Search
ᓲᖑᓴᖕᓂᖅ
ᐃᓕᒪᔅᓵᕆᖃᑦᑕᕐᓂᖅ ᐊᑲᐅᓐᖏᓕᐅᕈᑎᒻᒪᕆᐳᕗᖅ ᐊᑦᑐᐃᓂᖃᖅᑐᓂ ᑭᒃᑯᓕᒫᓂᑦ - ᓱᕈᓯᕐᓂᑦ, ᒪᒃᑯᑦᑐᓂᑦ, ᐃᓐᓇᕈᕋᑖᓂᒃ ᐊᒻᒪᓗ ᐊᓪᓛᑦ ᐃᓐᓇᕐᓂᑦ. ᐃᓕᒪᔅᓵᕆᕙᑦᑐᑦ ᐊᑐᕈᓐᓇᖅᐳᑦ ᐅᖃᐅᓯᕐᓂᑦ ᑕᐸᓱᑦᑐᑎᒃ, ᐊᑦᑎᖅᓱᐃᓪᓗᑎᒃ ᐅᕝᕙᓘᓐᓃᑦ ᐃᓕᒪᔅᓵᕆᓪᓗᑎᒃ ᐋᓐᓂᖅᓯᓂᐊᕐᓂᕋᕐᓗᑎᒃ ᐊᓯᒥᓐᓂᒃ, ᑭᓯᐊᓂ ᐃᓛᓐᓂᒃᑯᑦ ᐋᓐᓂᖅᓯᕙᑉᐳᑦ ᑎᓪᓗᔅᓯᓪᓗᑎᒃ, ᑐᑭᖅᓯᓪᓗᑎᒃ ᐅᕝᕙᓘᓐᓃᑦ ᐊᔭᔅᓯᓪᓗᑎᒃ. ᐃᓕᒪᔅᓵᕆᓂᖅ ᐃᓱᒪᒋᔭᖃᑦᑎᐊᕐᓂᐅᓐᖏᓚᖅ ᐱᖃᓐᓇᕆᔭᕐᓂᑦ ᐅᕝᕙᓘᓐᓃᑦ ᑭᒃᑯᑐᐃᓐᓇᕐᓂᑦ ᐱᖃᓐᓇᕆᓐᖏᑕᕋᓗᐊᕐᓂᑦ.
ᑭᒃᑯᑐᐃᓐᓇᐃᑦ ᐊᑦᑎᖅᓱᐃᓲᖑᕗᑦ ᓲᕐᓗ ᑯᔭᒐᖅ, ᐱᓐᖑᐊᖅᑎ, ᐱᒻᒪᕆᐅᓱᒋᔪᖅ, ᑭᓇᑐᐃᓐᓈᖅᑐᖅ, ᔪᕆᔪᖅ, ᐊᕐᓇᐅᔭᖅ, ᐊᖑᓐᓂᐊᖅᑎ, ᑕᒪᒃᑯᐊᕈᓘᔭᐃᑦ ᒥᑕᐅᑎᔅᓴᖅᑐᑎᒃ ᐃᓄᓐᓂᒃ ᑯᔭᐃᓐᓇᕈᒪᓱᒋᔭᖏᓐᓂᑦ, ᑯᔭᓐᖏᓗᐊᖅᐸᑦᑐᓂᒃ ᐅᕝᕙᓘᓐᓃᑦ ᐊᖑᑕᐅᖃᑎᒌᑦ ᐊᕐᓇᐅᖃᑎᒌᑦ ᑯᔭᑉᐸᑦᑐᓂᒃ. ᑕᐃᒫᒃ ᐅᖃᐅᔾᔭᐅᖃᑦᑕᖅᑐᓂ ᐋᓐᓂᓇᖅᑐᒻᒪᕆᐳᕗᖅ ᐊᓯᒥᓐᓂᒃ ᐃᓱᒪᒋᔭᖃᑦᑎᐊᕈᑕᐅᒐᓂ.
ᐊᑦᑎᖅᓱᐃᓂᖅ ᐅᖃᐅᓯᒃᑯᑦ ᐋᓐᓂᖅᓱᐃᓂᐅᕗᑦ ᖁᓄᔪᓐᓂᐊᓕᕈᑕᐅᔪᓐᓇᖅᑐᑎᒃ ᐅᕝᕙᓘᓐᓃᑦ ᑎᒥᒧᑦ ᐋᓐᓂᖅᓱᐃᓕᕈᑕᐅᔪᓐᓇᕐᒪᑕ. ᐊᑦᑎᖅᓱᐃᔪᓐᓃᕈᕕᑦ ᐃᑲᔪᕋᔭᖅᐳᑎᑦ ᓄᖅᑲᖅᑎᑦᑎᓗᑎᑦ ᑯᔭᓐᓂᕈᔪᒻᒨᖓᔪᒥᑦ ᐱᓂᕐᓗᓐᓂᕐᒥᑦ.
