Search
ᓇᔾᔨᔪᖔ?
ᑯᔭᖃᑦᑕᕈᕕᑦ ᐊᒻᒪᓗ ᐊᐅᓈᕐᓃᑦ ᑭᖑᕙᖅᐸᑦ 5-7 ᐅᓪᓗᓂᒃ ᓇᔾᔨᓱᒋᓕᕋᔭᖅᐳᑎᑦ ᐊᒥᓱᑦ ᑕᐃᒪᐃᓲᖑᒻᒪᑕ. ᖃᐅᔨᓴᕋᐃᒍᑎᐅᒃᑲᔪᑉᐳᑦ ᓇᔾᔨᒍᕕᑦ ᐃᕕᐊᖐᒃᑭᒃ ᒪᐃᓕᕐᓗᑎᒃ, ᒧᓕᕕᑦ ᐊᒥᐊᖏᒃ ᕿᕐᓂᖅᓯᓂᖅᓴᐅᓗᑎᒃ, ᑕᖃᓴᕋᐃᓕᕐᓗᑎᑦ, ᕿᓄᓐᖓᔅᓴᕋᐃᓕᕐᓗᑎᑦ, ᐅᕝᕙᓘᓐᓃᑦ ᐸᕝᕕᓴᕋᐃᓕᕐᓗᑎᑦ, ᒥᕆᐊᓐᖑᖃᑦᑕᓕᕐᓗᑎᑦ ᐊᒻᒪᓗ-ᐅᕝᕙᓘᓐᓃᑦ ᐅᓪᓛᒃᑯᑦ ᒥᕆᐊᓐᖑᖃᑦᑕᓕᕐᓗᑎᑦ, ᐃᔾᔭᓐᖑᓗᑎᑦ ᐅᕝᕙᓘᓐᓃᑦ ᖃᐅᔨᒪᓐᖏᖃᑦᑕᕐᓗᑎᑦ, ᐳᓪᓚᔅᓯᒪᖃᑦᑕᕐᓗᑎᑦ ᓈᒃᑯᑦ ᐊᒻᒪᓗ-ᐅᕝᕙᓘᓐᓃᑦ ᖁᐃᑦᑎᓪᓗᑎᑦ, ᓂᕿᓂᒃ ᑲᔾᔮᖃᑦᑕᕐᓗᑎᑦ, ᓰᕈᓗᖃᑦᑕᕐᓗᑎᑦ ᐊᒻᒪᓗ-ᐅᕝᕙᓘᓐᓃᑦ ᑕᑦᑐᐃᖃᑦᑕᕐᓗᑎᑦ, ᕿᑎᕐᓗᓪᓗᑎᑦ, ᓇᐃᒪᑲᒻᒪᓪᓗᑎᑦ, ᐊᒻᒪᓗ-ᐅᕝᕙᓘᓐᓃᑦ ᖁᐃᓱᐃᓐᓇᓕᕐᓗᑎᑦ.
ᑭᓯᐊᓂ ᐱᒻᒪᕆᐅᕗᖅ ᐅᖃᕆᐊᖓ ᑕᒪᒃᑯᐊ ᓇᔾᔨᓪᓗᓂ ᐊᑐᖅᑕᐃᓐᓇᐅᕙᓐᖏᒻᒪᑕ ᐊᔾᔨᒌᓐᖏᑦᑐᓂᒃ ᐱᖅᑯᓯᖃᖅᐸᑦᑐᑎᒃ ᐊᕐᓇᐃᑦ ᓇᔾᔨᔪᑦ ᐊᔾᔨᒌᑦᑕᖃᕋᑎᒃ.
ᓇᔾᔨᑐᐃᓐᓇᕆᐊᖃᕈᕕᑦ ᐱᒻᒪᕆᐅᕗᖅ ᐃᒥᖃᑦᑕᖏᒃᑯᕕᑦ ᐃᒥᐊᓗᒻᒥᑦ ᖃᐅᔨᓪᓚᕆᒐᓱᐊᕐᓂᓐᓂᑦ - ᑕᒪᓐᓇ ᓴᖅᑮᕗᖅ ᐃᓱᒪᒋᔭᖃᑦᑎᐊᕐᓂᕐᒥᒃ ᓇᔾᔨᐊᓐᓂᒃ ᓇᔾᔨᑲᓪᓚᓐᓂᕈᕕᑦ. ᑕᒪᓐᓇ ᓴᐳᑎᔾᔪᑕᐅᔪᓐᓇᖅᐳᖅ ᓇᔾᔨᐊᓐᓄᑦ ᐱᕈᖅᐸᓪᓕᐊᑦᑎᐊᕐᓂᐊᖁᓪᓗᒍ.
ᐊᖏᕐᕋᒥᑦ ᖃᐅᔨᓴᐅᑎᓂᒃ ᐱᑕᖃᖅᐳᖅ ᓇᔾᔨᒻᒪᖔᖅᐱᑦ ᓇᔾᔨᓱᒋᒍᕕᑦ. ᐊᖏᕐᕋᕐᒥᑦ ᖃᐅᔨᓴᐅᑎᓂᒃ ᓇᔾᔨᒻᒪᖔᖅᐱᑦ ᐱᑕᖃᖅᐳᖅ ᓂᐅᕕᕐᕕᓐᓂᑦ ᓂᐅᕕᐊᔅᓴᐅᓪᓗᑎᒃ ᐄᔭᒐᖅᑖᕐᕕᓐᓂᑦ ᐃᓚᖏᓐᓂᓪᓗ ᓂᐅᕕᕐᕕᓐᓂᑦ ᐊᑐᑦᑎᐊᖅᑐᒋᑦ ᖃᐅᔨᓴᖅᓴᕋᐃᓗᐊᓐᖏᓪᓗᓂ ᓇᓗᓇᐃᖅᓯᔾᔪᑕᐅᑦᑎᐊᕈᓐᓇᖅᐳᑦ.
