ᕿᑐᕐᙵᖅᑖᖅᑕᐃᓕᒪᓂᕐᒧᓪᓗ

  • ᐄᔭᒐᐃᑦ ᓇᔾᔨᓇᓐᖏᑦᑐᑦ ᐄᔭᒐᐃᑦ ᓇᔾᔨᓇᓐᖏᑦᑐᒥᑦ ᑕᐃᔭᐅᓲᑦ ᐋᓐᓂᐊᕕᒻᒥ ᐱᔭᔅᓴᐅᕗᑦ ᖃᐅᑕᒫᓪᓗ ᐄᖅᑲᕆᐊᖃᖅᑐᒋᑦ ᑕᕝᕙᓂᔅᓴᐃᓐᓇᖅ ᓯᕿᓐᖑᔭᖓᓂ. ᐄᔭᒐᐃᑦ ᓄᖅᑲᖓᔾᔪᑕᐅᔪᑦ ᒪᓐᓂᒃᑯᕖᓐᓄᑦ ᓄᖅᑲᖓᑎᑦᑎᓪᓗᑎᒃ ᐃᖏᕐᕋᓂᖏᓐᓂᒃ ᒪᓐᓃᒃ. ᑖᒃᑯᐊ ᐊᑑᑎᖃᕐᓂᖏᑦ 99.9%-ᖑᕗᑦ ᓇᔾᔨᓕᖅᑕᐃᓕᔾᔪᑕᐅᔪᓐᓇᖅᑐᑎᒃ ᐊᑐᖅᑕᐅᑦᑎᐊᖅᐸᑕ. ᐄᔭᒐᐃᑦ ᓇᔾᔨᓇᓐᖏᑦᑐᑦ ᓄᖅᑲᖓᑎᑦᑎᔾᔪᑕᐅᔪᓐᓇᓐᖏᓚᑦ ᖁᐱᕐᕆᓐᓂᐅᕙᑦᑐᓂᒃ ᑕᐃᒪᐃᒻᒪᑦ ᐊᑐᕆᐊᖃᖅᐳᑎᑦ ᐴᕐᒥᑦ.
  • ᓇᔾᔨᓇᓐᖏᑦᑐᑦ ᓂᐱᑎᑕᒐᐃᑦ ᓂᐱᒋᐊᖃᖅᐳᑦ ᐊᕐᓇᐅᑉ ᐅᕕᓂᖓᓄᑦ ᐲᔭᐃᓪᓗᓂ ᐆᒪᔾᔪᑎᓂᒃ ᓄᖅᑲᖓᑎᑦᑎᔪᓐᓇᖅᑐᓂᒃ ᒪᓐᓂᖃᕐᕖᑦ ᐲᔭᐃᖁᓇᒋᑦ ᒪᓐᓂᓂᒃ. ᑖᓐᓇ ᓂᐱᑎᑕᒐᖅ ᐊᓯᔾᔨᖅᑕᐅᖃᑦᑕᕆᐊᖃᖅᐳᖅ ᐅᓪᓗᑦ 7 ᐊᓂᒍᕋᐃᑉᐸᑕ. ᓂᐱᑎᑕᒐᐃᑦ ᐊᑐᖅᑕᐅᖃᑦᑕᖅᐳᑦ ᐱᖓᓱᓂᑦ ᐱᓇᓱᐊᕈᓯᕐᓂᑦ ᐲᖅᓯᒪᕙᑦᑐᑎᒃ 7-ᓂᒃ ᐅᓪᓗᓂᒃ. ᐄᔭᒐᖅᑎᑐᑦ ᐊᐅᓚᓂᖃᖅᐳᑦ. 99%-ᖑᓪᓗᓂ ᐊᑑᑎᖃᕐᓂᖓ ᓇᔾᔨᓇᓐᖏᑦᑐᑦ ᑭᓯᐊᓂᑦᑕᐅᖅ ᓄᖅᑲᖓᔾᔪᑕᐅᓐᖏᓚᑦ ᖁᐱᕐᕆᓐᓂᐅᕙᑦᑐᓂᒃ ᑕᐃᒪᐃᒻᒪᑦ ᐊᑐᕆᐊᖃᖅᐳᑎᑦ ᐴᕐᒥᑦ.
