ᓄᓕᐊᕈᒪᓗᑎᑦ ᐃᓱᒪᖃᓕᕈᕕᑦ, ᖃᐅᔨᒪᑦᑎᐊᕆᐊᖃᖅᐳᑎᑦ ᓯᖓᐃᓕᑐᐃᓐᓇᕆᐊᖃᕋᕕᑦ ᐅᕝᕙᓘᓐᓃᑦ ᓄᓕᐊᕐᓂᒃᑯᑦ ᖁᐱᕐᕆᑐᐃᓐᓇᕆᐊᖃᕋᕕᑦ (STI-ᖑᓂᕋᖅᑕᐅᔪᖅ) ᐱᖃᑎᒋᔭᕐᓂ. ᖁᐱᕐᕆᑎᑕᐅᑐᐃᓐᓇᕆᐊᖃᕐᓂᕐᓄᑦ ᓯᖓᐃᓕᑐᐃᓐᓇᕆᐊᖃᕐᓂᕐᓄᓪᓘᓐᓃᑦ, ᖃᓄᑐᐃᓐᓇᖅ ᐃᓕᖕᓂ ᓴᐳᔾᔨᓯᒪᓇᓱᒍᓐᓇᖅᐳᑎᑦ. ᐃᒪᓐᓇ ᑕᐃᔭᐅᕙᒃᖢᑎᒃ ‘ᐊᑦᑕᕐᓇᙱᓐᓂᖅᓴᒥᒃ ᓄᓕᐊᕐᓂᖅ’. ᐊᑦᑕᕐᓇᙱᓐᓂᖅᓴᒥᒃ ᓄᓕᐊᕐᓂᕐᒥᒃ ᓂᕈᐊᕆᔭᖃᕈᕕᑦ ᐃᓕᖕᓂᒃ ᑎᒥᖕᓂᓪᓗ ᐃᒃᐱᒋᔭᖃᕐᓂᖅᓴᐅᓂᐊᖅᐳᑎᑦ, ᐊᒻᒪᓗ ᐱᖃᑎᒋᔭᕐᓂᒃ ᑎᒥᖓᓂᓪᓗ ᐃᒃᐱᒋᔭᖃᕐᓂᖅᓴᐅᓂᐊᕆᕗᑎᑦ.
ᓴᐳᑎᓯᒪᒋᑦ
ᐊᑦᑕᕐᓇᙱᓐᓂᖅᓴᒥᒃ ᓄᓕᐊᕐᓂᖅ ᐱᒋᐊᕈᑎᖃᖃᑦᑕᖅᐳᖅ ᐃᓱᒪᒋᔭᖃᓕᕌᖓᒥᒃ ᓄᓕᐊᕐᓂᒃᑯᑦ ᖁᐊᖅᓵᕐᓇᕈᓐᓇᖅᑐᓂᒃ ᐊᓱᐃᓛᒃ ᐋᖅᑭᒃᓯᓇᓱᒍᓐᓇᖅᓯᕙᒃᖢᑎᒃ ᐊᑦᑕᕐᓇᙱᓐᓂᖅᓴᒥᒃ ᓄᓕᐊᕐᓂᕐᒥᒃ. ᒪᑯᓂᖓ ᐋᖅᑭᒃᓱᐃᔪᓐᓇᕐᓂᖅ ᖃᓄᖅ ᐊᖏᑎᒋᔪᒥᒃ ᖁᐊᖅᓴᕐᓇᖅᑐᒃᑰᕈᓐᓇᕐᓂᐊᕐᒪᖔᖅᐱᑦ ᖁᐱᕐᕆᓯᒪᓕᕐᓂᕈᕕᑦ ᓯᖓᐃᓕᕐᓂᕈᕕᓪᓘᓐᓃᑦ.
ᓄᓕᐊᖃᑦᑕᕐᓂᖅ ᐃᓱᒪᒃᑯᑦ ᖁᐊᖅᓵᕐᓇᕈᑕᐅᑐᐃᓐᓇᕆᐊᖃᕆᕗᖅ. ᐃᒃᐱᒋᔭᒃᑯᑦ ᐋᓐᓂᖅᑕᐅᑐᐃᓐᓇᕆᐊᖃᖅᐳᑎᑦ ᓄᒫᓇᖅᑐᖅᓯᐅᕕᒡᔪᐊᓕᕐᓗᑎᓪᓘᓐᓃᑦ. ᐃᒪᓐᓇᐅᔪᓐᓇᕆᓪᓗᓂ “ᓇᒡᓕᒋᓇᓱᒋᔭᐃᑦ” ᐃᓕᓐᓂᐊᕐᕕᖕᒥ ᐅᖃᐅᓯᐅᕈᓘᔭᑲᑕᓕᕈᓐᓇᖅᖢᓂ ᐱᖃᓐᓇᕆᔭᕐᓄᑦ. ᑕᐃᒪᐃᑉᐸᓪᓕ, ᐃᓚᖏᓐᓂᒃ ᐋᓐᓂᕐᓇᖅᑐᓂᒃ ᐅᖃᐅᔾᔭᐅᑲᑕᓕᑐᐃᓐᓇᕆᐊᖃᖅᐳᑎᑦ - ᓲᕐᓗ “slut”, “skank” ᐅᕝᕙᓘᓐᓃᑦ “sleeze”. ᑖᒃᑯᐊ ᐅᖃᐅᓰᑦ ᐋᓐᓂᕈᑕᐅᔪᓐᓇᖅᐳᑦ ᐃᒃᐱᒋᔭᖃᑦᑎᐊᙱᑦᑐᓄᓪᓗ ᐊᑐᖅᑕᐅᕙᒃᖢᑎᒃ.