ᐃᓅᖃᑎᒋᕙᒃᑕᓕᒫᑎᑦ - ᐱᖃᓐᓇᕆᔭᑎᑦ, ᐃᓚᑎᑦ, ᓄᓕᐊᖃᑎᒋᕙᒃᑕᑎᑦ ᐊᓯᓕᒫᖏᓪᓗ ᐃᓅᖃᑎᒋᕙᒃᑕᑎᑦ - ᐃᒃᐱᒍᓱᑦᑎᐊᕐᓂᕐᒥᒃ ᑐᙵᕕᖃᕆᐊᖃᖅᐳᑦ. ᑕᒪᓐᓇ ᐃᒪᓐᓇ ᑐᑭᖃᖅᐳᖅ ᐃᓄᖕᓂᒃ ᐃᒃᐱᒋᔭᐅᑦᑎᐊᕐᓗᑎᑦ ᐃᒡᕕᓪᓗ ᐃᒃᐱᒋᑦᑎᐊᕐᒥᓗᒋᑦ. ᐃᒃᐱᒍᓱᑦᑎᐊᕐᓂᖅ ᑐᑭᖃᖅᐳᖅ ᐃᓄᖕᓂᒃ ᐱᑦᑎᐊᖃᑦᑕᕐᓗᓂ ᐊᒻᒪ ᖃᐅᔨᑎᑉᐸᒡᓗᒋᑦ ᐱᒻᒪᕆᐅᓂᖏᓐᓂᒃ. ᐃᓅᖃᑎᒌᑦᑎᐊᕐᓂᖅ ᐃᒃᐱᒍᓱᑦᑎᐊᕐᓂᕐᒥᒃ ᑐᙵᕕᖃᖅᐳᖅ ᐊᒻᒪ ᐅᒃᐱᕆᔭᖃᑦᑎᐊᕐᓂᕐᒥᒃ, ᐃᑲᔪᖅᑎᒌᖕᓂᕐᒥᒃ, ᐱᖃᓐᓇᕇᖕᓂᕐᒥᒃ, ᓇᒡᓕᒍᓱᖕᓂᕐᒥᒃ ᐊᒻᒪ ᖃᓂᒌᖕᓂᕐᒥᒃ.

ᐃᓱᒪᒃᓴᖅᓯᐅᕈᑎᖃᑦᑎᐊᕆᐊᖃᖅᐳᑎᑦ ᐱᖃᑎᒋᕙᒃᑕᕐᓄᑦ ᐃᒃᐱᒋᔭᐅᑦᑎᐊᕋᓗᐊᕐᒪᖔᖅᐱᑦ. ᐃᒪᓐᓇᑐᐃᓐᓇᐅᙱᑦᑐᖅ “ᐅᓪᓛᒃᑯᑦ ᐃᒃᐱᒋᑦᑎᐊᕐᓂᐊᖅᐱᙶ?” “ᐋᖅᑭᒃᑕᒃᑲ ᐃᒃᐱᒋᑦᑎᐊᕐᓂᐊᖅᐱᒌᑦ ᐊᒻᒪ ᓯᕗᓂᕆᓂᐊᖅᑕᑦᑎᓐᓂ ᐃᒃᐱᒋᑦᑎᐊᖃᑦᑕᓛᖅᐱᒌᑦ? ᐅᒃᐱᕆᑦᑎᐊᕈᓐᓇᖅᐸᒌᑦ ᐊᖏᕈᑎᒋᓚᐅᖅᑕᕐᓂᒃ ᐊᑐᕐᓂᐊᕐᓂᕋᖅᖢᑎᑦ?”

ᐱᖃᑎᖃᕆᐊᖃᖅᐳᑎᑦ ᐅᖃᐅᓯᕆᔭᕐᓂᒃ ᐊᒻᒪ ᐃᒃᐱᒋᔭᕐᓂᒃ ᐃᒃᐱᒍᓱᑦᑎᐊᖏᓐᓇᐅᔭᕐᓂᐊᖅᑐᒥᒃ. ᐃᒪᓐᓇ ᑐᑭᖃᙱᑦᑐᖅ ᐱᖃᑎᒋᔭᐃᑦ ᐊᖏᖃᑎᒌᓐᓇᐅᔮᓗᒡᓗᒍ, ᐃᒪᓐᓇᓕ ᑐᑭᖃᖅᐳᖅ ᐱᖃᑎᒋᔭᐃᓪᓗ ᐊᖏᖃᑎᒌᙱᒃᑯᔅᓯ, ᐱᖃᑎᑐᐊᖓ ᓈᒻᒪᒋᔭᕐᒥᓂᒃ ᐱᔪᑐᐊᖑᖃᑦᑕᔾᔮᙱᑉᐳᖅ.

ᖃᓄᑐᐃᓐᓇᖅ ᓄᓕᐊᕐᓂᖅ ᐱᔾᔪᑕᐅᓕᕌᖓᑦ – ᖃᓂᒃᑯᑦ ᓄᓕᐊᕐᓂᖅ, ᑯᔭᖕᓂᖅ, ᐅᕝᕙᓘᓐᓃᑦ ᑲᓴᓗᒃᑕᐅᓂᖅ - ᖃᐅᔨᒪᙱᑕᕐᓄᑦ, ᐃᓕᖕᓂᒃ ᐃᒃᐱᒍᓱᙱᑦᑐᒥᒃ ᐅᕝᕙᓘᓐᓃᑦ ᐃᓕᖕᓂᒃ ᑲᒪᒋᔭᖃᖅᐸᙱᑦᑐᒥᒃ, ᖁᕕᐊᓱᒍᓐᓃᑐᐃᓐᓇᕆᐊᖃᖅᐳᑎᑦ, ᐱᐅᒋᔪᓐᓃᕐᓗᑎᑦ, ᐋᓐᓂᕐᓗᑎᑦ, ᐊᑐᖅᑕᐅᑐᐃᓐᓇᖅᑰᔨᓗᑎᑦ ᐱᓂᕐᓗᒃᑕᐅᖅᑰᔨᓗᑎᓪᓘᓐᓃᑦ. ᐃᒃᐱᒋᔭᐅᑦᑎᐊᕈᕕᑦ ᑕᐃᒪ ᐃᓕᖕᓂᒃ ᐃᒃᐱᒍᓱᑦᑎᐊᕐᓂᐊᖅᐳᖅ ᐋᖅᑭᒃᑕᑎᓪᓗ ᐃᒃᐱᒋᑦᑎᐊᕐᓗᓂᒋᑦ. “ᐄ ᑐᑭᖃᖅᐳᖅ ᐊᖏᕐᓂᖅ” ᐊᒻᒪ “ᐋᒃᑲ ᑐᑭᖃᖅᐳᖅ ᐋᑳᕐᓂᖅ!”  

ᐃᓅᖃᑎᒌᑦᑎᐊᖅᑐᑦ ᐃᓱᒪᓕᐅᕈᓐᓇᕐᓂᖃᖅᐳᑦ ᑎᒥᕕᑦ ᖃᓄᐃᓕᐅᕈᓐᓇᕐᓂᖓᓂ ᐃᓱᒪᓕᐅᕈᑎᒋᔭᑎᓪᓗ ᐃᒃᐱᒋᔭᐅᑦᑎᐊᕆᐊᖃᖅᖢᑎᒃ. ᓄᓕᐊᖁᔭᐅᓗᑎᑦ ᑎᓕᐅᖅᑕᐅᔭᕆᐊᖃᙱᑉᐳᑎᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ ᓄᓕᐊᕐᓂᓕᕆᖁᔭᐅᓗᑎᑦ. ᑎᓕᐅᖅᑕᐅᓗᑎᑦ ᓄᓕᐊᖁᔭᐅᒍᕕᑦ ᖃᓄᑐᐃᓐᓇᕐᓘᓐᓃᑦ ᓄᓕᐊᕐᓂᓕᕆᖁᔭᐅᒍᕕᑦ, ᖁᓄᔪᕐᓂᐊᕐᓂᐅᓂᕋᖅᑕᐅᓇᔭᖅᐳᖅ - ᐱᕋᔭᖕᓂᐅᓪᓗᓂᓗ - ᐊᐃᑉᐸᕐᓄᑦ ᐱᖃᑎᖕᓄᓪᓘᓐᓃᑦ ᑕᐃᒪᐃᓕᐅᖅᑕᐅᒐᓗᐊᕈᕕᑦ. ᖁᓄᔪᕐᓂᐊᖅᑕᐅᓐᓂᕈᕕᑦ, ᐃᑲᔪᖅᑕᐅᔪᓐᓇᖅᐳᑎᑦ ᑐᑭᓯᒋᐊᕐᕕᒃᓴᖅᑕᖃᒃᑲᓐᓂᖅᖢᓂᓗ ᑕᕝᕙᓂ ᐃᑭᐊᖅᑭᕕᐅᑉ ᐃᓚᖓᓂ ᑕᐃᔭᐅᔪᒥᒃ ᓄᓕᐊᕈᒪᙱᓐᓂᖅ. ᓈᒻᒪᒋᔭᕐᓂᒃ ᐋᖅᑭᒃᓯᔪᓐᓇᕋᔭᖅᐳᑎᑦ - ᐊᓯᕕᐅᙱᑦᑐᖅ.  

ᐃᓅᖃᑎᖃᕐᓂᕆᕙᒃᑕᐃᑦ ᑭᓇᐅᓂᕐᓄᑦ ᐱᒻᒪᕆᐅᓂᖅᐹᖑᖃᑕᐅᕗᖅ – ᐃᓚᐃᓐᓇᖓᐅᙱᑦᑐᖅ. ᐱᖃᑎᒋᔭᕐᓄᑦ, ᐱᖃᓐᓇᕆᔭᕐᓄᑦ ᐃᓚᖕᓄᓪᓗ ᐱᐅᒋᔭᐅᔭᕆᐊᖃᖅᐳᑎᑦ, ᐃᒃᐱᒋᔭᐅᑦᑎᐊᕐᓗᑎᑦ ᓇᒡᓕᒋᔭᐅᓗᑎᓪᓗ. ᐋᓐᓂᖅᑕᐅᓗᑎᑦ ᓈᒻᒪᙱᑉᐳᖅ - ᑎᒥᒃᑰᒐᓗᐊᖅᐸᑦ, ᖁᓄᔪᕐᓂᐊᕐᓂᐅᒐᓗᐊᖅᐸᑦ, ᐅᖃᐅᓯᒃᑰᒐᓗᐊᖅᐸᑦ ᐃᓱᒪᒃᑯᓪᓘᓐᓃᑦ. ᐋᓐᓂᖅᓯᔪᕐᓘᓐᓃᑦ ᐅᖃᕋᓗᐊᖅᐸᑦ ᓂᙵᑳᓪᓚᖅᑲᐅᓂᕋᕐᓗᓂ, ᐋᓐᓂᖅᓯᕆᓂᖅ ᓈᒻᒪᒍᓐᓇᙱᑦᑐᖅ. ᐃᓅᖃᑎᖕᓄᑦ ᐱᖃᑎᖕᓄᓪᓘᓐᓃᑦ ᑕᐃᒪᐃᓕᐅᖅᑕᐅᖃᑦᑕᕈᕕᑦ, ᐃᑲᔪᖅᑎᒃᓴᖅᓯᐅᕆᐊᖃᖅᐳᑎᑦ. ᐃᓄᖕᒧᑦ ᐅᒃᐱᕆᔪᓐᓇᖅᑕᕐᓄᑦ ᐅᖃᕆᐊᖃᖅᐳᑎᑦ ᐃᑲᔪᖅᑕᐅᔪᒪᓗᑎᑦ.

ᐃᓅᖃᑎᒌᑦᑎᐊᕐᓂᖅ ᐱᖃᓐᓇᕆᔭᖃᑦᑎᐊᕐᓂᕐᓗ ᐃᒃᐱᒋᖃᑎᒌᑦᑎᐊᖏᓐᓇᐅᔭᖅᐳᑦ. ᑕᐃᒪᐃᑕᐅᔭᕆᐊᖃᖅᐳᑎᑦ. ᐃᓄᑦᑎᐊᕙᐅᒐᕕᑦ. ᐃᒃᐱᒋᔭᐅᑦᑎᐊᕈᒪᓗᑎᑦ ᐅᖃᖃᑦᑕᕆᑦ!