  • ᑲᐴᑏᑦ ᑲᐱᔭᐅᖃᑦᑕᕆᐊᖃᖅᐳᑦ 12-13 ᐱᓇᓱᐊᕈᓯᕐᓂᑦ ᐊᑐᑦᑎᐊᖁᓪᓗᒋᑦ. ᑲᐴᑦ ᑕᐃᔭᐅᕗᖅ ᖃᓪᓗᓈᑎᑐᑦ ᑎᐳ-ᐳᕈᕕᐅᕋ ᐊᑐᖅᑐᓂᓗ ᐆᒪᔾᔪᑎᓂᒃ ᓄᖅᑲᖓᔾᔪᑕᐅᓪᓗᓂ ᒪᓐᓂᒃᑯᕖᓐᓄᑦ ᐲᔭᐃᖁᓇᒋᑦ ᒪᓐᓂᓂᑦ ᐊᒻᒪᓗ ᐊᒥᓪᓕᑎᑦᑎᓪᓗᓂ ᐊᕙᓗᖓᓂᑦ ᐃᓪᓕᐊᑉ. 99%-ᖑᓪᓗᓂ ᐊᑑᑎᖃᕐᓂᖓ ᓇᔾᔨᓇᓐᖏᑦᑐᖅ. ᑭᓯᐊᓂ ᑭᒃᑯᓕᒫᓄᑦ ᑐᕌᖓᓐᖏᓚᖅ, ᓴᐅᓂᕐᓄᑦ ᐊᑭᓪᓕᔾᔪᑕᐅᔪᓐᓇᕐᒪᑕ. ᑎᐳ-ᐳᕈᕕᐅᕋ ᓄᖅᑲᖓᑎᑦᑎᓐᖏᓚᖅ ᖁᐱᕐᕆᓐᓂᐅᕙᑦᑐᓂᒃ ᑕᐃᒪᐃᒻᒪᑦ ᐊᑐᕆᐊᖃᖅᐳᑎᑦ ᐴᕐᒥᑦ.
  • ᐅᑦᑑᓐᓄᑦ ᓂᒥᖅ, ᑕᐃᔭᐅᔪᖅ ᓄᕙᕆᖕ ᐊᑐᖅᑕᐅᓲᖑᕗᖅ ᐅᑦᑑᑉ ᐃᓗᐊᓂ ᐆᒪᔾᔪᑎᓂᒃ ᓄᖅᑲᖓᔾᔪᑕᐅᓪᓗᓂ ᒪᓐᓂᒃᑯᕖᓐᓄᑦ ᐲᔭᐃᖁᓇᒋᑦ ᒪᓐᓂᓂᑦ ᐊᒻᒪᓗ ᐊᒥᓪᓕᑎᑦᑎᓪᓗᓂ ᐊᕙᓗᖓᓂᑦ ᐃᓪᓕᐊᑉ. ᐊᕐᓇᐃᑦ ᐊᑐᓲᖑᕗᑦ ᓂᒥᕐᒥᑦ ᐱᖓᓱᓄᑦ ᐱᓇᓱᐊᕈᓯᕐᓄᑦ ᐊᑕᐅᓯᕐᒥᑦ ᐱᓇᓱᐊᕈᓯᕐᒥᑦ ᐲᖅᓯᒪᓪᓗᒍ. ᑕᐃᒫᑎᑐᑦ ᐄᔭᒐᖅᑎᑐᑦ ᐃᑲᔫᑎᖃᕐᓂᖃᖅᐳᖅ, ᑭᓯᐊᓂ ᓄᖅᑲᖓᑎᑦᑎᓐᖏᓚᖅ ᖁᐱᕐᕆᓐᓂᐅᕙᑦᑐᓂᒃ ᑕᐃᒪᐃᒻᒪᑦ ᐊᑐᕆᐊᖃᖅᐳᑎᑦ ᐴᕐᒥᑦ.
  • ᐃᓪᓕᐊᑉ ᐃᓗᐊᓅᒐᖅ ᓇᔾᔨᓇᓐᖏᑦᑐᖅ, ᑕᐃᔭᐅᔪᖅ ᒧᕇᓇ, ᓇᔾᔨᓇᓐᖏᓚᖅ ᑕᓪᓕᒪᓄᑦ ᐊᕐᕌᒍᓄᑦ. T-ᖑᐊᖑᕗᖅ ᐴᖅᑕᐅᒋᐊᖃᖅᑐᓂ ᐋᓐᓂᐊᓯᐅᖅᑎᒧᑦ ᐃᕝᕕᑦ ᐃᓪᓕᐊᖓᓄᑦ. ᑕᖅᑲᒪᓃᑎᓪᓗᒍ ᓴᖅᑮᕗᖅ ᐆᒪᔾᔪᑎᓂᒃ ᓵᓪᓕᒋᐊᕈᑕᐅᓪᓗᓂ ᐃᓪᓕᐊᑉ ᐊᕙᓗᐊᓂᑦ ᐊᒻᒪᓗ ᖃᐸ ᐃᓂᑖᕈᓐᓇᐃᓕᓪᓗᓂ ᑕᖏᑖᕈᓐᓇᐃᓕᓪᓗᓂ ᐊᕙᓗᐊᓂ ᐃᓪᓕᐊᖅᐱᑦ. ᐊᑑᑎᖃᕐᓂᖃᖅᐳᖅ 99%-ᖑᓕᐊᖅᑐᒥᑦ ᓇᔾᔨᓇᓐᖏᑦᑐᖅ, ᑭᓯᐊᓂ ᓄᖅᑲᖓᑎᑦᑎᓐᖏᓚᖅ ᖁᐱᕐᕆᓐᓂᐅᕙᑦᑐᓂᒃ ᑕᐃᒪᐃᒻᒪᑦ ᐊᑐᕆᐊᖃᖅᐳᑎᑦ ᐴᕐᒥᑦ.
  • ᑐᐊᕕᕐᓇᖅᑐᖅ ᐄᔭᒐᖅ, ᖃᐅᔨᒪᔭᐅᒻᒥᔪᖅ ᖃᓪᓗᓈᑎᑐᑦ “ᖃᐅᑎᓪᓗᒍ” ᐄᔭᒐᖅ ᐅᕝᕙᓘᓐᓃᑦ “ᐸᕐᓇᐅᑎᐅᑉ ᐊᐃᑉᐸᖓ”, ᐊᑐᖅᑕᐅᔪᓐᓇᖅᐳᖅ ᐱᖓᓱᓂᑦ ᐅᓪᓗᓂᒃ ᓇᔾᔨᓇᓐᖏᑦᑐᖅᑐᓐᖏᓪᓗᓂ ᐊᒻᒪᓗ ᐴᖅᓯᒪᓐᖏᓪᓗᓂ. ᐊᐅᓚᓂᖃᖅᐳᖅ ᒪᓐᓂᕈᖅᑐᖅ ᐃᓂᑖᖅᑕᐃᓕᑎᑦᑐᓂᐅᒃ ᐃᓪᓕᐊᕐᒥᑦ.
    • ᑐᐊᕕᕐᓇᖅᑐᒃᑯᑦ ᓇᔾᔨᓇᓐᖏᑦᑐᖅ ᐄᔭᒐᖅ ᓇᔾᔨᐊᖏᕈᑕᐅᓐᖏᓚᖅ - ᓄᖅᑲᖓᔾᔪᑕᐅᕗᖅ ᓇᔾᔨᓂᕐᒥᒃ. ᐄᔭᐅᒋᐊᖃᖅᑐᓂ ᐱᖓᓱᑦ ᐅᓪᓗᐃᑦ ᐃᓗᐊᓂ ᑯᔭᓚᐅᖅᑎᓪᓗᒋᒃ. ᒪᓐᓂᒃ ᐃᓪᓕᐊᕐᒥᑦ ᐃᓂᑖᕇᕐᓂᖅᐸᑦ ᑖᓐᓇ ᑐᐊᕕᕐᓇᖅᑐᖅ ᐄᔭᒐᖅ ᐃᑲᔫᑎᖃᕋᔭᓐᖏᓚᖅ. ᓇᔾᔨᒌᕈᕕᑦ ᑐᐊᕕᕐᓇᖅᑐᖅ ᐄᔭᒐᕈᕕᑦ ᓇᓗᓇᐃᖅᓯᒪᔪᖅᑕᖃᓐᖏᓚᖅ ᐱᐅᓐᖏᒍᓐᓇᕆᐊᖓ ᐃᓕᓐᓄᑦ ᓇᔾᔨᐊᓐᓄᓪᓗ. ᑐᐊᕕᕐᓇᖅᑐᖅ ᐄᔭᒐᖅ ᓄᖅᑲᖓᔾᔪᑕᐅᓐᖏᓚᖅ ᖁᐱᕐᕆᓐᓇᐅᔪᓂᑦ ᑯᔭᓐᓂᕈᕕᑦ ᐴᖅᓯᒪᓐᖏᓪᓗᑎᑦ ᖃᐅᔨᓴᖅᑕᐅᒋᐊᖃᖅᐳᑎᑦ ᖁᐱᕐᕆᓯᒪᓐᖏᒃᑲᓗᐊᕐᒪᖔᖅᐱᑦ - ᐱᓗᐊᖅᑐᒥᑦ ᓇᔾᔨᒍᕕᑦ. ᑖᓐᓇ ᐊᑐᖅᑕᐅᒋᐊᖃᓐᖏᓚᖅ ᓇᔾᔨᓇᓐᖏᑦᑐᖅᑐᐃᓐᓇᖅᑕᐅᕙᑦᑐᑎᑐᑦ.
