ᐊᒥᓲᕗᑦ ᐋᖅᑭᒋᐊᕈᑎᔅᓴᐃᑦ ᐱᑦᑎᐊᕐᓂᖅᓴᐅᔪᒪᒍᔅᓯᒃ ᐊᐃᑉᐸᐃᓪᓗ. ᐱᓗᐊᖅᑐᒥᑦ ᐱᒋᐊᕈᑎᒋᓗᒍ ᐱᖃᑦᑕᕈᕕᐅᒃ ᑕᐃᒫᒃ ᐱᔭᐅᖃᖅᑕᕈᒪᒍᕕᑦ.

• ᓈᓚᖃᑦᑕᕐᓗᒍ (ᓈᓚᓪᓚᑦᑖᕐᓗᒍ): ᑕᒪᓐᓇ ᑐᑭᖃᓐᖏᓚᖅ ᓂᐸᐃᑐᐃᓐᓇᕐᓂᕐᒥᒃ ᐊᓰᑦ ᐅᖃᓪᓚᑦᑎᓪᓗᒍ. ᓈᓚᑦᑎᐊᕆᐊᖃᖅᐸᑦ ᐊᐃᑉᐸᐃᑦ ᐅᖃᐅᓯᖏᑦ ᑐᑭᓯᐊᓗᒋᑦ. ᐃᓱᒪᔅᓴᖅᓯᐅᕈᑎᒋᓗᒋᑦ ᐅᖃᐅᓯᖏᑦ. ᓂᓪᓕᐊᑎᓪᓗᒍ ᓄᖅᑲᖅᑎᖃᑦᑕᖏᓪᓗᒍ ᐅᕝᕙᓘᓐᓃᑦ ᐃᓱᒪᔅᓴᖅᓯᐅᖅᑳᖃᑦᑕᕐᓗᑎᑦ ᓂᓪᓕᓚᐅᓐᖏᓂᓐᓂᑦ.
• ᓱᓕᔪᒥᑦ ᐅᖃᖃᑦᑕᕐᓗᑎᑦ: ᖃᓄᑐᐃᓐᓇᐅᒐᓗᐊᖅᐸᑦ ᓱᓕᔪᒥᑦ ᐅᖃᖃᑦᑕᕆᑦ ᐊᐃᑉᐸᕐᓄᑦ. ᓱᓕᔪᒥᑦ ᐅᖃᐃᓐᓇᖃᑦᑕᕈᕗᑦ ᐊᐃᑉᐸᐃᑦ ᐊᖑᓯᓚᐅᖅᓯᒪᔾᔮᓐᖏᓚᖅ ᓴᓪᓗᑎᓪᓗᑎᑦ. ᐊᒻᒪᓗ ᑕᒪᓐᓇ ᓱᓕᔪᒥᑦ ᐅᖃᖃᑦᑕᕐᓂᖅ ᐅᑉᐱᕆᓕᐅᑕᐅᑦᑎᐊᕈᓐᓇᖅᐳᖅ.
• ᑭᓱᓕᒫᓂᑦ ᐋᖅᑮᒐᓱᖃᑦᑕᖏᓪᓗᑎᑦ: ᐊᐃᑉᐸᐃᑦ ᐅᖃᕈᒪᑐᐃᓐᓇᖃᑦᑕᖅᐳᖅ ᖃᓄᖅ ᐃᑉᐱᓐᓂᐊᒻᒪᖔᖅ. ᐃᑲᔪᖅᑕᐅᔪᒪᓪᓗᓂ ᐃᓕᓐᓄᑦ. ᑭᓱᓕᒫᓂᑦ ᐋᖅᑮᒋᐊᑐᓐᖏᓚᑎᑦ. ᐃᑲᔪᖅᓱᑐᐃᓐᓇᕆᐊᖃᖅᐳᑎᑦ.