ᐃᖅᑲᐅᒪᒋᐊᖃᖅᐳᑎᑦ ᑐᑭᓯᑦᑎᐊᕈᓐᓇᕋᕕᑦ ᑭᓯᐊᓂ ᐅᖃᖃᑎᖃᓚᐅᕐᓗᑎᑦ ᓘᑦᑖᒥᑦ ᐅᕝᕙᓘᓐᓃᑦ ᐋᓐᓂᐊᓯᐅᖅᑎᒥᒃ. ᐋᓐᓂᐊᕕᒻᒥ ᓄᓇᓕᔅᓯᓐᓂᑦ ᖃᐅᔨᓴᖅᑕᐅᔪᓐᓇᖅᐳᑎᑦ. ᓇᔾᔨᒍᕕᑦ ᓘᑦᑖᒥᒃ ᐋᓐᓂᐊᓯᐅᖅᑎᒥᓪᓘᓐᓃᑦ ᑕᑯᔭᖅᑐᖅᑕᐅᑎᒋᒋᐊᖃᖅᐳᑎᑦ ᓄᓇᓕᔅᓯᓐᓂ ᐅᖃᖃᑎᒋᔭᖅᑐᕐᓗᒍ ᑎᒥᒃᑯᑦ ᖃᓄᐃᓐᖏᑦᑎᐊᕋᓗᐊᕐᒪᖔᖅᐱᑦ ᐊᒻᒪᓗ ᓄᑕᕋᔅᓴᐃᑦ ᖃᓄᐃᓐᖏᑦᑎᐊᕋᓗᐊᕐᒪᖔᖅ ᖃᐅᔨᓴᖅᑕᐅᓂᐊᕋᕕᑦ.
ᑭᓯᐊᓂᓗ, ᐊᐅᓈᓐᖐᓐᓇᕋᓗᐊᕈᕕᑦ ᖃᐅᔨᔾᔪᑕᐅᒃᑲᔪᑦᑐᓂ ᓇᔾᔨᒻᒪᖔᖅᐱᑦ, ᐊᓯᖏᓐᓂᑦ ᐱᔾᔪᑎᖃᕈᓐᓇᕆᕗᑎᑦ ᐊᐅᓈᓐᖐᓐᓇᕐᓂᕈᕕᑦ. ᓂᕆᖃᑦᑕᕐᓃᑦ, ᐃᖃᐃᓕᓴᓗᐊᖃᑦᑕᕐᓃᑦ ᐊᒻᒪᓗ ᑕᖃᓗᐊᖅᓯᒪᓃᑦ ᑖᒃᑯᐊ ᐱᔾᔪᑕᐅᔪᓐᓇᖅᐳᑦ ᐊᕐᓇᒧᑦ ᐊᐅᓈᓐᖐᓐᓇᕈᑕᐅᓗᑎᒃ. ᐊᒻᒪᓗ ᓱᓕ ᐃᓚᖏᑦ ᓇᔾᔨᓇᓐᖏᑦᑐᑦ ᐊᐅᓈᓐᖐᓐᓇᕈᑕᐅᔪᓐᓇᖅᐳᑦ. ᐃᓚᖏᑦ ᐊᕐᓇᐃᑦ, ᐱᓗᐊᖅᑐᒥᑦ ᒪᒃᑯᓐᓂᖅᓴᐃᑦ ᐊᐅᓈᕐᓂᖏᑦ ᐊᓯᔾᔨᖅᑕᕈᓐᓇᖅᐳᑦ ᓇᓗᓕᐅᑕᐅᕙᑦᑐᓂ ᖃᖓᒃᑯᑦ ᐊᐅᓈᕐᕕᔅᓴᖃᕐᒪᖔᖅ. ᐃᓱᒫᓘᒃᑯᕕᑦ ᓇᔾᔨᒋᐊᖓ ᐅᕝᕙᓘᓐᓃᑦ ᐃᓱᒫᓗᒃᑯᕕᑦ ᐊᐅᓈᕐᓂᕆᕙᑦᑕᓐᓂᑦ ᐅᖃᖃᑎᖃᕈᓐᓇᖅᐳᑎᑦ ᓘᑦᑖᒥᒃ ᐋᓐᓂᐊᓯᐅᖅᑎᒥᓪᓘᓐᓃᑦ ᐃᓱᒫᓘᑎᕕᑦ ᒥᔅᓵᓄᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᓄᖅ ᖃᐅᔨᔪᓐᓇᕐᒪᖔᖅᐱᑦ ᓇᔾᔨᒻᒪᖔᖅᐱᑦ ᐅᕗᖓ ᖃᕋᓴᐅᔭᒃᑯᑦ ᑐᑭᓯᒋᐊᕈᓐᓇᖅᐳᑎᑦ ᐅᕗᖓ