    • ᐱᔪᓐᓇᖅᐳᑎᑦ ᑐᐊᕕᕐᓇᖅᑐᒃᑯᑦ ᓇᔾᔨᓇᓐᖏᑦᑐᒥᑦ ᐋᓐᓂᐊᕕᒻᒥᑦ ᐅᕝᕙᓘᓐᓃᑦ ᐄᔭᒐᖅᑖᕐᕕᒻᒥᑦ ᐋᓐᓂᐊᕕᓕᐊᖅᑳᓐᖏᒃᑲᓗᐊᕈᕕᑦ. ᐋᓈᓇᒃᑯᓯᓐᓄᑦ ᐊᖏᖅᑕᐅᖅᑳᖅᓯᒪᒋᐊᖃᓐᖏᓚᑎᑦ ᐱᔪᒪᓂᐊᕐᓗᑎᑦ ᑐᐊᕕᕐᓇᖅᑐᒃᑯᑦ ᓇᔾᔨᓇᓐᖏᑦᑐᒥᑦ ᐄᔭᒐᕐᒥᑦ.

    • ᐊᑖᓂ ᖃᕋᓴᐅᔭᒃᑯᑦ ᑐᕌᕈᑦ ᑐᑭᓯᒋᐊᕐᕕᔅᓴᐅᕗᖅ ᑐᐊᕕᕐᓇᖅᑐᒃᑯᑦ ᓇᔾᔨᓇᓐᖏᑦᑑᑉ ᒥᔅᓵᓄᑦ ᐅᕗᖓ: http://www.planb.ca/why.html

    • ᓇᓗᓇᐃᖅᓱᑦᑎᐊᖅᓯᒪᓂᖅᓴᓂᒃ ᑐᑭᓯᒋᐊᕈᒪᒍᕕᑦ ᖃᓄᐃᑦᑑᓂᖏᓐᓂᑦ ᓇᔾᔨᓇᓐᖏᑦᑐᑦ, ᐊᒻᒪᓗ ᖃᓄᐃᑉᐸᒻᒪᖔᖅ ᓇᔾᔨᓇᓐᖏᑦᑐᑐᖅᑕᐃᑦ (ᓲᕐᓗ ᐳᐃᒍᕐᓂᕈᕕᑦ ᐄᓯᒋᐊᖓ, ᐅᕝᕙᓘᓐᓃᑦ ᓂᒦᑦ ᐲᕐᓂᖅᐸᑦ), ᐊᒻᒪᓗ ᐃᑲᔫᑎᖃᖅᑐᓂ ᓂᕈᐊᕋᓱᑦᑎᓪᓗᑎᑦ ᖃᓄᐃᑦᑐᖅ ᐃᓕᓐᓄᑦ ᓇᔾᔨᓇᓐᖏᑦᑐᖅ ᐱᐅᓂᖅᐹᖑᒻᒪᖔᑦ, ᐅᖃᖃᑎᖃᕈᓐᓇᖅᐳᑎᑦ ᓘᑦᑖᒥᒃ ᐋᓐᓂᐊᓯᐅᖅᑎᒥᓪᓘᓐᓃᑦ ᐅᓇᓘᓐᓃᑦ ᖃᐅᔨᒋᐊᕐᕕᒋᓗᒍ ᖃᕋᓴᐅᔭᒃᑯᑦ ᑐᕌᕈᑦ: