Search
ᓇᔾᔨᔪᖓ
ᑭᓇᒥᑦ ᐅᖃᖃᑎᖃᕈᓐᓇᖅᐱᑦ
ᓇᔾᔨᓇᓱᐊᕐᓇᑎᑦ ᓇᔾᔨᒍᕕᑦ ᐅᖃᖃᑎᒋᔪᓐᓇᖅᐸᐃᑦ ᐊᐃᑉᐸᐃᑦ ᐊᓯᓐᓄᓪᓗ ᐃᓕᓐᓄᑦ ᐱᒻᒪᕆᐅᔪᓄᑦ, ᓲᕐᓗ ᐊᓈᓇᒃᑯᓯᓐᓄᑦ. ᓇᔾᔨᓇᓱᐊᓐᖏᑦᑐᑦ ᐊᑦᑐᖅᑕᐅᓂᖅᓴᐅᓂᐅᓴᒻᒪᑕ ᑕᐃᒃᑯᓂᖓ ᓇᔾᔨᓇᓱᐊᖅᑐᒥᓂᕐᓂᑦ. ᑐᑭᓯᒋᐊᒃᑲᓐᓂᕈᓐᓇᖅᐳᑎᑦ ᐋᓐᓂᐊᖅᑐᓕᕆᔨᐅᔪᓂᒃ - ᓘᑦᑖᒥᑦ, ᐋᓐᓂᐊᓯᐅᖅᑎᒥᑦ ᐅᕝᕙᓘᓐᓃᑦ ᐃᕐᓂᓱᔅᓰᔨᒥᑦ. ᑕᐃᒃᑯᐊᓗ ᐅᖃᖃᑎᒋᔪᓐᓇᕆᕙᑎᑦ ᐃᑲᔪᖅᑕᐅᔪᒪᓕᕋᐃᒐᕕᑦ ᓂᓪᓕᐊᕕᒋᕙᑦᑕᑎᑦ - ᐃᓐᓇᑐᖃᐃᑦ, ᐃᓚᓐᓇᕆᔭᑎᑦ, ᐃᑲᔪᖅᑏᑦ, ᐊᔪᕆᖅᓱᐃᔨᒥᓪᓘᓐᓃᑦ. ᐃᓱᒪᔅᓴᖅᓯᐅᕋᕕᑦ ᓱᓂᐊᕐᒪᖔᖅᐱᑦ ᐃᓱᒪᒋᒋᑦ ᓇᒻᒥᓂᖅ ᑲᒪᒋᑦᑎᐊᕋᓱᐊᕐᓂᕐᒥᑦ - ᓲᕐᓗ ᐃᓱᒪᓕᐅᑦᑕᐅᑎᒋᓐᖏᓪᓗᑎᑦ ᐃᓱᒪᔅᓴᖅᓯᐅᑦᑎᐊᖅᑳᖔᕐᓗᑎᑦ.
ᐃᓱᒪᓕᐅᕆᐊᖃᕐᓂᐊᕋᕕᑦ ᐱᒻᒪᕆᐅᔪᓂᑦ ᒫᓐᓇᒫᖅ. ᐱᓯᒪᓂᐊᖅᐱᐅᒃ ᓄᑕᕋᖅ ᐱᕈᖅᓴᓗᒍᓗ, ᑎᒍᐊᖑᓂᐊᖅᐸᑦ ᐅᕝᕙᓘᓐᓃᑦ ᐲᖅᑕᐅᑎᑕᐅᓂᐊᖅᐸ ᐋᓐᓂᐊᕕᒻᒥ ᓇᔾᔨᐊᑦ?