ᐊᑐᖅᑐᓂ ᐅᖃᐅᓯᕐᓂᑦ ᒪᑯᓂᖓ ᑯᔭᒐᖅ ᐊᖑᓐᓂᐊᖅᑎ ᐊᕐᓇᒧᑦ ᑐᑭᖃᕐᒪᑦ ᑕᐃᓐᓇ ᐊᕐᓇᖅ ᐋᒡᒑᕈᓐᓇᓐᖏᒋᐊᖓ ᑯᔭᓐᓂᕐᒧᑦ. ᑕᒪᓐᓇ ᖁᓄᔪᓐᓂᐊᓕᕈᑕᐅᔪᓐᓇᕐᒪᑦ ᑐᓵᔪᑦ ᐃᓱᒪᒋᔭᖃᑦᑎᐊᕈᓐᓃᕐᓗᑎᒃ ᑕᐃᔅᓱᒥᖓ ᐊᕐᓇᒥᑦ ᐅᕝᕙᓘᓐᓃᑦ ᐋᒡᒑᕋᓗᐊᖅᑎᓪᓗᒍ ᑐᓵᔭᐅᒐᔭᕈᓐᓃᕐᒪᑦ. ᑕᒪᓐᓇ ᓱᓕᓐᖏᓚᓇᖅ. ᐋᒡᒑᖅᐸᑦ ᐱᕕᑦᑐᓂ ᐋᒡᒑᖅᐳᖅ. ᐋᒡᒑᖅᑐᖅ ᐋᒡᒑᖅᐳᖅ, ᖃᓄᑐᐃᓐᓇᖅ ᑕᐃᔭᐅᖃᑦᑕᕋᓗᐊᖅᐸᑦ ᑭᒃᑯᑐᐃᓐᓇᕐᓄᑦ. ᑭᒃᑯᓕᒫᑦ ᐱᓂᕐᓗᑦᑕᐅᒋᐊᖃᓐᖏᒃᑲᓗᐊᕐᒪᑕ.
ᐊᓯᖏᑦ ᐊᕐᓇᐃᑦ ᐊᖏᑐᐃᓐᓇᐅᓂᕋᖅᑕᐅᕗᑦ ᐅᕝᕙᓘᓐᓃᑦ ᐅᐃᕆᓴᖅᑏᑦ ᐊᖑᑎᓂᑦ. ᑕᒪᒃᑯᓂᖓ ᐅᖃᐅᓯᕐᓂᑦ ᐊᑐᖃᑦᑕᕐᓂᖅ ᓴᖅᑮᕗᖅ ᐃᓱᒪᒋᔭᖃᑦᑎᐊᓐᖏᓐᓂᕐᒥᒃ ᐃᓱᒪᓕᐊᕋᓗᐊᖏᓐᓂᑦ ᐊᒻᒪᓗ ᓂᕈᐊᖅᑕᖏᓐᓂᑦ ᑯᔭᒍᒪᒐᓂ. ᖃᓄᐃᓐᖏᑦᑎᐊᖅᐳᖅ ᖃᖓᑐᐃᓐᓇᖅ ᐋᒡᒑᕋᓗᐊᕐᓗᓂ ᑐᑎᒍᒪᔪᒧᑦ.
ᐊᖑᑎᖔᖅ ᐊᑦᑎᖅᓱᐃᖃᑦᑕᖅᐸᑦ ᐱᖃᓐᓇᕆᔭᒥᓄᑦ ᖁᕝᕙᓂᖅᓴᐅᒋᔭᐅᕗᖅ ᐱᒃᑯᒋᔭᐅᓪᓗᓂ ᐊᐅᓚᑦᑎᔪᓐᓇᖅᑐᓂᓗ ᐊᐃᑉᐸᕐᒥᓂᒃ. ᑕᒪᓐᓇ ᐊᑦᑎᖅᓱᐃᓂᖅ ᖃᓄᐃᑦᑑᔮᓐᖏᑦᑑᒐᓗᐊᖅᐸᑦ ᐱᓐᖏᔭᐃᒋᐊᖓ ᐅᕝᕙᓘᓐᓃᑦ ᐊᓯᒥᓐᓂᑦ ᐱᑲᒻᒪᒋᐊᖓ. ᐅᖃᐅᓯᖃᕈᓐᓇᖅᐳᖅ ᐱᒃᑲᐅᓂᕋᕐᓗᓂ ᐊᒥᓱᓂᑦ ᐊᐃᑉᐸᖃᖅᓯᒪᓂᕋᕐᓗᓂ ᐊᒻᒪ ᖃᓄᐃᖃᑦᑕᖅᓯᒪᓂᖏᓐᓂᑦ. ᑕᒪᓐᓇ ᐃᓕᖅᑯᓯᖅ ᓴᖅᑮᕗᖅ ᐊᓯᒥᓐᓂᒃ ᐃᓱᒪᒋᔭᖃᑦᑎᐊᓐᖏᓐᓂᕐᒥᒃ.
ᑕᐃᒫᔅᓴᐃᓐᓇᐅᕗᖅ, ᐃᓛᓐᓂᒃᑯᑦ ᐱᐅᓐᖏᓂᖅᓴᐅᕗᖅ ᑭᓇᑐᐃᓐᓇᖅ ᐊᑦᑎᖅᓱᐃᑉᐸᑦ
ᐊᕐᓇᐅᔭᖅ ᐅᕝᕙᓘᓐᓃᑦ ᐊᖑᑕᐅᔭᖅ. ᑕᒪᒃᑯᐊ ᐋᓐᓂᓇᖅᑐᒻᒪᕆᐅᕗᑦ ᐊᑦᑎᖅᓱᐃᔾᔪᑏᑦ. ᑭᒃᑯᓕᒫᑦ ᐃᓱᒪᒋᔭᐅᑦᑎᐊᕆᐊᖃᕐᒪᑕ ᐸᕝᕕᑕᐅᓐᖏᓪᓗᑎᒃ ᖃᓄᑐᐃᓐᓇᖅ ᐊᐃᑉᐸᖃᕋᓗᐊᖅᐸᑕ ᐊᖑᑕᐅᖃᑎᒥᓂᒃ ᐊᕐᓇᐅᖃᑎᒥᓂᓪᓘᓐᓃᑦ. ᐊᒻᒪ ᐃᓛᓐᓂᒃᑯᑦ ᐅᖃᐅᓯᑐᐃᓐᓇᐅᓚᐅᕋᓗᐊᖅᑐᑎᒃ ᑎᒥᒃᑯᑦ ᐋᓐᓂᖅᑎᕆᔾᔪᑕᐅᓕᓲᖑᕗᑦ ᐊᑦᑎᖅᓱᐃᓂᖏᓐᓄᑦ.
ᐃᓕᒪᔅᓵᕆᖃᑦᑕᕐᓂᖅ ᖃᓄᑐᐃᓐᓇᐅᒍᓐᓇᖅᐳᖅ, ᐃᑦᑎᒎᕐᓂᓕᕆᔪᑦ ᑕᒪᔾᔭᑑᓐᖏᓚᑦ. ᓴᖅᑮᔪᓐᓇᖅᐳᑎᑦ ᐊᓯᓐᓂᒃ ᐃᓱᒪᒋᔭᖃᑦᑎᐊᕐᓂᕐᒥᒃ ᐅᑯᐊ ᐊᑐᕐᓗᒋᑦ:
- ᐊᑦᑎᖅᓱᐃᖃᑦᑕᖏᓪᓗᑎᑦ, ᐅᖃᓐᖑᐊᑐᐃᓐᓇᕋᓗᐊᕈᕕᑦ
- ᐅᖃᐅᔾᔨᖃᑦᑕᕐᓗᑎᑦ ᐊᑲᐅᔅᓴᓐᖏᓐᓂᕋᕐᓗᑎᑦ ᑕᐃᒫᒃ ᐅᖃᐅᓯᖃᖅᑎᓪᓗᒋᑦ ᐃᕝᕕᑦ ᓵᖓᓂ
- ᐃᑲᔪᖃᑦᑕᕐᓂᖅ ᐊᑦᑎᖅᓱᖅᑕᐅᔪᒥᒃ ᑕᒪᒃᑯᓂᖓ ᐅᖃᐅᓯᖃᖅᑐᓂᒃ, ᐅᕝᕙᓘᓐᓃᑦ ᐊᓯᖏᓐᓂᑦ ᐋᓐᓂᓇᖅᑐᓂᒃ ᐊᑦᑎᖅᓱᐃᓂᐅᔪᓂᒃ
- ᓇᓗᓇᐃᖅᓯᓂᖅ ᑕᐃᒫᒃ ᐅᖃᖅᐸᑦᑐᓄᑦ ᑕᒪᓐᓇ ᓴᖅᑮᔪᓐᓇᕐᒪᑦ ᖁᓄᔪᓐᓂᐊᕐᓂᕐᒥᒃ
ᐱᐅᒐᔭᕆᕗᖅ ᐅᖃᖃᑎᖃᕈᓐᓇᕈᕕᑦ ᐅᑉᐱᕆᑦᑎᐊᖅᑕᕐᓂᑦ ᐃᑲᔪᕈᓐᓇᖅᑐᒥᑦ ᐅᕝᕙᓘᓐᓃᑦ ᐅᖃᐅᔾᔨᒋᐊᕈᓐᓇᖅᑐᒥᒃ. ᑭᓇᑐᐃᓐᓇᖅ ᐋᓐᓂᖅᑕᐅᒍᓂ ᑎᒥᒥᒍᑦ ᐅᕝᕙᓘᓐᓃᑦ ᖁᓄᔪᓐᓂᖃᖅᑕᐅᒍᓂ ᐃᓕᒪᓵᖅᑕᐅᓗᓂ, ᑕᐃᓐᓇ ᐱᓂᕐᓗᑦᑐᖅ ᐃᖅᑲᖅᑐᕋᔅᓴᕈᕈᓐᓇᖅᐳᖅ.