ᐅᓱᒻᒧᑦ ᐴᑦ ᐴᖅᓯᓯᒪᕙᑉᐳᑦ ᐃᓚᖓᓂ ᐅᓲᑉ ᑯᔭᑦᑎᓪᓗᓯᒃ, ᖃᐸᓂᒃ ᓄᖅᑲᖓᑎᑦᑎᔾᔪᑕᐅᓪᓗᓂ ᐊᑦᑐᕐᓂᐊᓐᖏᒻᒪᑦ ᐊᐃᑉᐸᕐᓄᑦ. ᑕᓯᑦᑕᖅᑑᒃᑲᔪᑉᐳᑦ. ᐴᑦ ᐊᑐᐃᓐᓇᐅᖏᓐᓇᖅᐳᑦ ᐋᓐᓂᐊᕕᓐᓂᒃ ᐊᑭᖃᕋᑎᒃ ᐅᕝᕙᓘᓐᓃᑦ ᐋᓐᓂᐊᖅᑐᓕᕆᔨᒃᑯᑦ ᐊᓪᓚᕝᕕᖓᓐᓂᑦ. ᐴᑦ ᓴᐳᔾᔨᔾᔪᑎᑑᕗᑦ ᖁᐱᕐᕈᓂᒃ ᐊᒻᒪᓗ ᓇᔾᔨᔪᒪᓐᖏᑦᑐᓄᑦ ᐊᒻᒪᓗ ᐊᑐᖅᑕᐅᔪᓐᓇᖅᑐᑎᒃ ᓴᐳᑎᔾᔪᑎᐅᓗᑎᒃ ᖃᓂᒃᑯᑦ, ᐃᑎᒃᑯᑦl ᐊᒻᒪᓗ ᐅᑦᑐᒃᑯᑦ ᐱᔭᐅᓂᐊᕈᕕᑦ.

ᐊᖑᑎᓄᑦ ᐴᑦ ᐊᑐᖅᑕᐅᕙᑉᐳᑦ ᐅᓱᒃᑯᑦ ᐊᒻᒪᓗ ᓄᖅᑲᖓᔾᔪᑕᐅᓪᓗᑎᒃ ᖃᐸᓄᑦ ᐃᓯᐊᖁᓇᒋᑦ ᐅᑦᑑᓐᓄᒃ; ᓄᖅᑲᖓᑎᑦᑎᔾᔪᑕᐅᔪᓐᓇᖅᐳᑦ 86-90%-ᓂᒃ ᓇᔾᔨᒐᔭᖅᑐᓂᒃ. ᐊᑐᑦᑎᐊᖃᑦᑕᐃᓐᓇᕈᕕᒋᑦ ᐃᑲᔫᑎᖃᕈᓐᓇᖅᑐᑎᒃ 98%-ᒥᒃ.

ᐊᕐᓇᓄᑦ ᐴᑦ ᐊᑐᖅᑕᐅᕙᑉᐳᑦ ᐃᓗᐊᓂ ᐅᑦᑑᑉ ᑯᔭᑦᑎᓪᓗᒋᑦ ᓄᖅᑲᖓᔾᔪᑕᐅᓪᓗᓂ ᖃᐸᒧᑦ ᐃᓗᐊᓅᖅᑲᖁᓇᒋᑦ ᓱᓪᓗᖓᓄᑦ ᒪᓐᓂᖃᕐᕕᐅᑉ ᐊᒻᒪᓗ ᐃᓪᓕᐊᕐᒧᑦ. ᓄᖅᑲᖓᔾᔪᑕᐅᕙᑉᐳᑦ ᓇᔾᔨᒐᔭᖅᑐᓄᑦ 79%-ᒥᑦ, ᐊᑐᑦᑎᐊᖏᓐᓇᕐᓗᒋᑦ ᐃᑲᔫᑎᖃᕈᓐᓇᖅᐳᑦ 95%-ᒥᒃ.

ᐊᒥᓱᑲᓪᓚᐅᕗᑦ ᐃᖅᑲᐅᒪᒋᐊᓕᑦᑎᑦ ᐊᑐᑦᑎᐊᕈᓐᓇᖁᓪᓗᑎᑦ ᐴᕐᒥᒃ. ᐅᑯᓂᖓ ᒪᓕᒃᑯᕕᑦ ᐃᑲᔫᑎᐅᔪᓐᓇᖅᑐᓂᒃ ᓇᔾᔨᓕᖅᑕᐃᓕᔪᓐᓇᖅᐳᑎᑦ ᐊᒻᒪᓗ ᖁᐱᕐᕆᑦᑕᐃᓕᔪᓐᓇᖅᑐᑎᑦ:

• ᖃᐅᔨᒋᐊᕐᓗᒍ ᐅᓪᓗᖓᑕ ᐃᓱᓕᕝᕕᖓ: ᐴᓕᒫᑦ ᐃᓱᓕᕝᕕᐊᖅᐳᑦ. ᐅᓪᓗᖓᑕ ᑭᖑᕐᖓᒍᑦ ᓴᐳᔾᔨᔪᓐᓃᓲᖑᕗᖅ ᐃᓕᓐᓂᑦ ᐊᐃᑉᐸᕐᓂᓪᓗ.
• ᖃᐅᒪᑦᑎᐊᕐᓗᒋᑦ ᓇᒦᑎᒻᒪᖔᖅᐱᒋᑦ: ᐊᕐᓇᓄᑦᒃ ᐊᒻᒪᓗ ᐊᖏᑎᓄᑦ ᐴᑦ ᐅᖅᑰᓗᐊᓐᖏᑦᑐᒥᑦ ᐊᒻᒪᓗ ᐃᒃᑮᓇᓗᐊᓐᖏᑦᑐᒦᑎᒋᐊᖃᖅᐳᑦ ᐸᓂᖅᑐᒥᑦ ᐊᒻᒪᓗ ᓯᕿᓂᕐᒦᑎᑦᑕᐃᓕᒪᓗᒋᑦ.
• ᐊᑎᖅᑳᕐᓗᒍ ᐴᖅ ᐊᑦᑐᓚᐅᓐᖏᓂᕐᓂ ᐊᑯᓛᖓᒍᑦ ᐊᐃᑉᐸᕆᓂᐊᖅᑕᐃᑦ: ᐴᑦ ᐃᑲᔫᑎᖃᖅᐳᑦ ᓴᐳᑎᔾᔪᑕᐅᔪᓐᓇᖅᑐᑎᒃ ᖁᐱᕐᕆᒍᑕᐅᔪᓐᓇᖅᑐᓂᒃ ᐊᑐᖅᑕᐅᖏᓐᓇᑐᐊᖅᐸᑕ ᐊᑯᓛᒃᑯᑦ ᐊᑦᑐᖃᑦᑕᐅᑎᓂᐊᖅᑎᓪᓗᓯᒃ.
• ᐊᑐᑦᑎᐊᖃᑦᑕᕐᓗᒍ ᐴᖅ: ᐊᑎᓯᒍᕕᑦ ᐴᕐᒥᑦ (ᐊᖑᑎᐅᒐᓗᐊᕈᕕᑦ ᐊᕐᓇᐅᒐᓗᐊᕈᕕᑦ) ᖃᐅᔨᒪᑦᑎᐊᕆᐊᖃᖅᐳᑎᑦ. ᐆᑦᑐᕋᖅᑳᕈᕕᑦ ᑯᔭᓚᐅᓐᖏᓂᕐᓂᑦ ᐱᐅᒋᕗᖅ. ᐅᑯᐊ ᖃᕋᓴᐊᔭᒃᑯᑦ ᖃᐅᔨᒋᐊᕐᕕᔅᓴᐅᑦᑎᐊᕆᕗᑦ ᐊᑐᐊᒐᐅᔪᑦ:
  • ᐅᓱᒻᒧᑦ ᐴᑦ
  • ᐅᑦᑑᓐᓄᒃ ᐴᑦ
• ᐊᑐᖃᑦᑕᕐᓗᑎᑦ ᓴᓗᐊᔾᔭᐃᒃᑯᒻᒥᑦ ᓱᕋᖁᓇᒍ: ᐃᒥᓖᑦ ᓴᓗᐊᔾᔭᐃᒃᑯᑏᑦ ᐋᔅᑐᒐᓚᐃᑦ ᐊᒻᒪᓗ ᐅᖅᓱᓖᑦ ᑯᔭᑦᑐᖅᓯᐅᑏᑦ ᐃᑲᔫᑎᖃᖅᐳᑦ ᐱᐊᖁᓪᓗᒍ ᑯᔭᑦᑎᓪᓗᒋᒃ ᓱᕋᖁᓇᒍᓗ.
• ᐊᑐᕆᐊᖃᖅᐳᖅ ᐅᓱᒻᒧᑦ ᐴᖅ ᐊᑕᐅᓯᐊᖏᓐᓇᖅ: ᐊᑕᐅᓯᐊᖏᓐᓇᖅ ᐊᑐᕆᐊᖃᖅᐸᐃᑦ ᐴᖅ ᐃᒋᓪᓗᒍᓗ ᐊᑐᕇᕈᕕᐅᒃ. ᓄᑖᒥᒃ ᐊᑎᓯᖃᑦᑕᕐᓗᑎᑦ ᑯᔭᓐᓂᐊᓕᕋᐃᒍᕕᑦ. ᐲᕈᕕᐅᒃ ᐴᖅ (ᐊᖑᑎᓯᐅᑦ ᐊᕐᓇᖅᓯᐅᓪᓘᓐᓃᑦ) ᐊᑐᒃᑲᓐᓂᖅᑕᐃᓕᒍᒃ - ᐃᒋᒋᐊᖃᖅᐸᐃᑦ.
• ᐊᑕᐅᓯᐅᓐᖏᑦᑐᒥᑦ ᐊᑐᕋᓱᖃᑦᑕᖅᑕᐃᓖᑦ ᐴᕐᒥᑦ: ᐊᑐᖃᑦᑕᖅᑕᐃᓖᑦ ᐊᖑᒻᒧᑦ ᐊᒻᒪᓗ ᐊᕐᓇᕐᒧᑦ ᐴᓐᓂᒃ ᐊᑕᐅᑦᑎᒃᑯᑦ ᐊᒻᒪᓗ ᒪᕐᕉᓕᖅᑲᖓᑎᒐᓱᐊᖅᑕᐃᓕᒃᑭᒃ ᐊᖑᒻᒧᑦ ᐊᕐᓇᒧᓪᓘᓐᓃᒃ ᐴᒃ ᐊᑕᐅᑦᑎᒃᑯᑦ. ᒪᕐᕉᓐᓂᒃ ᐊᑐᕈᕕᑦ ᑕᑦᑐᕿᑦᑕᕐᓂᐅᓴᒻᒪᑎᒃ ᑕᒪᒃᑮᓪᓗ ᓱᕋᒍᓐᓇᖅᑐᑎᒃ.

ᐃᓚᖏᑦ ᓈᒻᒪᔅᓴᓐᖏᓚᑦ ᐃᓚᖏᓐᓂᑦ ᐴᕐᓂᒃ ᐅᕝᕙᓘᓐᓃᑦ ᖃᐸᐃᔭᐅᑎᓂᒃ ᐴᕐᓃᑦᑐᓂᒃ. ᖃᐅᔨᒍᔅᓯᒃ ᐃᕝᕕᑦ ᐊᐃᑉᐸᐃᓪᓘᓐᓃᑦ ᐆᒃᑯᔅᓯ, ᐅᖏᓚᓕᕈᔅᓯᒃ ᐅᕝᕙᓘᓐᓃᑦ ᐳᓪᓕᕈᔅᓯᒃ ᐊᑐᓚᐅᖅᑐᓯᒃ ᐴᕐᒥᑦ ᓈᒻᒪᓴᓐᖏᑐᐃᓐᓇᕆᐊᖃᕋᔅᓯᒃ ᑎᒥᓯᒃ. ᐃᓚᖏᑦ ᖃᐸᐃᔭᐅᑎᖃᓐᖏᑦᑑᕗᑦ ᐴᑦ. ᐊᐱᕆᔪᓐᓇᖅᐳᑎᑦ ᐋᓐᓂᐊᓯᐅᖅᑎᒥᑦ ᐄᔭᒐᖅᑖᖅᑎᑦᑎᔨᒥᓪᓘᓐᓃᑦ ᓇᓕᐊ ᐱᐅᓂᖅᓴᐅᒻᒪᖔᖅ ᐃᓕᓐᓄᑦ.