• ᓱᖃᑦᑕᕆᑦ ᐊᐃᑉᐸᖅᐱᑦ ᓱᒍᒪᔭᖏᓐᓂᑦ ᑕᒪᓐᓇ ᓴᖅᑮᒻᒪᑦ ᐱᓐᓇᕆᒐᕕᐅᒃ ᐊᒻᒪᓗ ᓱᖁᔭᖏᑦ ᓱᒍᒪᒐᕕᒋᑦ: ᐊᐃᑉᐸᕇᑦ ᑕᒪᒃᑮᒃ ᑐᓂᓯᕙᑉᐴᒃ ᐱᕙᑦᑐᑎᓪᓗ ᐊᐃᑉᐸᒥᓂᒃ. ᑕᒪᓐᓇ ᑐᑭᖃᖅᐳᖅ ᓱᒍᒪᔭᖏᑦ ᐊᐃᑉᐸᕕᑦ ᐊᒻᒪᓗ ᓱᒍᒪᔭᑎᑦ ᐊᑐᖃᑦᑕᕐᓗᓯᐅᒃ. ᐊᒻᒪᓗ ᖃᓄᐃᓐᖏᑦᑎᐊᖅᐳᖅ ᐊᐱᕆᒋᐊᖓ “ᓱᒍᒪᕕᓪᓕ?”
• ᑐᑭᓯᐊᑦᑎᐊᕐᓗᒍ ᖃᓄᖅ ᐃᑉᐱᓐᓂᐊᒻᒪᖔᖅ: ᐃᒻᒥᓄᑦ ᐊᐱᕆᓚᐅᖃᑦᑕᕆᑦ ᓇᒻᒥᓂᖅ, “ᖃᓄᖅ ᐃᓱᒪᒐᔭᖅᐳᖓ ᑕᐃᒪᐃᖔᕐᓂᕈᒪ? ᐃᓱᒪᒋᔭᐅᑦᑎᐊᕋᔭᖅᐳᖔ, ᐅᑉᐱᕆᔭᐅᒐᔭᖅᐳᖔ, ᐱᐅᒋᔭᐅᒐᔭᖅᐳᖔ ᐅᕝᕙᓘᓐᓃᑦ ᓇᓪᓕᒋᔭᐅᒐᔭᖅᐳᖔ?” ᑕᒪᓐᓇ ᐃᒻᒥᓄᑦ ᐊᐱᖅᑯᑎᒋᖃᑦᑕᕈᕕᐅᒃ ᐱᒻᒪᕆᐅᕗᖅ ᐃᓱᒪᔅᓴᖅᓯᐅᓚᐅᓐᖏᓂᓐᓂᑦ.
• ᓇᓗᓇᐃᑦᑎᐊᕐᓗᒋᑦ ᐅᖃᐅᓯᕆᔭᑎᑦ: ᐊᐃᑉᐸᐃᑦ ᓈᓚᑦᑎᐊᖅᑐᒋᓐᖏᒃᑯᕕᐅᒃ ᐅᖃᐅᓯᕆᔭᕐᓄᑦ ᖃᐅᔨᒋᐊᕈᓐᓇᖅᐳᑎᑦ ᑐᑭᓯᑦᑎᐊᕋᓗᐊᕐᒪᖔᖅ. ᐃᓛᓐᓂᒃᑯᑦ ᐊᐃᑉᐸᕇᓐᓂᐅᑉ ᐊᒻᒪᓗ ᑐᑎᓐᓂᐅᑉ ᒥᔅᓵᓄᑦ ᐅᖃᐅᓯᖃᕆᐊᖓ ᐱᒡᒐᓇᖃᑦᑕᖅᐳᖅ, ᓇᓗᓕᐅᖅᑲᓇᖅᑐᓂ ᖃᓄᖅ ᐅᖃᕐᓂᐊᕆᐊᖓ. ᓇᓗᓇᐃᖅᓱᑦᑎᐊᕐᓗᑎᑦ ᑭᓱᓂᒃ ᐱᔪᒪᒻᒪᖔᖅᐱᑦ ᐱᔪᒪᓐᖏᒻᒪᖔᖅᐱᓪᓗ -- ᓱᒐᔭᖅᐱᑦ ᐊᒻᒪᓗ ᓱᒐᔭᓐᖏᓚᑎᑦ. ᐃᓛᓐᓂᒃᑯᑦ ᐅᖃᕋᓱᐊᖅᑕᕋᓗᐊᑦ ᐊᐃᑉᐸᖅᐱᑦ ᑐᑭᓯᓂᕐᓗᒍᓐᓇᖅᐹ. ᐅᖃᓪᓚᑦᑎᐊᓐᖏᒃᑯᕕᑦ ᑐᑭᓯᔭᐅᑦᑎᐊᕋᔭᓐᖏᓚᑎᑦ, ᖁᐊᖅᓵᕋᔭᓐᖏᓚᑎᑦ ᐱᔪᒪᔭᕋᓗᐊᓐᓂᑦ ᐱᓐᓂᖏᒃᑯᕕᑦ.
• ᐱᔪᒥᓇᑦᑎᐊᖅᑐᒥᑦ ᐃᓅᓯᖃᕆᑦ: ᐱᒻᒪᕆᐅᓗᐊᓐᖑᐊᖅᐳᖅ ᐱᔪᒥᓇᑦᑎᐊᖅᑐᒥᑦ ᐃᓅᓯᖃᕐᓃᑦ ᐊᐃᑉᐸᐃᑦ ᐊᔾᔨᒋᓐᖏᑕᓐᓂᒃ ᐱᐅᔅᓴᕋᓗᐊᖅᐸᑦ. ᐱᔪᒥᓇᓐᖏᑦᑐᒥᒃ ᐃᓕᖅᑯᓯᖅᓱᓚᐅᓐᖏᓂᓐᓂ ᐊᐃᑉᐸᐃᓪᓗ ᑕᒻᒪᕐᓂᕋᖃᑦᑕᕐᓗᒍ ᓇᒻᒥᓂᖅ ᐊᐱᕆᖅᑳᕆᐊᖃᖅᐳᑎᑦ - “ᖃᓄᑎᒋ ᐱᒻᒪᕆᐅᓂᖃᖅᐸ?” ᑭᒃᑯᓕᒫᑦ ᑐᓵᒍᒪᓐᖏᒻᒪᑕ ᕿᓄᔪᐊᓗᑐᐃᓐᓇᕐᓂᑦ.
• ᐅᑉᐱᕆᔭᑎᑦ ᐊᑐᑦᑎᐊᑐᐃᓐᓇᒃᑭᑦ: ᖃᐅᔨᒪᒋᐊᕆᐊᖃᖅᐳᑎᑦ ᑐᓵᔭᐅᑦᑎᐊᕋᓗᐊᕐᒪᖔᖅᐱᑦ, ᑐᑭᓯᔭᐅᑦᑎᐊᕋᓗᐊᕐᒪᖔᖅᐱᑦ ᐊᒻᒪᓗ ᐃᓱᒪᒋᔭᐅᑦᑎᐊᕋᓗᐊᕐᒪᖔᖅᐱᑦ. ᐊᐃᑉᐸᐃᑦ ᑕᐃᒪᐃᓐᖏᑉᐸᑦ ᐅᖃᖃᑎᒋᑦᑕᐅᑎᒋᒐᓱᐊᕆᐊᖃᖅᐸᐃᑦ. ᑲᑉᐱᐊᓱᑦᑕᐃᓖᑦ ᐅᑉᐱᕆᔭᕐᓂᑦ ᐊᑐᕆᐊᖓ ᐱᐅᒋᔭᕐᓂᑦ ᐊᒻᒪᓗ ᐱᐅᒋᓐᖏᑕᕐᓂᒃ.
• ᐅᖃᐅᓯᖃᕈᓘᔭᖃᑦᑕᖅᑕᐃᓖᑦ ᐊᐃᑉᐸᖅᐱᑦ ᒥᔅᓵᓄᑦ: ᐃᓱᒪᔅᓴᖅᓯᐅᖅᑳᖃᑦᑕᕆᑦ ᐊᓯᖏᑦ ᐱᖃᓐᓇᕆᔭᑎᑦ ᐅᖃᐅᑎᓂᐊᕈᕕᒍᑦ ᑲᓐᖑᓇᖅᑐᕈᔪᓐᓂᑦ ᐊᐃᑉᐸᖅᐱᑦ ᒥᔅᓵᓄᑦ. ᑭᒃᑯᓕᒫᑦ ᐅᖃᐅᓯᖃᓕᓲᖑᒻᒪᑕ ᐱᖃᓐᓇᕆᔭᖏᑕ ᒥᔅᓵᓄᑦ. ᑭᓯᐊᓂ ᐱᐅᒐᔭᓐᖏᓚᖅ ᐅᖃᐅᓯᖃᓕᕐᓂᕈᕕᑦ ᑲᓐᖑᓇᖅᑐᓂᒃ ᑲᓐᖑᓱᓕᕈᑎᒋᔪᓐᓇᖅᑕᖏᓐᓂᑦ ᐊᐃᑉᐸᖅᐱᑦ. ᐊᐃᑉᐸᐃᑦ ᐱᖃᓐᓇᕆᓐᖏᒃᑯᕕᐅᒃ ᐃᒻᒪᖃ ᐊᕕᒋᐊᖃᖅᐳᓯᒃ.
• ᓱᖃᑦᑕᖅᑕᐃᓖᑦ ᓯᓐᓇᑎᑦᑎᒐᓱᐊᑐᐃᓐᓇᕐᓗᑎᑦ: ᓯᓐᓇᑎᒃᑯᕕᐅᒃ ᐊᐃᑉᐸᐃᑦ ᐊᔅᓱᒻᒪᕆᒃ ᐃᓗᒃᑯᑦ ᐋᓐᓂᕈᓐᓇᕐᒪᑦ. ᑕᐃᒪᐃᓲᖑᕗᑦ ᐃᓚᖏᑦ ᐊᐅᓚᑦᑎᓂᖅᓴᐅᒐᓱᐊᓕᕋᐃᒻᒪᑕ, ᓱᔾᔪᑕᐅᓕᓲᖑᓪᓗᓂ ᓱᒐᔭᓐᖏᑕᒥᓐᓂᒃ ᕿᒪᑦᑕᐅᒍᒪᓐᖏᓐᓂᑯᒧᑦ. ᐊᓯᐊᓂᑦ ᐱᐅᔅᓴᕐᓗᓂ ᐅᖃᓐᖑᐊᕈᓘᔭᖃᑎᖃᕐᓂᐅᒻᒪᑦ ᐊᒻᒪᓗ ᑕᕝᕙᐅᒋᓪᓗᓂ ᐊᐃᑉᐸᕐᓂᑦ ᐊᐅᓚᑦᑎᓇᓱᐊᕐᓂᖅ ᓇᓗᓇᐃᖅᓯᔾᔪᑕᐅᓪᓗᓂ ᕿᒪᒍᓐᓇᓕᕋᕕᐳᒃ ᐊᓯᐊᓂᑦ ᓇᓂᓯᖔᕈᓐᓇᕐᓗᑎᑦ.
• ᐊᓯᓐᓂᐊᖃᑦᑕᖅᑕᐃᓖᑦ: ᐊᐃᑉᐸᖃᕈᕕᑦ ᐊᐃᑉᐸᕆᑦᑎᐊᑐᐃᓐᓇᕐᓗᒍ ᑖᓐᓇᑐᐊᖅ.

ᐃᓱᒪᒋᖃᑦᑕᐅᑎᑦᑎᐊᖅᑑᓐᓃᖏᓐᓇᕐᕕᔅᓴᐅᓐᖏᒻᒪᑦ ᐊᐃᑉᐸᕇᓪᓗᓂ. ᐱᒻᒪᕆᐳᕗᖅ ᓇᓂᓯᑦᑎᐊᕈᕕᑦ ᐃᓕᓐᓂᑦ ᐱᑦᑎᐊᕋᔭᖅᑐᒥᒃ.