ᐊᕐᓇᖅ ᓇᔾᔨᓕᖅᐸᑦ ᐊᒥᓲᕗᑦ ᖃᓄᑐᐃᓐᓇᖅ ᐃᑲᔪᕈᓐᓇᖅᑐᑦ, ᐊᐃᑉᐸᐃᑦ, ᐱᖃᓐᓇᕆᔭᑎᑦ ᐊᒻᒪᓗ ᐃᓚᑎᑦ ᐃᑲᔪᖅᓱᕈᓐᓇᕐᒪᑕ. ᐱᒻᒪᕆᐅᓂᖅᐹᖑᕗᖅ ᑐᓵᔭᐅᑉᐸᑦ ᓇᔾᔨᔪᖅ ᑐᑭᓯᐊᔭᐅᑦᑎᐊᕐᓗᓂ ᓱᒍᒪᒻᒪᖔᖅ - ᐃᓄᑑᑲᐃᓐᓇᕈᒪᑐᐃᓐᓇᕆᐊᖃᖅᐳᖅ ᐃᓱᒪᔅᓴᖅᓯᐅᕐᓂᖓᓂ ᓇᒻᒥᓂᖅ ᐅᕝᕙᓘᓐᓃᑦ ᐃᑲᔪᖅᓱᖅᑕᐅᔪᒪᑐᐃᓐᓇᕆᐊᖃᖅᐳᖅ ᐃᓄᑑᔾᔨᖏᓪᓗᓂ ᐃᓚᖃᕐᓗᓂ ᐱᒻᒪᕆᐅᒋᔭᒥᓂᒃ.
- ᓈᓚᓪᓗᒍ ᐅᖃᓪᓚᑎᓪᓗᒍ ᖃᓄᖅ ᐃᑉᐱᓐᓂᐊᒻᒪᖔᖅ ᐊᒻᒪᓗ ᖃᓄᖅ ᐊᐃᑉᐸᖓ ᐃᑉᐱᓐᓂᐊᒻᒪᖔᖅ
- ᐃᓚᐅᖃᑎᒋᖃᑦᑕᕈᒪᓗᒍ ᖃᐅᔨᓴᖅᑕᐅᔭᖅᑐᓕᕋᐃᑉᐸᑦ
- ᐃᑲᔪᖅᓱᑦᑎᐊᕐᓗᒍ ᖃᓄᖅ ᐃᓱᒪᓕᐅᕐᓂᖓ
- ᐃᑲᔪᖅᑕᐅᔪᒪᒍᕕᓪᓗ ᓇᒻᒥᓂᖅ ᐃᑲᔪᖅᑕᐃᑎᓪᓗᑎᑦ
- ᕿᓂᕐᓗᑎᑦ ᑐᑭᓯᒋᐊᒃᑲᓐᓂᕈᑎᔅᓴᓂᒃ ᓇᔾᔨᓂᐅᑉ ᒥᔅᓵᓄᑦ ᐊᒻᒪᓗ ᖃᓄᐃᓕᖓᔪᒪᓂᐊᕐᒪᖔᖅ ᐃᓱᒪᔅᓴᖅᓯᐅᕐᓗᓂ
- ᐃᑉᐱᒋᑦᑎᐊᕐᓗᒋᑦ ᐃᓱᒪᒋᔭᖏᑦ ᐊᒻᒪᓗ ᐃᑉᐱᓐᓂᐊᒋᔭᖏᑦ
ᓂᕈᐊᕋᔅᓴᐃᑦ
ᓂᕈᐊᕆᐊᖃᕐᓂᐊᖅᐳᑎᑦ ᑭᓱᑦ ᐃᓕᓐᓄᑦ ᐱᐅᓂᖅᐹᖑᒻᒪᖔᑕ ᓇᔾᔨᓕᕋᑖᖅᑎᓪᓗᑎᑦ. ᑕᒪᒃᑯᐊ ᓂᕈᐊᒐᖅᑎᑦ ᐃᒻᒥᒎᖓᑦᑎᐊᖅᐳᑦ ᐊᕐᓇᐅᑉ ᐱᔪᓐᓇᐅᑎᒋᓪᓗᓂᒋᑦ ᐃᓱᒪᔅᓴᖅᓯᐅᑦᑎᐊᕐᓃᑦ ᐊᒻᒪᓗ ᐃᖅᑲᖅᑐᐃᕕᒃᑯᑎᒎᕈᑕᐅᔪᓐᓇᖅᑐᑦ ᓂᕈᐊᕋᔅᓴᐃᑦ ᐱᐅᓂᖅᐹᒃᑰᖅᑐᒋᔭᖏᑦ.
ᓇᔾᔨᒍᕕᑦ ᐱᖓᓱᓂᑦ ᐃᖅᑲᖅᑐᐃᕕᒃᑯᑎᒍᑦ ᐱᔪᓐᓇᐅᑎᒃᑯᑦ ᓂᕈᐊᒐᖃᕈᓐᓇᖅᐳᑎᑦ ᐃᓱᒪᔅᓴᖅᓯᐅᕈᑎᒋᓗᒋᑦ - ᐊᓈᓇᕈᕈᒪᒍᕕᑦ, ᑎᒍᐊᖅᑎᑦᑎᒍᒪᒍᕕᑦ ᐅᕝᕙᓘᓐᓃᑦ ᓇᔾᔨᐊᖏᖅᑕᐅᔪᒪᒍᕕᑦ. ᐊᒥᓲᕗᑦ ᐊᑐᖅᑕᐅᔪᓐᓇᖅᑐᑦ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᔅᓴᐃᑦ. ᐱᖓᓱᑦ ᐊᑖᓂ ᑐᕌᕈᑏᑦ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᔅᓴᐅᕗᑦ ᑕᒪᑐᒪ ᒥᔅᓵᓄᑦ ᐊᑐᐃᓐᓇᐅᑎᑕᐅᔪᑦ ᑲᓇᑕᒥ ᑎᒥᒃᑯᑦ ᖃᓄᐃᓐᖏᑦᑎᐊᖅᑐᓕᕆᔨᒃᑯᑦ ᐊᐃᑉᐸᕇᓄᑦ.
ᓇᔾᔨᑦᑎᐊᕐᓂᖅ ᐅᓗᕆᐊᓇᓐᖏᑦᑐᒥᑦ
ᑕᒪᒃᑮᒃ ᐃᕝᕕᑦ ᓄᑕᕋᐃᓪᓗ ᖃᓄᐃᓐᖏᑦᑎᐊᕐᓂᖅᓴᐅᒐᔭᖅᐳᓯᒃ ᐃᓱᒪᔅᓴᖅᓯᐅᖅᑳᕈᕕᑦ ᓇᔾᔨᓕᕋᑖᖅᑎᓪᓗᑎᑦ ᓱᓂᐊᕐᒪᖔᖅᐱᑦ, ᑭᓱᓂᒃ ᓂᕆᖃᑦᑕᕐᓂᐊᕐᒪᖔᖅᐱᑦ ᑭᓱᓂᓪᓗ ᓂᕆᖃᑦᑕᕐᓂᐊᓐᖏᒻᒪᖔᖅᐱᑦ - ᓲᕐᓗ ᐃᒥᐊᓗᖃᑦᑕᖏᓪᓗᑎᑦ, ᓯᒡᒐᓕᐊᖅᑐᖃᑦᑕᖏᓪᓗᑦ ᐅᕝᕙᓘᓐᓃᑦ ᐋᓐᖓᔮᕐᓇᖅᑐᖅᑐᖃᑦᑕᖏᓪᓗᑎᑦ.
ᖃᓄᐃᓐᖏᑦᑎᐊᕐᓗᑎᑦ ᓇᔾᔨᒍᕕᑦ ᐱᒻᒪᕆᐊᓘᕗᖅ ᐊᒻᒪᓗ ᐊᒥᓲᓪᓗᑎᒃ ᖃᐅᔨᒪᒋᐊᓕᑦᑎᑦ. ᐅᖃᖃᑎᖃᕈᓐᓇᖅᐳᑎᑦ ᐅᑉᐱᕆᑦᑎᐊᖅᑕᕐᓂᑦ ᐃᓚᓐᓇᕆᔭᓐᓂᑦ ᐊᒻᒪᓗ ᐋᓐᓂᐊᓯᐅᖅᑎᒥᑦ ᓘᑦᑖᒥᓪᓘᓐᓃᑦ. ᐅᖃᓕᒫᕈᓐᓇᕆᕗᑎᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᓂᒃ.