ᐊᖑᑕᐅᖃᑎᒋᙱᑕᕐᓂᒃ ᐊᕐᓇᐅᖃᑎᒋᙱᑕᕐᓂᓪᓘᓐᓃᑦ ᑯᔭᖃᑦᑕᕈᕕᑦ, ᖃᐅᔨᒪᔭᕆᐊᖃᖅᐳᑎᑦ ᓯᖓᐃᓕᑐᐃᓐᓇᕆᐊᖃᕋᕕᑦ. ᐊᕐᓇᐃᑦ ᒪᕿᕝᕕᐅᑐᐊᕌᖓᑕ ᓯᖓᐃᓕᑐᐃᓐᓇᕆᐊᖃᓲᖑᖕᒪᑕ. ᐃᒻᒥᒥᒃ ᓴᐳᑎᓯᒪᙱᑐᐊᕌᖓᑕ ᑯᔭᒃᑎᓪᓗᒋᑦ ᓯᖓᐃᓕᓲᖑᖕᒪᑕ (ᐃᒪᓐᓇᐅᑐᐃᓐᓇᕆᐊᖃᖅᐸᒃᑭᓪᓗᓂᓗ ᓴᐳᑎᔾᔪᑎᓂᒃ ᐊᑐᕋᓗᐊᖅᑎᓪᓗᒋᑦ ᐅᓲᑉ ᐴᖓ ᓱᕋᖕᓂᖅᐸᑦ ᑕᒪᐅᖅᑲᓗᑎᓪᓘᓐᓃᑦ ᐊᑐᖅᑕᐅᓐᓂᖅᐸᑦ ᓯᖓᐃᓕᕐᓇᓲᖑᖕᒥᔪᖅ), ᐃᑎᒃᑯᑦ ᑯᔭᒃᑕᐅᔪᑦ ᐅᕝᕙᓘᓐᓃᑦ ᐅᑦᑐᒃᑯᑦ.

ᕿᑐᕐᖓᖅᑖᕈᒪᙱᑦᑐᑦ ᓂᕈᐊᒐᒃᓴᖃᐅᕈᓘᔭᖅᐸᖕᒪᑕ ᓯᖓᐃᓕᕐᓇᙱᑦᑐᓂᒃ. ᐱᖃᑏᓪᓗ ᐅᖃᒪᔭᖃᑎᒌᒋᐊᖃᖅᐳᓯᒃ ᖃᓄᐃᑦᑐᒥᒃ ᖃᓄᐃᑦᑐᓂᒡᓘᓐᓃᑦ ᓴᐳᑎᔾᔪᑕᐅᔪᓐᓇᖅᑐᓂᒃ ᐊᑐᕈᓐᓇᕐᒪᖔᓯ ᑯᔭᓯᒋᐊᓚᐅᙱᓐᓂᔅᓯᓐᓂ. ᓯᖓᐃᓕᔾᔭᐃᒃᑯᑎᓂᒃ ᓯᖓᐃᓕᕐᓂᕐᒥᒡᓗ ᐅᖃᐅᓯᖃᖃᑦᑕᖅᖢᓂ ᑕᑯᒃᓴᐅᑎᑦᑎᖕᒪᑦ ᑕᒪᐃᑕ ᐅᒃᐱᕆᔭᖏᓐᓂᒃ.

ᓯᖓᐃᓇᓱᒋᑐᐊᕈᕕᑦ, ᓄᑕᕋᓛᒃᓴᑯᓗᐃᑦ ᓴᐳᑎᓯᒪᔭᕆᐊᖃᖅᐸᑦ ᐃᒥᐊᓗᒃᐸᙱᓪᓗᑎᑦ ᓯᖓᐃᓂᕐᓂᒃ. ᓯᖓᐃᓪᓗᓂ ᐃᒥᐊᓗᖃᑦᑕᖅᖢᓂ ᐃᒡᓕᐊᖅ ᐊᒃᑐᖅᑕᐅᔪᓐᓇᕐᒪᑦ ᐊᑲᐅᙱᓪᓕᐅᕈᑕᐅᓕᕈᓐᓇᖅᖢᓂ ᓄᑕᕋᓛᒃᓴᑯᓗᖕᒧᑦ, ᐃᓅᓯᓕᒫᒥᓄᑦ ᐃᓕᖅᑯᓯᖅᓱᕈᓐᓃᕈᑕᐅᔪᓐᓇᕐᒪᑕ ᐊᒃᓱᕈᕐᓇᖅᑐᖅᓯᐅᕐᓇᕕᒡᔪᐊᖅᖢᓂᓗ. ᓯᖓᐃᔪᑦ ᐊᕐᓇᐃᑦ ᐃᒥᐊᓗᒃᐸᒃᑐᑦ ᐊᑦᑕᕐᓇᖅᑐᒃᑰᔅᓴᐃᓐᓇᓲᖑᕗᑦ ᐃᒥᐊᓗᖕᓂᑭᖦᖤᕋᓗᐊᖅᐸᑕ ᐃᒥᐊᓗᒡᔪᐊᖃᑦᑕᖦᖤᕋᓗᐊᖅᐸᑕ.

ᓯᖓᐃᓕᕐᒪᖔᖅᐱᑦ ᖃᐅᔨᓴᖅᑕᐅᔪᓐᓇᖅᐳᑎᑦ ᐋᓐᓂᐊᕕᔅᓯᓐᓂ, ᐅᖁᒪᐃᓐᓂᕐᓂᐊᕐᕕᔅᓯᓐᓂ ᐅᕝᕙᓘᓐᓃᑦ ᓇᖕᒥᓂᖅ ᓂᐅᕕᕈᓐᓇᖅᐳᓯ ᖃᐅᔨᓴᕈᑎᓂᒃ ᐄᔭᒐᖅᑖᕕᖕᒥᑦ. ᖃᐅᔨᓚᐅᓱᖓᕈᕕᑦ ᓯᖓᐃᖕᒪᖔᖅᐱᑦ ᓯᖓᐃᙱᒻᒪᖔᖅᐱᑦ, ᐃᓱᒪᓕᐅᕆᔪᓐᓇᖅᐳᑎᑦ ᓄᑕᕋᓛᒃᓴᑯᓗᐃᑦ ᖃᓄᐃᓕᐅᕈᒪᖕᒪᖔᖅᐱᐅᒃ ᐱᐅᓛᒻᒪᕆᖕᓂᒃ ᖃᓄᐃᙱᑦᑎᐊᕐᓇᖅᑐᓂᒃ ᓂᕈᐊᕈᓐᓇᖅᓯᑦᑎᐊᕐᓗᑎᑦ ᐃᓕᖕᓄᑦ ᓄᑕᕋᓛᒃᓴᑯᓗᖕᓄᓪᓗ.