖅᑕᐅᒋᐊᖃᓕᕐᓂᖅᐸᑕ.